Read Hatam NIPINGOK NINGONTI 10 Bible Online

NIPINGOK NINGONTI 10 - Hatam bible

NIPINGOK NINGONTI 10

¹Gini ne Salomo de nipingok tungwatu nyati ri. Munggwom di ningon ki bindei ba, nicig ninggei ngwig sut noni. Munggwom di ningon mbum bindei ba, nipmem ningon buhun.

²Ndigban di aba ningon canti bitug ndei leu api abiyai anyeng di jei sut ne mporo abiyai ningat di kei bi. Noro ningon srenti mibindei ba, angwes ngun drek dip.

³TUHAN misindui sut ba, no di ningon kwes kei mimai ninggum bi. Noro Noni mibigen ser no di sibut leu binhyepo tug ndei mun di joi sut bi.

⁴No di mbris micut ug ei nuhui mbumti. Noro no di joi bibor minyeng bibor.

⁵No di ningon ki yai njita ngat kui ig gudan bikwop nijam hagom. Noro no di bong kep ig mem nijam niyai njita ngat kui ig gudanti yai nimmai binonti.

⁶No di ningon kwes kei mitug ndei ningat di kei. No di sibut pai nihyet bitak kep nisibut biborti bijo nding.

⁷Tungwatu nya mikan kep yo di ingon kwes kei nya ide nibon munti nya ba, ibbwe ser yok bi. Noro ibbwe ser no di sibut haninyai hak.

⁸No di ningon ki sindui sut ba, hiter ipingok ningonti. No di ba ningon di mbum bimbrap misrawir.

⁹Yo di ingon gom nya ingwes ngun noro TUHAN ngat igbit no diris mun.

¹⁰No di ku mun di nijit leu nindigsi nya bindei ba, mun di buhun cut igkep yok. No di sok kep tungwatu nya brei bindei ba, ibong kei igwam kei.

¹¹Yo di ingon kwes kei imbrapti dem kep nok minyei bousi di biam tut niyaijoti. Noro no di sibut pai nihyet bitak kep ningon di kinei biborti.

¹² Nigga yamti bindei ba, ihwen yam. Ningon ngakei yamti ba niyai ngat nitunggweisi nya.

¹³No di nintin kimbo ba ningon kiti bimbrap. Noro suar imbas no di ningon mbum drek dip nimbrapti.

¹⁴No di ningon ki ta nibou ei nipikor ei mun nyeng hagomti. No di ningon mbum nimbrapti brim kep mun di kinei.

¹⁵Ninyeng tut ndigban ne mun di bicuon no di nyeng niyaisi ri. Ninyeng tut mun nyeng hi bi bibor bindei sar no di nuhui mbum.

¹⁶Ade nibon munti di kei nya bindei ba, abong kei agwam kei. Gino abon kep sisar lene mporo sisar ningat mang dor njiriek mintun him bu.

¹⁷No di ba nibou coi mem hiter di pingok ningonti bong kei gwam kei. No di kou sut hiter de nisok kep noti misrawir.

¹⁸No di ku nigga biborti ne no di ris kep mun igkei ri. No di ttei mumpui ei tungwatu nyati di bibon inyeng kinei ne ningon mbum.

¹⁹Nuhuk nihyetti bindei ba, sisar ntun him. No di ningon ki moom kep nidweb a.

²⁰No di ningon kwes kei nihyet dem kep nok perak di pimbai kei. Ningat di ntun no di sibut ningon kanti him nya bon ninyeng bi.

²¹No di ningon kwes kei nihyet noyam kin ningat di kei di njei bak yo di imang bibor. No di ningon mbum nide ningon mbumti biyai nimai bak nonti njem.

²²Tungwatu nya inyeng tut ndigban tug hon ningat di kei di TUHAN njei bak yoni. Bit bon nicom nahanggwap tut midyaisi bindei ningat di kei kum eisi bi.

²³Yo di ingon mbum nya iba yoho rok nibon kep nitunggweisi nya. Yo di intin kimbo ijoi sut inggok tut ningon kiti.

²⁴Yo di ingon sren itug ndei mun di ingat ingwes eisi lene yo di isibut itug ndei mun di ittin tut bibor.

²⁵Sigau cut bihwen tungwatu lene gima bindei ba, no di sibut sar. Noro no di ningon gom miya ngkiem bijo kikau.

²⁶Ma abingon mem gima ando midyai bak no di mbris au. Lewo noni mibindin-ndin nyen na drek dip. Nimbristi dima dem kep mun di bindei di akwai hyenha kin hum mmup di tot ayaisi.

²⁷Gino akuk na bak TUHAN ba, attin tut Noni lene ade njap jei bibor. Noro no di sibut mimai urung.

²⁸No di ningon sren ba ningon ya memti biyai ningon di nggei-hi-nggei di TUHAN preu ei mem noni. Bit bon no di sibut ba ningon ya memti biyai mun nyeng hi kan bi.

²⁹TUHAN ya srak ko hagau no di ningon sren. Noro bindei sar no di bon mun di kinei.

³⁰No di ningon sren mibong kei migwam kei. No di sibut mibong ser nide dihyei ninda rom bi.

³¹Nihyet ningon kiti tibim kwei leu no di ningon sren nuhui a. Noro TUHAN mitak kep no di mbuk nuhui ser bimbrap bi.

³²Yo di ingon sren ighyet mibiyai ningon di kei bak yo di imiap kep. Noro yo di isibut ighyet di tibim leu yuhui him biyai ningon di kinei bak yo di imiap nihyet nya.