Read Hatam MAZMUR 34 Bible Online

MAZMUR 34 - Hatam bible

MAZMUR 34

¹ Doia Daud mpe di bisinggre nok no di mirei kipon noti ei Abimelekh noho bei bibindei ba, ijji noni bimbut hak ug.

²Midipai sigyo bak TUHAN bijo ninno bijo kikau. Bit bon dikes dihyet hon bidinggei sut Noni bu bi kan bi.

³Dinggei sut Noni tut niyai munti nya. Ma yo di indwau nya ingig itingou mem dihyet di bindei ba, ingon llei.

⁴Jikwei ba, inggei sut TUHAN nisindemti ba, ikon ninyeng noyam.

⁵Dingat nadi bak TUHAN leu api Noni buhup dihyet bikwek da leu mun di biyai dingon digit.

⁶Mbro nok gino hi co kep yok lo, yo di iba ingon com Noni yahagom ingon nggan-triot kei ba, bit bon ingon pus tut Noni bi sren cem.

⁷Yo di isindem bi nya ingat nadi bak TUHAN leu api Noni buhup ighyet biteu yok leu mun di buhun tak yok hagom.

⁸Nide malaikati ya srak ko hagau yo di ikuk yok bak TUHAN biteu yok bingwes ngun leu mun di om kep yok.

⁹ Ma abingon ei dip leu binhyepo angat bipia TUHAN singat tut nye nindig bibor. Yo di igwam coi Noni yahagom ingon nggei-hi-nggei.

¹⁰Je di TUHAN de limwa nya e, jikuk je biNoni lewo yo di ibit nihyet ima mun di isuar nya hagom.

¹¹Mindhe singa inggum bibor lewo ide mun di igyem hi jo bi noro yo di iba yoho rok TUHAN indwau sut mun nyeng hi bi.

¹²Dimunggwom bat jen e, ma jingig jitingou mem dihyet. Dingginau je leu binhyepo jinggei sut TUHAN kan.

¹³ Tungwa tou rino joi sut niyaijo jei biborti kin gi niyaijo ei nibong kei nigwam keisi ne,

¹⁴ma noni pijuk nidwep ser nhyema pai tungwatu nya kinei biris mun au.

¹⁵Suar mbres nonti leu sisar biyai kep niyai munti di kei nya ba, bingon tut ningon jo nyahanti kikau cem.

¹⁶TUHAN nyohou yo di ingon sren bingig nitingou mem ighyet tirigi yahara Noni.

¹⁷Noro Noni tte tut yo di isibut nya igyai munti di kinei nya. Tirigi imai leu su ne jei bi tungwatu nya ibbwe ser yok bihigom.

¹⁸Yo di ingon sren nya yahara TUHAN leu api Noni buhup ighyet biteu yok leu mun di buhun tak yok hagom.

¹⁹TUHAN ningat rin simiak yo di ingon kinei nya. Noni teu yo di ingon cut bihigom leu su nya bingwes ngun.

²⁰Mun di buhun mang bibor cut igkep no di singat kei noro TUHAN teu noni biningwes ngun leu hagom.

²¹ TUHAN nyohou nonti njem kin ninnei apino tungwatu nya midahat ninjum gom cem bi.

²²No di sibut mitug ndei nimai drek dip nide nisibutti ba, yo di ingon koi kep yo di ingon sren nya mitug ndei hukum.

²³Noro TUHAN teu nide awak nya. Bikwop yo di igya coi Noni mitug ndei hukum bi.