Read Hatam MAZMUR 94 Bible Online

MAZMUR 94 - Hatam bible

MAZMUR 94

¹Allah e, Nani ne Allah di ba ningon sibuisi bibuhup bak yo di isibut nya ri. TUHAN e, ando angon sibuisi dima brei binye.

²Na di Nikei mem tungwatu dihyeisi dini hagom e, akiju ba, akes hukum ei yo di ingon jei nya dip sur yam kin ide nibon munti nya.

³TUHAN e, yo di isibut nya mingon nggei-hi-nggei bipek njap pig bu i? TUHAN e, igyai kep igyaisi dima ug bipek njap pig bu i?

⁴Yoni ingon jei sut ide nisibutti ba, inggei-nggwang tut ibon munti di kinei bibor nya apig bu i?

⁵TUHAN e, yo dima ico kep Ade limwa nya bihwen yo di ikuk yok biNa bindung.

⁶Igyai nimai bak kibom nya kin moibihi nya kin ngkiai nya di ikwei bong timiei ei minu dini cem.

⁷Isimbot dat “TUHAN ngat nyeni igyai kepti bi. Allah Yakub yok ngon kep mun dima cem bi.”

⁸Je di jingkek ndok e, ma jingon mbum nok au. Ma jibiyai hamem jikan-kan nyenti di kei ug e.

⁹Allah rino bibon nyeni itingou kin igyai a. Bit bon Noni miap ighyet bingat nye kan bi e?

¹⁰Noni rino ngginau ngkiai nya. Bit bon Noni kes hukum ei yok dip kan bi e? Noni ne guru mem yo dima yahagom ri. Bit bon Noni ningon dorti tut mun nyeng hagom kan bi e?

¹¹TUHAN kan bidem tut ingon kanti nya bikan bipia gima yok hagom mikui-kausi he.

¹²TUHAN e, yo di angginau yok tut Ade niggai serti nya ingon llei bibor.

¹³Abindei ba, ingon jo nyahan mpe di yuum mun di buhun kikau bibou atig jui mem yo di isibut nya ug e.

¹⁴Lewo TUHAN mikes Nide limwa nya ei bi. Noni ba nokep yok apino mirok yok ei nitta bi sren.

¹⁵Nikrau kep nikos tutti misindem tut nikei tirigi noni mbus tungwatu nya ingonti leu api yo di ingon sren nya yahagom miyahati tut noni.

¹⁶Tou rima mbrap gau da ei yo di isibut nya yoho bei i? Tou rino tti kin da bitte tut yo di ibon mun di kinei i?

¹⁷Gino TUHAN mpu da ser bi ne mbigom dipri hak leu mpia di yo di igyaijoti nya ide ug ei minu nimai nya ide ri.

¹⁸Mpe di dikan bipia dicut ug rin ne Na di TUHAN Ade ningon ngakei dati hati tut da.

¹⁹Mpe dino dingon kku da bidingon bos-bos nyen lene agwam ser dingon ba, abiyai ningon di nggei-hi-nggei bida.

²⁰Nani abicom yam bit nikei di isibut nya di iba ingha bak ningon sren-srausi bi.

²¹Yo dima ihwen yam ngon ba, ingon jo gom mem yo di ingon sren nya bikes hukum nimai ei yo di ingon ngun nya dip.

²²Noro TUHAN mbrap gau da ba, ditde Allah ne mpia di dinang coi ri.

²³Noni mikes hukum ei yo di isibut nya dip dem igbit ide nisibutti. Noni mibindei ba, ikimut yuhui hak drek dip ide sisar. Nyeni ide TUHAN Allah mibindei ba, ikimut yuhui hak ug.