Read Hatam MAZMUR 78 Bible Online

MAZMUR 78 - Hatam bible

MAZMUR 78

¹Asaf ba doia bikiek ningginausi. Ditde limwa jen, ma jingig jitingou mem dingginausi. Jiyok ngon kep mun di dindat kep nya.

² Dindat kep nihyet nipingok tungwatu nyati kin nihyet nibiti nindati ba, dibimbot kep mimun tut nijam gi nipou.

³Mun di nimiap tut ba, nikan tut nya di idigup bat-idigai bat nya ipui sut binye ri.

⁴Niku gima bijo nding leu nimunggwom bat nya bi. Minitri tut TUHAN nisindemti kin Nide midyai di nindig bibor nya kin Nide mindur di bon nya hagom bak nintun nye him gi nidipti bu nya.

⁵Allah yai nikos tutti nya bak mben Israel biyai nicukti nya bak yo di intun Yakub him. Allah bidip huk idigup bat-idigai bat nya leu binhyepo ingginau imunggwom bat nya tut,

⁶leu binhyepo ide nintun him yamti di bram yam nya bu mikan tut leu api ibinut gima kikau bak imunggwom bat nya bu.

⁷Tug hon nisinati dima ne iba ingon com Allah lene ibbwe ser Nide nibon munti nya bi. Noro ice tut bibit Nide nicukti nya kikau.

⁸Leu binhyepo yoni midat idigup bat-idigai bat nya dino yaham imbuk kep Allah leu api igibit Nide nicukti nya bi dimati bi. Ndigpoi nipou dima iba ingon comti ngkiem ba, ingon gom tut Allah cem bi.

⁹Keret Efraim di ikrau ide minggwen hampiap kin tibor nya ei inda him lo, inang leu ide siceu ei mpe di ikon pran bit yam.

¹⁰Itunggwei sut mun di Allah preu ei bit yok lene igibit Nide nikos tutti nya bi.

¹¹Ibbwe ser Allah de midyai nya kin mindur di bon mem yok di ingat bou igyai him nya cem.

¹² Allah bon mindur nya bou idigup bat-idigai bat nya igyai him tirigi ingat rin ei Mbang Briep Zoan ei minu Mesir.

¹³ Noni tin puig ei muk nahacanti leu api ya tut yok bisigon ug ei nite hi. Minyei kui sur yam kui nok gi Noni jung ser minyei ei inda com kin inda prak.

¹⁴ Noni ba cou bumbuhui gom bibie tut yok mem njap lene ba cou hum di piga kei bibie tut yok mem mmun jei.

¹⁵ Noni ki nungug tig ei iggum ndigsi bibon minyei nindig bibor biyok bidut.

¹⁶Noni bindei hei minyei leu hak ndig leu api minyei biam binok minyei pmem mem yok.

¹⁷Noro ibon sisar tut Allah kikau. Yaham imbuk kep No Di Ninyeng Jei ei iggum ndigsi.

¹⁸ Ibisinggre mem gima ibingon Allah ningonti tug hon gi ibidip huk tut njita di yoni ijoi sut.

¹⁹Ighyet kinei sut Allah ba, ihig yam “Allah sindem mem gima yai njita bigyem ei iggum ndigsi dini e?

²⁰Ningat ne Noni bui nungug tig bibindei ba, minyei biam sindem bibor mem nye tu lo, dem mem gima Noni tin ei roti biyai mikwau cem bak Nide limwa di nyeni e?”

²¹Allah miap tut inso-nso nyenti dima leu api gga yok ba, ba hum bihwen Nide limwa nya. Nigga yokti bikum eisi kikau,

²²lewo igiba ingon com Noni bitut Nide nisindemti di biteu yok bingwes ngun cem bi.

²³Mbro nok gima lo, Noni cuk mpia-bbed him bikau nimbou nya,

²⁴ leu api bindei juk njita manna kwei leu gwamti mem yok bigyem kep.

²⁵Noni yai njita nindig bibor biyok ba, igyem roti di malaikati nya cem igyem.

²⁶Noni bindei ba, hou mpia priti ninnei di miep lene hou mpia nijjai ninnei di miep tug hon Nide nisindemti.

²⁷Noni bindei ba, ha nya icut ug ei dihyeisi mem Nide limwa nya ikrau bigyem. Ha dima yok imangti dem kep iggum ndung di ikwop nimangti kan bi.

²⁸Ba, ha dima yok icut ug ei ide prak meng yati ttai mpia di ibongti dima.

²⁹Leu api Nide limwa nya igyem njita bindei yok lewo Allah yai mun di ikimam tut biyok.

³⁰Noro tirigi igyem kep mikwau dima bibindei cut ingon priti bigyo,

³¹lene Noni gga bihwen yok ba, yai nimai bak mben Israel di ipilei yo di mimbri kui ingkek nya.

³²Mbro nok gima lo, Nide limwa nya ibon kep sisar kikau. Nide mindur di bon nya bindei ba, iba ingon com Noni cem bi.

³³Gima rino Allah bindei ba, igyaijo ngwig hon kros dem kep no di hi ninnei mbigom ngat he ba, ide njap ngwig ei nijam nidigitti.

³⁴Bikwop mpe di Allah yai nimai bak ibou poi lene nindigsi nya inso yonti tut bingkwei hanyen ndam Noni.

³⁵Igyok ngon kep bipia Allah ne No di ya srak ko hagau yok ba, No Di Ninyeng Jei di teu yok bingwes ngun cem ri.

³⁶Noro iris mun bak Noni tug hon ighyet di nok bu tan.

³⁷ Ingon gom tut Noni ba, igikrau kep nipreu di Allah preu ei mem yokti bi.

³⁸Noro Allah ngondut Nide limwa nya bikos ser ide sisar leu ba, bindei sar yok bi. Noni om kep niggati bitak kep ningon sibui sut yokti bikwop.

³⁹Noni kan kep bipia yoni ne mun di ninnei tau nuhwap nsi di niyaijo kikau bi ri. Ba, idem kep hou di ug bihigom bingkwei hanyen bi sren.

⁴⁰Ikiek imig jou tut Noni ninno ba, ibiyai ningon di sibui sut yok ei mpe di ingat rin ei iggum ndigsi.

⁴¹Ibingon kep Allah ningonti nyen-nyen ba, ibiyai ningon di buhun bak Israel de Allah Di Kwes-Kwau cem.

⁴²Yoni igiyok ngon kep Nide nisindemti kin njap di Noni kwek yok leu ide siceu inda nsi bi.

⁴³Ibbwe ser Nide mindur nya kin midyai di bibon ninggap leusi di Noni bibon ei Mbang Briep Zoan ei minu Mesir.

⁴⁴ Noni luei minyei di ide nya binok nimbiam nggrom apino bit bon igidut minyei dima ningei kan bi.

⁴⁵ Noni ba kros di mang bibor bihwen yok bibiyai ningon di buhun biyok bisindui sut ba mpri nya ibindei dihyei di ide bikinei cem.

⁴⁶ Noni pinak uyum kin hai ceng nya kwei ba, ibindei sar ningat di inju keyam kui ig gudan kin njita kioi di jo miaisi hagom bisar.

⁴⁷ Noni ba biget di mbras nok tig njep bihwen ba anggur di ide bikinei lene ba nggou es di kingkrai yam bihwen biei ara di ide cem bikinei.

⁴⁸Noni sindui sut ba, biget di mbras nok tig njep hwen mindhe-ndhe nimuhup tu di ide nya ba, imai bingwig lene kigyei tot[21] domba kin kambir di ide nya cem ba, imai bingwig.

⁴⁹Noni sindui sut niggati di cig-cai kep yok tug hon malaikati di igyai nimai biyok nimpung gom di Noni pinak ndam yok leu api ikan bipia misar ug ri.

⁵⁰Noni om kep niggati bingondut yok bi. Noro ba nsuwer ajar bihwen yok bisar bingwig.

⁵¹ Noni yai nimai bak munggwom pinai mighumbou nya bidem mben Mesir ide ig bei nsi nya hagom.

⁵² Leu api bie tut Nide limwa nya dem kep nok gembala di bie tut nimpung domba bikrau inda bijem yok ug ei iggum ndigsi.

⁵³ Yo di icoi bit nibie tut yokti ingon jo nyahan ba, idigit tut mun nyeng hi bi. Noro ide siceu di igyon igkep yok isar ei muk jou.

⁵⁴ Noni buwak Nide limwa nya ug ei nidihyei di kwes ba, ug krau nungug him di Noni yai biyati.

⁵⁵ Noni jji timiei nya di ibong ser minu dima leu itimieisi sindam ei Nide limwa nya yoho bei. Leu api kwas minu dima tut keret mben Israel nya apino ibong ser prak meng di siceu ide di imai leu nya.

⁵⁶ Noro mben Israel yaham imbuk kep Allah ba, ibingon Allah Di Ninyeng Jei ningonti ba, igibit Nide nicukti nya bi.

⁵⁷Yaham imbuk kep Allah noyam kin idigup bat-idigai bat nya. Noni ba ningon com yok bi lewo idem kep tibor di koi-ka.

⁵⁸Isrep huk Allah tug hon ide mpia di iwin mem ibikuk yok bak kwar nya. Ibindei ba, ningwak mbriu sut yok tug hon ide kwar di ikuk yok bak nya.

⁵⁹Ngat igyaisi dima rino Noni gga yok leu api rok yok bihigom.

⁶⁰ Lene bikes Nide Prak Meng di yohok ei Silo[22] di nok mpia di Noni Ningat rin eisi ei Nide limwa nya ikieti bijo ei.

⁶¹ Noni sindui sut ba, Nide siceu nya ipos Nide Brua Gi Preu di bindo tut Nide nikei-kau-keisi leu nijoti.

⁶²Noni gga Nide limwa nya di ninyeng tak kep yok nya bisindui sut ba, Nide siceu nya iba singau simeda biyai nimai biyok.

⁶³Nikon pranti yem munggwom pilei di ide nya lene hi di wak sop gwam nitta pilei di mben Israel ide nya bi.

⁶⁴Ide siceu nya iba singau simeda biyai nimai bak imam nya noro kibom di imai leu yok nya bon nituti mem gima ipim tut yok bi.

⁶⁵Lo bi lene TUHAN kiju nok no di kiju leu nibong maisi. Noni kiju nok no di sindem di sindi kes nuhui leu gi dut ba anggur ngei.

⁶⁶Noni bui Nide siceu nya ba, isu jou kep inghim dip lene bindei timek yok bijo ninno-bijo kikau.

⁶⁷Noro Noni rok Yusuf de nintun him yamti di bram yam nya. Noni dimig keret Efraim bi.

⁶⁸Noro dimig keret Yehuda kin Mbigdip Sion di ningon ngakei.

⁶⁹Noni ngot Nide Ig di noyam kin nitimieisi di ngot ei gwamti. Noni bindei ba, bit bon ig dima tti hanyen kan bi ba, noyam kin dihyeisi dini di ngkiem kei bijo ninno-bijo kikau.

⁷⁰ Noni dimig Nide awak di Daud bisu ninda biyai noni leu nihyen kep dombati ba,

⁷¹yai leu mpia di noni nyohou kep domba nipmem eisi. Leu binhyepo Daud minyohou mben Israel di Nide limwa nya.

⁷²Daud ba ningon di sren kei binyohou yoni. Noni ba ningon di ki bikrau inda bibie tut yok.