Read Hatam MAZMUR 85 Bible Online

MAZMUR 85 - Hatam bible

MAZMUR 85

¹Doia Korah ninsi de mem no di bie tut doia nimpung.

²TUHAN e, angon nggriu sut Ade dihyei ba, angkwei mben Israel ug ei ide nibong kei nigwam keisi di nipou pima hanyen tu.

³Akos ser Ade limwa nya ide sisar nya ba, adip tut ide nitunggweisi nya hagom tu.

⁴Agigga yok bu bi ba, abrim Ade nigga biborti hanyen leu yok tu.

⁵Noro tini bu ne ma angkwei nye ei nijam dimati hanyen. Ma agga nye bu au lewo Nani ne Allah di teu nye leu sisar ri.

⁶Agga nye bijo ninno bijo kikau e? Agga nye bitut nyende nintun him yamti nya ug bipek ide nintun him yokti bu e?

⁷Ayai nisindemti binye hanyen leu binhyepo nye di ninok Ade limwa nya ningon nggei-hi-nggei sut Ade nimpu nyeti.

⁸TUHAN e, ando tut binye bipia no angondut nye kikau. Ayai Ade niteu nye biningwes ngunti binye.

⁹Dimiap kep TUHAN Allah Nihyet di tibim kwei. Gino nyeni ingkwei hanyen bibon kep sisar bu bi lene Allah preu sut nibong kei nigwam keisi binye di inok Nide limwa nya.

¹⁰Ningat ne Noni tindei ser nituti tirigi Noni teu yo di ittin tut Noni bingwes ngun. Allah Di Ninyeng Jei miningat rin bit nye ei ide minu.

¹¹Allah ningon ngakeisi kin mben Israel ingon gomti muum yam. Allah ningon sren-srausi kin mben Israel ibong kei igwam keisi minggriou yam.

¹²Mben Israel ingon gomti mikui ug ei gwamti leu api Allah de ningon sren-srausi micap kwei leu gwamti ndam yok.

¹³TUHAN minjei mun di kei mikuisi bak nyeni apino ningat di kei mintun ide dihyei him.

¹⁴Ningon sren-srausi miya bibie mem TUHAN bitin puig mem Noni.