Read Hatam MAZMUR 42 Bible Online

MAZMUR 42 - Hatam bible

MAZMUR 42

¹Nimpung Korah ide doia ningginausi mem no di bie tut doia nimpung.

²Allah e, diyok dingon mem Na noyam kin rusa di nggok minyei di dut kep ninggobiausi.

³Allah di niyaijo e, diyok dingon mem Na. Apig bu leu api mibon nituti mem da leu binhyepo dihwou kuk da biNa ei Ade Ig i?

⁴Dipim kikau mem mmun-njap bidiyem kep diyai nggwei noyam kin diyem njita. Ditde siceu nya ihig da mem njap jei bipai “Ade Allah No ritou i?”

⁵Tirigi diyok ngon kep mpe di po diya tut disut bat kin dide bat nya binicoi ug ei TUHAN De Ig mem njap ndig bidibie tut yok ne dingon ngguk bibor. Mpe dima lene nahagom ningon llei bibor ba, nipai doia cem ba, niba nimbos-hi-mbos binggei sut Allah.

⁶Nggon rino dingon ngguk bibor nok i? Nggon rino dingon buhun bibor nok i? Diba dingon com Allah. Midinggei sut Noni hanyen bu bidikuk da bak lewo Noni teu da bidingwes ngun tu.

⁷Dingon kinei bibor ei dingkiaisi dini. Gima rino dingon jo kep TUHAN. Noni bindei dino dingon kinei bibor dem kep nok muk di tti bibor ba, dinnei kimbas eisi tu.

⁸Mun di buhun cut igkep da dem kep nok minyei di su kin minyei ninyei di biam kwei leu Nungug Hermon kin Nungug Mizar bicom Yordan nyai.

⁹Dijoi sut gima TUHAN kes ningon ngakei dati bida mem mpia njap leu binhyepo diba doia binggei sut Noni bidingat nadi mem mpia mmun bak No di yai niyaijo bida.

¹⁰Allah ne No di ya srak ko hagau da ri. Gima rino dihig ser Noni “Nggon rino angon prion ser da tu i? Nggon rino ditde siceu di isibut bibor nya ibindei ba, mun di buhun bibor cut igkep da i?”

¹¹Ighyet di tigut da tereu nok gi ditug midut. Leu api ihig-hig nyen da “Ade Allah No ritou i?”

¹²Nggon rino dingon ngguk bibor nok i? Nggon rino dingon buhun bibor nok i? Diba dingon com Allah. Midinggei sut Noni hanyen bu bidikuk da bak lewo Noni teu da bidingwes ngun tu.