Read Hatam MAZMUR 45 Bible Online

MAZMUR 45 - Hatam bible

MAZMUR 45

¹Nimpung Korah ide doia ningon ngakei yamti mem no di bie tut doia nimpung di ibikiek Mitou Bakung.

²Nihyet di dia-diau kei biam nok minyei leu dingonti lewo dipai doia dini drek dip nibou ndig. Didweb tin ei noyam kin no di nibou ngwakti kan tut nihyet nibiti nindati igkei lene ba nide buk bipas.

³Nani aubbu ngat dor njiriek tungwatu nya yahagom ba, aji ngkiem ba, mpung tut mun di kei lewo Allah njei mun di kei bina ninno tu.

⁴Nibou ndig di sindem bibor e, akri ade singau simeda kin antig bou a. Nani akei-kau-kei ba, ade nipigati piga kei!

⁵Abri ade kroba pran ba, abimbut ndam nibindei timek ade siceu nyati. Aba mimbri di kui angkek bicuon nihyet di nijit kin ningon sren-srausi di ntun ningon di nem him. Abindei timek Ade siceu bibor tug hon ade nisindemti.

⁶Tibor ade di nggwen tibim ade siceu nya ingonti bikus nite hi leu ba, ngkiai nya icut ug ei amig him.

⁷ Allah yai nisindemti bina mem gima anyeng tak kep limwa nya. Ade nisindemti jo ngkiem bijo ninno bijo kikau. Aba angon srenti binyeng tak kep ade limwa nya.

⁸Angon ngakei ningon di nisren-srausi lo, angon mpo tut nikinei biborti. Gima rino ade Allah dimig nani ei bibindei ba, angon nggei-hi-nggei dor njiriek nibou ndig nindigsi nya ug a.

⁹Ade sinsun wer ui-gwang kei nok mur kin gaharu kin cendana di nyop kei cem. Yo di ikek musik ei ig nibou ndig di iba gaja nikwai di jei bibor bimau ibindei ba, angon nggei-hi-nggei.

¹⁰Nibou ndig nya ipmisop bat nya bitut sop gwam nitta pilei nya ingat rin ei ade ig nibou ndig. Nibou ndig nitnem ndei mimau mas di pimbai kei biya tut ei nibou ndig de banggo mbrei nite anda com.

¹¹Nibou ndig nitnem e, angig atingou mem dihyet di dipai hwou bina. Ma abbwe ser ade mben kin ade adig-ajoi nya cem hak ug.

¹²Anok misop ubbu ngat di mingot nibou ndig ningon kin na. Noni ne ade andigpoi rin ba, akuk na binoni.

¹³Timiei minu ndig Tirus mittei ndigban kwei binjei bak nani. Yo di inyeng nya mibingon mem gima igyai angon kei.

¹⁴Misop di tin ei mem wak nibou ndig coi kwei ba, nikei-kau-keisi piga mpia kei. Iba mas bibien nide sinsun sop di kai ug bipek nimigya ba,

¹⁵su no sinsun di nisieng bong yamti. Ibuwak noni bitut nisut bat sop gwam nitta pilei nya di injei bit bikes bak nibou ndig.

¹⁶Iba ingon di llei-lau bimbos-hi-mbos bibicoi ug ei nibou ndig de ig.

¹⁷Nani ne ditde nibou ndig ri. Ade nintun na him di pinai nya imang bibor mikui bigwam ei adigup bat-adigai bat nya ide banggo mbrei nibou ndigti. Ba, akon yok binok nibou di inyeng tak kep limwa nya ug bipek dihyei nisurti-nipekti.

¹⁸Ditde doia dini mibikon anyeng bitut ade nintun na him inyenga leu api ngkiai nya mikon anyeng bijo ninno bijo kikau.