Read Hatam MAZMUR 76 Bible Online

MAZMUR 76 - Hatam bible

MAZMUR 76

¹Doia Asaf mem no di bie tut doia nimpung ba, ipai doia dini bibibit nggong mbrei nibimbiti.

²Allah ninyeng jei ei hanjop Yehuda. Ninyeng tibim bidem minu Israel nisurti-nipekti.

³Minu ndig Yerusalem ne mpia di bong niti ri. Mbigdip Sion ne mpia di Ningat rin eisi ri.

⁴Noni cok tut nimbumbati di ibikon pran nya hagom leu sirima. Bitut tibor di njeng kei nya kin mun di ibisu ser tibor ninggwenti nya kin singau simeda nya hagom.

⁵Mbenjen! Na di Allah anyeng jei bibor ba, Ade nisieng-siausi piga kei tirigi angkwei hanyen leu nungug him di abindei timek Ade siceu nya eisi.

⁶Apos mun di tentara di mimbri kui ingkek nya ibikon pran leu yok ba, ibong mai hak ba, mikiju hanyen bu bi sren. Tentara di mimbri kui ingkek nya ide nisindemti pror leu yok tu.

⁷Yakub de Allah e, akon ahyet kep yok apino kuda nya kin tentara di igwam dip nya yahagom icut di imai ug a!

⁸Mbenjen! Tungwatu nya yahagom ittin tut Nani. Gino agga bibor ne tou rima kiju biya pijum ei Aho bei i?

⁹Abindei hei Ade nikos tutti leu gwamti leu api tungwatu dihyeisi dini ittin ba, ikimut yuhui.

¹⁰Leu mpe dima lene ayai abou tut hukum di abikes ei tungwatu nya dip ba, ateu yo di ibiang mun di buhun ei dihyeisi dini bingwes ngun cem.

¹¹Ade siceu nya di imbuk bibor di ingwes ngun leu agga biborti nya minggei sut Nani lo, nigga kep mun cig nya iba sinsun kron bijuk yok drek dip ingon nggukti.

¹²Jiyai bipek kep mun di jipreu ei mem Allah bak Noni. Ma mben ngkiai di ibong ttai je nya yahagom ittei ide munkwas kwei mem Allah di tungwatu nya ittin tut a.

¹³Noni dahat yo di inyeng jei nya bibindei ba, nibou ndig nya ingon ttin bibor ei Noho bei.