Read Hatam MAZMUR 40 Bible Online

MAZMUR 40 - Hatam bible

MAZMUR 40

¹Doia Daud mem no di bie tut doia nimpung.

²Doom dingon bidimem kep ser TUHAN di mpu da leu api Noni yok ngon kep da bimiap kep dihyet.

³Noni kon da leu jui nsi di kinei bibor biteu da leu igkrop di ntan bibor lene kes da bidiya ei bor ngug dip bibindei ba, dimbut sindem.

⁴Noni ngginau da tut doia nijep leu binhyepo dibinggei sut ide Allah. Yo di ingat mun dini yok bou igyai him imang bibor minga leu sut ba, iba ingon com TUHAN drek dip.

⁵Yo di iba ingon com TUHAN ingon nggei-hi-nggei. Lewo iba yoho rok kwar binjei bit yo di ikuk yok bak kwar nya bi.

⁶TUHAN e, abon mindur nya mang bibor mem nye tu. Nyende TUHAN Allah e, hiter inyeng jei sur anyeng kan bi! Atin ei angon kanti di mindur mang bibor mem nye tu. Bit bon dikwop mun di mindur dima yok nimangti kan bi.

⁷ Ajoi sut midut nindig mindhe kep humti kin midut nibiyai ningon kwes kin Nati kin midut njita nibipai sigyo bak Naniti bi. Asuar midut nindig mindhe titut kep humti kin midut nibiyai nikos ser sisarti cem bi. Noro abindei ba, ditingou dile leu binhyepo dintu kep ahyet.

⁸Lene dibuhup “TUHAN e, da rini. Srat bokti di ipas ei srat kijumti pai,

⁹Allah e, dingon llei sut gi diyai igbit angon kanti mem da bidipwoi acuk Dati nya hagom ei dingonti.”

¹⁰TUHAN e, tirigi Ade limwa nya imbus yam ei pima ne ditri tut bipia ateu nye biningwes ngun. Akan tut bipia midikimut duhui leu mun di ditri tut dima bi sren.

¹¹Diku dihyet tut angon gomti kin Ade niteu yok leu sisarti bijo nding ei dingonti bi. Noro ditri tut Ade nimpu nyeti kin angon gomti bijo ninno bijo kikau. Tirigi Ade limwa nya imbus yam ei ne dikimut duhui bi noro ditri tut angon ngakei nyeti kin angon gom tut nyeti biyok.

¹²TUHAN e, ma akes hon ba, angondut da bu bi au. Noro ma aba angon ngakei dati kin angon gom tut dati cem binyohou da kikau.

¹³Mun di buhun mang bibor yon ttai da ba, bit bon dikwop nimangti kan bi. Ditde sisar hatap da apino dingat mun nyeng hi bu bi. Sisar dima nimang ndig dor njiriek dibou nta nimangti bibindei ba, dingon nghen leu su.

¹⁴TUHAN e, abipbur ba, ateu da ba, ampu da cem!

¹⁵Nnaba, abindei ba, yo di itin ei mem igyai nimai bida ingon tai-tai bou. Nnaba, abindei ba, yo di ingon koi kep da inang bihigom bibindei ba, nimmai kui yoti.

¹⁶Dijoi sut gima yo di ipa tut da yahagom igwam nidigitti kin nimmaiti.

¹⁷Dijoi sut gima yo di ikuk yok biNa yahagom ingon nggei-hi-nggei ba, yo di inggok tut Na yahagom ingon llei bibor cem. Handei kon ba, yo di ateu yok leu sisar nya yahagom ipai sigyo hanyen biNa bipai-pai nyen “Mbenjen! TUHAN ninyeng jei bibor!”

¹⁸TUHAN e, duhui mbum cem dinghuisi jet cem noro angon prion ser da bi kikau. Ditde Allah e, ampu da ba, ateu da leu sisar kan. Gima rino ma abinyen au!