Read Hatam MAZMUR 86 Bible Online

MAZMUR 86 - Hatam bible

MAZMUR 86

¹Daud ngat nadi. TUHAN e, angig atingou mem ditde nadi ba, abuhup dihyet. Lewo duhui mbum ba, disindem bi cem.

²Acuon diyaisi lewo angondut da. Ateu Ade awak di ba ningon com Na biningwes ngun.

³TUHAN e, Nani ne ditde Allah ri. Gima rino ma angondut da. Lewo dingat nadi biNa mem njap jei.

⁴TUHAN e, abindei ba, Ade awak ningon nggei-hi-nggei lewo diba dingonti birok kik Na.

⁵TUHAN e, asingat kei ba, ajoi sut akos ser nyende sisar. Aba angon ngakeisi di ug hon nohonti bi bingon ngakei yo di ingat nadi biNa.

⁶TUHAN e, angig atingou mem ditde nadi ba, amiap nadi di dahara biNa leu api ampu da.

⁷Mpe di mun di buhun bibor buhun tak da lene dahara Nani lewo abuhup dihyet.

⁸TUHAN e, kwar nya hi di noyam kin Nani bi. Hi di yai kep mun di ayai kep nya ningat rin bi.

⁹ TUHAN e, mben ngkiai di apai tes yok nya yahagom mikwei kuk yok biNa bikon anyeng di jei bibor.

¹⁰Lewo Nangkom he rino Allah ba, aba mimbri di kui angkek bibon mindur nya.

¹¹TUHAN e, angginau da tut angon kanti nya leu binhyepo diba dingon di gom bibit Na kikau. Abindei ba, diba dingon titut bikuk da biNa.

¹²Ditde TUHAN Allah e, midiba dingon titut bipai sigyo biNa. Midikon anyeng di jei bibor bijo ninno bijo kikau.

¹³Lewo aba angon ngakei dati di nindig bibor di nggek jei bi bingon ngakei da. Ateu da bidingwes ngun leu jui nsi tu.

¹⁴Allah e, yo di ingon jei ikiju kwei bihwen bit da. Yo di iten pos nimpung gom ibingon mem gima igyai nimai bida. Yo dima isem tut Na.

¹⁵Noro TUHAN e, Nani ne Allah di angondut nye rin ba, angon ngakei nye. Aom angon tut nye ba, angon nggriu sut nye cem ba, angon gom.

¹⁶Aba angon di nggriu sut da binyohou tou kep da. Ayai nisindemti bida lene ateu da bidingwes ngun cem. Lewo dikuk da biNa noyam kin dipmem di kuk no biNa.

¹⁷TUHAN e, ayai bindo di bindo tut asingat tut dati bida leu binhyepo yo di ingon mpo tut da ingat bipia ampu da ba, agwam ser dingon apino immai sut yonti.