Read Hatam MAZMUR 56 Bible Online

MAZMUR 56 - Hatam bible

MAZMUR 56

¹ Doia Daud mem no di bie tut doia nimpung. Bit leu doia Hakimoi Mbrei Bbwe Ei Minu Ting. Daud ba doia dini bikiek mpe dino mben Filistin ikat noni ei minu ndig Gat.

²Allah e, angondut da lewo ditde siceu nya ikwei hwen da ba, ico kep da bijo ninno.

³Allah Di Ninyeng Jei e, yo di ihwen bit da ico kep da bijo njap jei ba, yo di ihwen da imang bibor.

⁴Mpe dino dittin bibor ne diba dingon com Nani.

⁵Dikon Allah ninyeng drek dip mun di Noni preu ei mem da tu. Diba dingon com Noni apino digittin bi. Tungwatu nya isindem mem ibibon da kinei kan bi.

⁶Yo di imbuk tut da igyok nisinsiou ei ditde munhyet mem njap jei. Igyok ighyet mem yam leu binhyepo ditug ndei mun di buhun bijo kikau.

⁷Ittei nimpung bigwam ei nikuti bigyok igyai kep diyai munti nya hagom cem ba, inggok nituti dima igyai nimai bida.

⁸Allah e, abindei ba, ibiang ide sisar nibuhunti. Abindei sar yok tug hon Ade nigga biborti hak ug!

⁹Akwop kep njap di dibong-bong wai ba, akan tut diyai nggwei cem nimangti tu. Akwop ba, apas kep nimangti hagom ei Ade sratti tu bi e?

¹⁰Njap dino dahara Nani ne ditde siceu nya misu jou kep inghim dip lewo dikan tut bipia Allah tti kin da tu.

¹¹Dikon TUHAN Allah ninyeng tut mun di Noni preu ei mem da tu.

¹²Diba dingon com Noni apino digittin tut tungwatu nya bi. Lewo isindem mem ibibon da kinei kan bi.

¹³Allah e, midiyai mun bipek kep ditde nipreu ei mem Nati tu nya. Midibon midut nibipai sigyoti biNa tug hon mun di dikes bijo ei nimbar hum dokti.

¹⁴Leu Nani rino abindei dino dingwes ngun leu nimai ba, anyohou da leu binhyepo hi bindei timek da bi. Gima rino diyaijoti jo ei Allah ninda behei ba, ei nipigati di piga digai yo di igyaijo nya cem ug a.