Read Hatam MAZMUR 81 Bible Online

MAZMUR 81 - Hatam bible

MAZMUR 81

¹Doia Asaf mem no di bie tut doia nimpung bit leu nihyet nibikiek Gitit.

²Ma jikon doia ba, jibinggei sut Allah di nok ide nisindemti ninyeng. Jiba jingon di nggei-hi-nggei bimbos-hi-mbos tut Yakub de Allah.

³Ma jikon doia ba, jibibit mun di impig-mpig nyen nibimbiti cem. Ma jikek nggong kin nggong mbrei kin nibimbiti di bindei ba, itingou ngakei.

⁴ Ma jimiep pun mbrei mem njap ndig cem mem pesta bed jep kin bed yeng jou cem.

⁵Lewo gima ne Allah nikos tutti di kos tut bak Nide limwa di mben Israel kin Yakub de Allah nicukti ri.

⁶Gima ne Allah nimbrap tutti di mben Israel ikrau kep ei mpe di po ikiju kep mben Mesir bihwen pima ri. Dimiap nihyet di dikan tut bi di pai,

⁷“Dikon mun di buhun tak je leu jinghat bidikwek je leu bansi di bindei ba, jahanggwap mbilen.

⁸ Tirigi jibiang mun di buhun tak je bijahara Da lene diteu je bijingwes ngun. Dibuhup jihyet hwou leu kru nijoti di nok mpia di diku Da eisi. Dibingon jingonti ei minyei yaisi Meriba.

⁹Ditde limwa jen e, ma jingig jitingou mem disok kep jeti. Israel e, jimiap kep dihyet!

¹⁰ Ma ngkiai nya ide kwar hi jo ei jikieti ba, jikuk je bak au.

¹¹Dani ne jide TUHAN Allah di buwak je kwei leu minu Mesir ri. Gino jahara Da lene midiyai njita di jisuar bije bijiyem.

¹²Noro Ditde limwa di mben Israel igimiap kep dihyet ba, igibit dihyet cem bi.

¹³Gima rino disindui sut di ingkek ndok ug a. Nnaba, ibit yonti ingon kanti hak ug.

¹⁴Ayo! Handei kon ba, Ditde limwa nya imiap kep dihyet bibit ug o.

¹⁵Gi nok lene midibindei ba, siceu di ide nya indun bou ba, dibindei timek ide siceu nya yahagom cem.

¹⁶Midihwen yo di ingon koi kep Da bidibindei ba, icut biDa. Midikes hukum bijo ninno bijo kikau ei yok dip.

¹⁷Noro midiyai gandum nitu di kei bibor bak Ditde limwa nya bigyem ba, idut ahwei lon ningei di igyai leu hak mihyeti.”