Read Hatam MAZMUR 84 Bible Online

MAZMUR 84 - Hatam bible

MAZMUR 84

¹Doia Korah ninsi de mem no di bie tut doia nimpung nya bit leu nihyet nibikiek Gitit.

²Allah Di Sindem Bibor e, dingon ngakei Ade ig di abong ser dima nindig bibor!

³Diwis him gima dingat rin ei Allah De Ig. Diba dingon llei bibor kin dingat kin dinnei bipai doia bak Allah di niyaijo.

⁴Ditde Allah kin TUHAN Di Sindem Bibor di anyeng tak kep da e, minsit nya itot yaham ba, hacincau nya itot iban leu api ibep idinggwei nya dideu Ade nimbar hum dok nya.

⁵Yo di ibong ser Ade Ig ingon nggei-hi-nggei bipai doia binggei sut Na bikwop mmun-njap.

⁶Yo di igyai ide nisindemti leu Nani kin yo di ingon nggan mem gima yuug kikau ug ei Nungug Sion yahagom ingon nggei-hi-nggei.

⁷Tirigi yoni imbut ug ei Mbang Biei Balsem lene mpia dima luei nitta binok minyei bousi mien mang bibor tug hon mpia di but bibie tut mun di kei.

⁸Ikum ei ide nisindemti kak puig di bie ug ei Sion. Yoni mingat Allah di ninyeng jei dor njiriek Nide awak di pai tes nya hagom bou igyai him ei sirima.

⁹TUHAN Allah Di Sindem Bibor e, ma angig atingou mem dihyet tirigi dingat nadi. Yakub de Allah e, ma antu kep.

¹⁰Allah e, ma anjei mun di kei bak nyende nibou ndig. Ma aya srak ko hagau no di adimig ei su.

¹¹Gino dicem kep Ade Ig mem njap gom ngat he lene gima kei dor njiriek gi dingat rin ei mpia ttou nsi hiter mem mmun-njap sribu gom a. Dijoi sut gi di ya ser dimbou pmem ei Allah De Ig leu gima dibong kei digwam kei bit yo di isibut nya.

¹²TUHAN Allah ne mpia di ninang coi kin nibou ndig di ninyeng jei bibor cem ri. Noni ba ningon di nggriu sut nyeti kin nisingat tut nyeti binjei mun di kei bak nyeni. Noni kou sut gima tak kep mun di kei ninyeng gom leu yo di ingon singat nya.

¹³TUHAN Di Sindem Bibor e, yo di iba ingon com Na ingon nggei-hi-nggei!