Read Hatam MAZMUR 59 Bible Online

MAZMUR 59 - Hatam bible

MAZMUR 59

¹ Doia Daud mem no di bie tut doia nimpung. Ibrim leu doia Ma Jicok Tut Au. Daud ba doia dini bikiek mpe dino Saul cuk tungwatu ba, yuug ba igyai hwen kep nide ig leu dima igyai nimai bak noni.

²Ditde Allah e, ateu da bidingwes ngun leu ditde siceu nya inda nsi. Anyohou da leu yo di ikwei hwen da nya.

³Akwek da leu yo di isibut bibor dima yok inda nsi lene ateu da bidingwes ngun leu nimbiam cig nya inda nsi.

⁴Angat i! Yo dima ingig ser puig mem gima igyai nimai bida. Yo di iten-pos nya ibicom yam mem gima ihwen bit da. Lo, TUHAN e, ihwen bit da drek dip sisar di dibon kin diyai tunggweisi cem bi.

⁵Nok gima cem ditunggweisi rino bindei dino iba ibinang bitin ei bi.

⁶Allah Di Sindem Bibor e, akiju ba, ampu da. Israel de Allah e, ayok ayai kep yok. Akiju ba, akes hukum ei ngkiai nya dip. Ma angondut yo di isibut di yaham imbuk kep da au.

⁷Ditde siceu nya ikwei hanyen mem mpia nicutti ba, yaham imbuk nok nsien ba, ibiyon ttai minu ndig cem.

⁸Ipai mun singgre da ba, ighyet wer mpiahi tut da. Ighyet di tibim ei yuhui him nggwen bibor bidem singau simeda ba, ikan bigya hi di miap ighyet dima bi.

⁹Noro TUHAN e, apa ndip yok ba, aba ahyet bicig ngkiai nya.

¹⁰Allah e, diba dingon com Ade nisindemti. Nani lene mpia di dinang coi ri.

¹¹Allah kwei ngat da lewo Noni singat tut da. Noni sindui sut bidingat ditde siceu nya icutti.

¹²Noro TUHAN e, ayai nimai biyok bihigom au. Leu mpaba ditde limwa nya ibbwe ser mun di cut igkep yok. TUHAN di nyohou nyeni e, abindei ba, intek gimahap ba, icut bak Nani drek dip Ade nisindemti.

¹³Ibon sisar tug hon ighyet di tibim ei yuhui him. Handei kon ba, yonti ibiam bon drek dip ingon jeisi. Ighyet jo kep nisigionti kin niris munti.

¹⁴Gima rino Allah e, ma aba Ade nigga biborti bibindei sar yok hak ug. Abindei sar yok ningwig ug leu api tungwatu nya yahagom mikan tut bipia Allah ninyeng tak kep mben Israel bikieng kep dihyei nisurti-nipekti cem.

¹⁵Ditde siceu nya ikwei hanyen mem mpia nicutti ba, yaham imbuk nok nsien ba, ibiyon ttai minu ndig cem ba,

¹⁶isror binggok njita nyen. Gino igyem njita bindei yok bi lene igyau.

¹⁷Noro diba doia bikiek Ade nisindemti. Bikwop njap tekti lene dipai doia bidihyet bong ba, dibikiek angon ngakeisi kin angon gomti. Lewo Nani ne mpia di dinang coi ba, mpia di digwam coi ei mpe di duum mun di buhun ri.

¹⁸Allah e, Nani ne ditde nisindemti ri. Dipai doia ninyen ba, dibikon anyeng lewo Nani ne mpia di digwam coi ri. Aba angon di gom bingon ngakei da.