Read Hatam MAZMUR 89 Bible Online

MAZMUR 89 - Hatam bible

MAZMUR 89

¹ Etan di mben Ezrahi de doia ningginausi.

²TUHAN e, midiba doia bikiek angon ngakei nyeti di ug hon nohonti bi ba, miditri tut angon gomti bikwop mmun-njap bijo ninno bijo kikau.

³Dikan tut bipia angon ngakei nyeti jo gingga ba, angon gomti cem mijo ninghig-niker eisi rin dem kep nok mpia-bbed him.

⁴Na di TUHAN apai “Dipreu ei mem Nibou Ndig Daud ba, diba neheng bipreu ei mem ditde awak di didimig ei su,

⁵ ‘Midibindei ba, anyeng tak kep limwa nyati mijo ninghig-niker eisi ri. Ade nintun him yamti nya migya luei ahoti nok nibou ndig bu sindam bijo ninno bijo kikau.’ ”

⁶TUHAN e, mbusyamei nya ei gwamti iba doia bikiek Ade midyai di mindur nya ba, ninnei di ikwes-kwau nya iba doia bikiek angon gomti.

⁷TUHAN e, hiter noyam kin Nani ei mpia-bbed him bi. Ade awak di apai tes nya ei gwamti hi dem kep nok Nani bi.

⁸Ninnei di ikwes-kwau nya di igya bikrop ttai Na ikon anyeng ba, inghuisi mpig sut Na.

⁹TUHAN Allah Di Sindem Bibor e, tou risindem noyam kin Nani i? TUHAN e, aba angon gomti biyai mun nyeng hagom.

¹⁰Anyeng tak kep muk ndigsi di roi bibor. Abindei ba, muk di tti bibor kes hon ba, mpia mbum-bra hanyen.

¹¹Adram naga Rahab[26] di bong muk ngeisi bimai bingwig. Abindei siceu nya bitimek bingwig tug hon Ade nisindemti di nindig bibor.

¹²Anyeng tak kep mpia-bbed him kin dihyeisi dini lewo apai tes hacem bitut mun di joti nya cem.

¹³Apai tes minu di jo nite bei mpia nijjai kin mpia nibiho cem. Nungug Tabor kin Nungug Hermon iba ingon di llei bimbos-hi mbos dem kep nok tungwatu nya.

¹⁴Ade nisindemti nindig bibor bindei ba, nyeni ninggap leu bijo ninno bijo kikau!

¹⁵Angon srenti kin Ade nikos tutti nya ne cou nipmem mem Ade ninyeng tak kep limwa nyati ri. Angon ngakei nyeti kin angon gomti jo nibreisi tug hon ayai munti nya hagom.

¹⁶Yo di inggei sut Nani tug hon doia kin yo di igyaijo ei Ade nipigati di piga digai yok ei Aho bei yahagom ingon nggei-hi-nggei.

¹⁷Yoni ingon llei bibor tug hon asingat tut yokti bikwop njap jei!

¹⁸Abindei ba, nihwen nyende siceu nya bitimek bingwig. Nico kep nyende nitok joti nya tug hon asingat tut nyeti.

¹⁹TUHAN e, Nangkom adimig no di ya srak ko hagau nye tu. Na di mben Israel ide Allah Di Kwes-Kwau e, Nangkom ata nyende nibou ndig.

²⁰Ambot kep bak ade awak di ingon gom nya tug hon ningat-hi-ngat mimbrek ngan tu “Dimpu tentara di ninyeng jei gom. Dita no di didimig leu ditde limwa nya ikieti ei banggo mbrei tu.

²¹ Dittau kep Ditde awak di Daud bidikon ninyeng nok nibou ndig tug hon niyai midut nuhug mini ampou ei nibou nggram himti.

²²Ditde nisindemti minyohou noni bijo ninno bijo kikau. Ditde nisindemti mibindei ba, mimbri kui ningkek.

²³Nide siceu nya mibindei timek noni bi sren. Yo di isibut nya mibindei cut noni bi sren.

²⁴Mididram nide siceu nya bidihwen yo di ingon mpo tut noni bitimek bingwig.

²⁵Midingon ngakei noni bidingon gom tut noni cem. Midibindei ba, nide nisindemti wer kum eisi binindig bibor.

²⁶Midibindei ba, nide ninyeng tak kep limwati nibresti jo leu Muk Hacan kikau ug bipek Minyei Efrat.

²⁷Noni mipai biDa ‘Nani ne ditde Allah kin Dicig kin No di diya coi kin No di teu da bidingwes ngun ri.’

²⁸ Lene midijem ninyeng bipia dipmot mighumbou ba, nibou ndig di ninyeng jei dor njiriek nibou ndig dihyeisi dini hagom cem.

²⁹Midikes dingon ngakeisi di ug hon nohonti bi sren ei noniti bijo ninno bijo kikau. Mun di dipreu ei mem noni cem micut bi sren.

³⁰Midinyohou nide banggo mbrei kikau mem nijam di mpia-bbed him jo nai leu dihyeisi dini yo ba, nide nintun him di bram yam nya miya luei nohoti nok nibou ndig bu sindam bijo ninno bijo kikau.

³¹Ne gino nintun him noni nya ibit Ditde nipingok yokti bi ba, ibimangkrei Ditde nicukti nya cem,

³²isem tut Ditde nimbrap tutti nya ba, ice tut didimig sut mem yokti bi cem,

³³lene midikes hukum ei yok dip drek dip ide sisar nya. Midikes mun di buhun ei yok dip drek dip ide nitunggweisi nya ri.

³⁴Noro midingon ngakei Daud bidingon gom tut noni bijo ninno bijo kikau.

³⁵Midiyai igbit gi preu di dipreu ei mem noni. Midiciu ser Ditde gi preu di dipreu ei mem noni hi bi sren.

³⁶Deheng bitug hon dinyeng di kwes-kwau mbigom ngat bijo kikau bipia midipai-pai wai bak Daud bi sren.

³⁷Nide ninyeng tak kep limwa nyati mijo kikau bibou mpia com nimig bu bi ug e. Nide di intun noni him di bram yam nya migya luei nohoti binok nibou ndig bu sindam bijo ninno bijo kikau.

³⁸Nide ninyeng tak kep limwa nyati mijo ninno bijo kikau dem kep nok bed mmun di mian ser mun nyeng hagom tirigi jo nai bumbuhui.”

³⁹Noro Allah e, tini bu ne angon sibui sut nibou ndig di ando ei su. Akes noni ei ba, akou sut noni tu.

⁴⁰Gi preu di apreu ei mem Ade awak pima cut ba, acom nide topi mas ug ei igkropti tu.

⁴¹Anggek ngug tig di bikrop ttai nide minu ndig kin tentara nibousi di igya coi nya tu.

⁴²Yo di imbut nyen di injiriek nya ipos nide ndigban ba, yo di ninttig-tta nya ipa ndip noni.

⁴³Nani asindui sut ba, nide siceu nya ibindei timek noni apino yahagom ingon llei bibor.

⁴⁴Abindei ba, nide minggwen nya hagom tuam bikinei su. Ahati tut noni tirigi noni kon pran cem bi.

⁴⁵Abindei ba, nide nisindemti ug hon nohonti ba, anjei nide banggo mbrei ug ei dihyeiti tu.

⁴⁶Abindei ba, ninghim koi urung ba, nide siceu nya inim kep noni cem.

⁴⁷TUHAN e, aku Na leu nye kikau e? Angon sibui sut nye dem kep nok hum di cig-cai ba, ug bipek apig bu i?

⁴⁸Ma akan kep bipia jei bi ne dimai ba, apai tes nye di tungwatu biniyaijo kikau bi.

⁴⁹Tou yai niyaijo kikau bimai bi sren i? Notou tungwagom cuon niyaisi bikriau jui nsi i?

⁵⁰TUHAN e, gi preu po bindo tut angon ngakei dati nimbie him po aba angon gomti bipreu ei mem Daud pima jo tirigi tou i?

⁵¹Ma angon prion ser ighyet di kinei sut da di dinok ade awak kin ngkiai nya imang bibor di ighyet wer mpiahi tut da au.

⁵²TUHAN e, ade siceu nya ighyet tigut nibou ndig di ando ei su. Iba ighyet bicig noni bidem nimbutti nya hagom.

⁵³Jikwei ba, inggei sut TUHAN bijo ninno bijo kikau. Igbit ri!