Read Hatam MAZMUR 9 Bible Online

MAZMUR 9 - Hatam bible

MAZMUR 9

¹Doia Daud mem no di bie tut nimpung doia di ibrim leu doia Mut-Laben.

²TUHAN e, diba dingon titut bipai sigyo biNa biditri tut Ade nibon munti di bibon ninggap leusi nya.

³TUHAN Di Ninyeng Jei bibor e, dingon nggei-hi-nggei bidiyai nillei cem tug hon Nani bidikon anyeng cem.

⁴Ade siceu nya ikiek kep inghim dip binang ba, indrat mpia bicut leu api imai hak ei Aho bei.

⁵Lewo anyeng tak kep yok noyam kin nikei di ningon gom. Ba, ambrap gau da tut ditde munhyet tu.

⁶Akes hukum ei ngkiai nya dip ba, abindei sar yo di isibut igkei nya cem tu. Ba, tungwatu nya ibbwe ser yok bihigom hak.

⁷Acok tut nyende siceu nya yahagom bingwig lene abindei sar ide minu ndig nya cem ba, hi dima yok ngon kep yo dima bu bi.

⁸TUHAN ninyeng tak kep tungwatu nya bijo ninno bijo kikau. Noni win Nide banggo mbrei mem gima bimbus tungwatu dihyeisi dini ingonti.

⁹Noni ba ningon gom binyeng tak kep ngkiai nya hak. Noni ba ningon di sren kei bimbus ingonti cem.

¹⁰TUHAN nok tring behei bicuon yo di ide siceu nya ico kep yok igyaisi. Noni ne mpia di mem yo di yuum mun di nggruk nya igya nding ri.

¹¹TUHAN e, yo di ikan tut Nani iba ingon com Nani lene akes yo di ikuk yok biNani ei bi.

¹²Jikwei ba, inggei sut TUHAN di ninyeng tak kep limwa nya ei Sion! Jipui sut nibon munti nya bak ngkiai nya yahagom!

¹³Lewo Noni yok ngon kep yo di yuum mun di nggruk nya. Noni gibbwe ser yok tirigi yahara Noni bi. Noro kes hukum ei yo di imbuk tut yok nya dip.

¹⁴TUHAN e, angat i! Ditde siceu nya ihwen bit da! Angondut da ba, ateu da bidingwes ngun leu nimai,

¹⁵leu binhyepo dinggei sut Nani ei timiei minu ndig Yerusalem yoho bei. Midimbos bidibiyai nillei lewo ateu da bidingwes ngun.

¹⁶Ngkiai nya di ikan tut Nani bi nya icut ug ei jui di yonti itig eiti ba, ico bon di yonti indin eiti bisrou yok.

¹⁷TUHAN ndo Nonti tug hon nikos tutti di sren-srau nya. Yo di isibut nya ibiam bon tug hon yonti ide nibon munti.

¹⁸Minu nimai nya ide ne nipekti mem yo di isibut nya kin ngkiai nya di ikou sut Allah ri.

¹⁹TUHAN mibbwe ser yo di yuhui mbum nya bihigom bi. Yo di yuum mun di nggruk ide niba ningon comti mipror leu yok kikau bi.

²⁰TUHAN e, akiju ba, agwam nok nikei mem ngkiai nya ba, asindui sut yok ba, yaham imbuk kep Nani au!

²¹TUHAN e, abibon yok ba, ittin bibor. Abiyai ingon huk niti leu binhyepo ikan tut bipia yoni ne tungwatu dihyeisi dini he ri.