Read Hatam MAZMUR 38 Bible Online

MAZMUR 38 - Hatam bible

MAZMUR 38

¹Doia Daud di Daud pai tirigi ibon midut nibiyok ngon kepti.

²TUHAN e, ma aba Ade nigga biborti bikes hukum nihwen bit dati ei da dip au.

³Ade tibor tibim dati bikus dite hi lene bindei bidibok-ba. Dingkek kan anda di buhun tak da cem.

⁴Dinggwen buhun drek dip Ade nigga biborti. Ditde sisar bindei ba, dinghuisi hi di kwes bi.

⁵Ditde nitunggweisi noyam kin minyei di su kep da bibindei ba, disar. Ditde sisar nok mun di buhun tak da bibor.

⁶Nuom kui dibokti nya cem ba, ninghap mpiei drek dip dingon mbumti.

⁷Dindun bou bidinghim koi sut. Digwam bidimmou ba, dingon cem ngguk ei njap jei.

⁸Ningkek dut, dut bidem dingut titut yam ba, dinggwen nindig bibor.

⁹Dingut dem kep mun di idram binem-nnai ba, nisindemti ngwig leu da tu. Duun bijo ninno lewo dingon bos-bos nyen.

¹⁰TUHAN e, akan tut mun di diwis him nya hagom tu. Amiap kep dihyet tirigi duun bijo ninno.

¹¹Dingon digit-digoi ba, nisindemti ngwig hak leu da tu ba, diyai cem dindi.

¹²Dinggwenti bindei ba, disut bat nya imbres yo leu da. Adig-ajoi nya cem yoom yonti ei minu ting leu da.

¹³Yo di ibingon mem gima igyai nimai bida indin bon ser da. Yo di imbuk tut da yeheu imbuk mem gima isiber dinggrom.

¹⁴Noro dibon danti nok no di nitingou nam kin mibbwe di mbrap kan bi.

¹⁵Ningat ne didem kep no di miap bi. Gima rino digisrep ighyet bi.

¹⁶Noro ditde TUHAN Allah e, diyok dingon mem Na. Nangkom rino ma abuhup dihyet.

¹⁷Ma asindui sut ditde siceu nya ba, ingat mun di buhun di cut igkep da ingon kei kep da au. Gino didigit lene ma asindui sut yok ba, isuglai suglai wai au.

¹⁸Mbigom midicut ba, ninggwenti bijo-jo yam dip kep da kikau.

¹⁹Dipai jit ditde sisar bidingon bos-bos nyen tirigi dikan-kan nyen tut ditunggweisi nya.

²⁰Ditde siceu nya imang bibor ba, isindem cem. Ingon kinei sut ditde niyai munti nya.

²¹Diyai munti nya kei noro yo di iba gi kinei bibuhup gi kei nya ingon sibui sut da.

²²TUHAN e, ma akes dani ei au. Ditde Allah e, ma agwam minu ting leu dani au.

²³Ditde TUHAN di teu da bidingwes ngun e, ma abipbur ba, akwei mpu da o!