Read Hatam MAZMUR 74 Bible Online

MAZMUR 74 - Hatam bible

MAZMUR 74

¹Asaf de doia nibingginausi. Allah e, nggon rino akes nye bihigom ei i? Nggon rino agga Nanti Ade limwa nya kikau i?

²Ayok ngon kep Ade limwa di adimig ei habiei nipou kwei su. Ayok ngon kep mben di akwek yok leu binhyepo inok Ade limwa nya. Ayok ngon kep Mbigdip Sion di abindei binok Ade mpia di agwam niti.

³Ayai amig ba, aug ei mpia di nyende siceu nya inggek ngug tig sinsiou leu su nya ba, anut bram. Nyende siceu nya igya kep nimbumbati nya di jo Ade Ig hagom bitimek tu.

⁴Nyende siceu di ihwen bit Na imbos-hi-mbos nyen ei Ade Ig ba, ibitas ide kendera di bindo tut bipia ibindei timek Ade limwa nya tu.

⁵Idem kep niwim kep biei cig di imem inghat tut oi bibiwim biei ei bahamti.

⁶Iba oi kin apak biya kep biei di tukan nya ikilis nya cem bindung-ndiem.

⁷Indig Ade Ig ningat cem bitimek hak bibindei ba, map kui mpia di Ade limwa nya ikuk yok biNa eisi cem.

⁸Ibingon mem gima ibindei timek nye bihigom ba, niba ninghop bikak mpia hak. Igya kep mpia di kwes ei minu dini hagom bindig ningwig a.

⁹Ningat nabi nya kin mindur nya ei niyai him bu bi. Lene hi di kan tut mun di cut igkep nye dini nohonti bi.

¹⁰Allah e, nyende siceu nya miba ighyet bicig Na ug bipek njap pig bu i? Mpaba ighyet tigut anyeng bijo kikau e?

¹¹Nggon rino agimpu nye bu bi i? Nggon rino akes anda leu nye i?

¹²Allah e, anok ditde nibou ndig habiei nipou kwei bipek ammani kep ba, Nani rino ateu nye di ningwes ngun a.

¹³ Aba asindemti di nindig bibor bikwas muk ndigsi hacan ba, adram mindhe wou muk di nindig bibor nya ibou cem.

¹⁴ Abindei ba, mindhe Lewiatan ibou nya nem-nnai leu api abindei inghui binok mindhe-ndhe di ibong kep iggum ndigsi ide mun di igyem.

¹⁵Abindei ba, minyei bousi kin minyei nda nya biam lo, minyei pmem pingge hanyen.

¹⁶Apai tes mmun kin njap ba, abidimig mpia njap nijoti bijo ter leu bed mmun nijoti cem.

¹⁷Adimig dihyeisi dini nohon keti nya kin nijam mpia ngei kin nijam mpia but nohon keti nya leu yam.

¹⁸TUHAN e, ayok ngon kep bipia Ade siceu iba ighyet bicig Na. Ngkiai nya di ikan tut Na bi ighyet wer mpiahi tut anyeng cem.

¹⁹Ma akes Ade limwa di isindem bi nya ei nyende siceu di imbuk bibor indati ba, abbwe ser Ade limwa di iwer nikinei-kinau nya ide mun di cut igkep yok au.

²⁰Ayok ngon kep Ade nipreu ei mem nyeti lewo yo di imbuk nya iku yok ei nidinditi bidem minu dini nisurti-nipekti.

²¹Ma asindui sut ba, nimmai kui nikinei-kinau di hiter nya ico kep yokti au. Abon nituti mem yo di igyai niwei-nidut kin yo di yuhui mbum nya bikon anyenga.

²²Allah e, akiju ba, akim Ade munhyet! Lewo yo di iba ingon com Nani bi nya ighyet wer mpiahi tut Na mem njap jei.

²³Ma abbwe ser Ade siceu nya di ighyet srep huk Nani kin yo di ighyet jei kep Nani au.