Read Hatam MAZMUR 50 Bible Online

MAZMUR 50 - Hatam bible

MAZMUR 50

¹Doia Asaf. TUHAN Allah Di Sindem Bibor mbrap ba, Noni hara bak tungwatu dihyeisi dini hagom leu mpia nipriti ug bipek mpia nicutti.

²Allah de nisieng-siausi piga kwei leu minu ndig Sion di kei bibor kei bipiga kei.

³Ide Allah kwei noro su No nyahan bi. Hum di ninjeng srei kin sigau di nimig ten bibor yon ttai bibie Noho.

⁴Noni jem mpia-bbed him kin dihyeisi dini leu binhyepo icap ser midut nimbus Nide limwa nya ingonti bingat bou igyai him.

⁵Noni pai “Jinduk Ditde limwa nya di ikrau kep ide gi preu bit Da bingkiem tug hon midut di ibon ei nimbar hum dokti nya yahagom bidem yam.”

⁶Mpia-bbed him tri tut bipia Allah ningon sren-srau ba, Nongkom ne nikei mem Nide limwa nya ri.

⁷Ditde limwa jen e, midimbrap ug ri. Ma jingig jitingou mem. Mben Israel e, midipai kep je. Dani ne Allah rin bidinok jide Allah.

⁸Dipai kep jeni drek dip midut nikwas mun nyeng hi biDa kin midut nindig mindhe titut ei nimbar hum dokti di jibon bikwop njap ei Doho bei bi.

⁹Disuar sapi leu jide ig kandan nsi kin kambir leu jide mindhe-ndhe nimuhup tu nya ikieti bi.

¹⁰Mindhe-ndhe di igya bigbehei kin mindhe-ndhe nimuhup tu di nggreu-nggrop ei nungug tou sribu-ribu dip nya ne Ditde hagom.

¹¹Ha ngot di iteu ei bidem nungug him nya kin mindhe-ndhe di ninnei tau nuhwap nsi ngot di ingat rin ei iggum ndigsi di ha he bong nya cem Ditde hagom.

¹²Gino dinggum lene midahara jeni tut njita bi sren. Lewo dihyeisi dini hagom bitut mun di jo niti nya ne Ditde ri.

¹³Da diyem sapi nikre ninghui bididut kambir nikre ninggrom bi.

¹⁴Ma jibon midut nibipai sigyo bak Allah ba, jiyai bipek kep mun di jipreu ei bak No Di Ninyeng Jei.

¹⁵Mpe di juum mun di buhun tak je lene ma jahara Da leu api midikwek je leu mun di ngot kep je nya apino mijikon dinyeng.

¹⁶Noro TUHAN pai bak yo di isibut nya “Dem tut gima jindat kep Ditde nicukti nya ba, jisimbot kep biyam tut gi preu di dipreu ei mem je bi.

¹⁷Lewo jikou sut Ditde nisok kep jeti ba, jibirok Ditde nicukti nya ei jitta cem.

¹⁸Jijem jisut bit no di nggimang igkei bijibit tut niyaisi bijibicom yam bit yo di iba yoho rok nicut tut hi nitnemti nya cem.

¹⁹Jitindei ser nituti tirigi jisimbot kep mun di kinei bibor biyam bijihig jingon ei niris mun igkeiti cem bi kikau.

²⁰Jitindei ser nituti tirigi jiris mun ei jide adig-ajoi nya dip bijipai yok kinei-kinau cem.

²¹Jiyai kep gima yok hagom lo, digwam nyahan leu. Gima rino jikan bipia Dani dinoyam kin jeni. Noro tini bu ne dinjei kep jeni ba, dibindei mun dima yok hagom bijo nibreisi mem je.

²²Je di jiba jingha bak Allah e, ma jiyok ngon kep dihyet. Gi bi lene midibindei sar je leu ba, hi dima miteu je bijingwes ngun kan bi.

²³Yo di ibon midut nibipai sigyo biDa yongkom ibikon dinyenga. Midindo Ditde puig di bie ndam niteu leu biningwes ngunti bak yo di ibit dihyet.”