Read Hatam NIPINGOK NINGONTI 12 Bible Online

NIPINGOK NINGONTI 12 - Hatam bible

NIPINGOK NINGONTI 12

¹Gino asindui sut ba, hi pingok angonti lene gima bindo bipia angon ngakei ningon kiti. Gino akou sut gi hi pingok angonti ne angon mbum.

²TUHAN ningon ngakei yo di ingon kwes kei nya. Noro Noni kes hukum ei yo di ikos tut ingon kanti mem gima ibon mun di kinei nya.

³Bit bon hi ya ngkiem tug hon nide mun di kinei di yai nya kan bi. Noro no di ningon sren miya ngkiem kei lene bingmai kan bi.

⁴Sop wak cam di singat kei bindei ba, nijjep kon ninyeng biyai ningon nggei-hi-nggei tug hon noni. Sop wak cam di yai nimmai bak nijjep ne dem kep nok ninggwenti di bindei mpiei nijjep ninjum a.

⁵No di ningon sren kan-kan nyen tut ningat di kei nya. Noro ma aba angon com no di sibut nipingok nati au.

⁶No di sibut nihyet biyai nimai bak hiter. Noro no di ningon sren nihyet biteu tungwatu ba, ingwes ngun.

⁷No di sibut micut bisar leu ba, hi mintun him noni bi sren. Noro no di ningon kwes kei miya ngkiem bijo kikau ug bipek nide nintun him yamti di bram yam nya.

⁸Tungwatu nya mikon bihi ninyeng bit leu nide nintin kimboti. Noro yoni ingwes om kep bihi bit leu ide ningon mbumti.

⁹Gino anok limwa he lo, aba midyai bitug ndei amuhup ne gima kei dor njiriek gima abon nanti nok pinjoi ndig lo, ayemti dem bi.

¹⁰No di ningon kwes kei nyohou nide mindhe-ndhe nimuhup tu di hyen kep nya. Noro no di sibut ne ba no yai mindhe di hyen kep nya.

¹¹Ayoi bou di ba nipap yai midyai miyai njita mang bibor. Noro no di ningon mbum bindei ba, nijam di bon nituti ngwig leu no ei mun di bon ninyeng biti.

¹²No di sibut ningon pri kep mun di yo di imbuk bibor nya inyeng tut. No di ningon kwes kei dem kep biei di ngat ningat di kei.

¹³No di sibut biam bon tug hon nihyet di kinei di tibim ei nuhui him. No di ningon kwes kei ningwes ngun leu mun di buhun di cut igkep nya.

¹⁴Bikwop tungwagom-gom tug ndei nimuhup bit leu nihyet di tibim ei nuhui him kin nide mun di bon nya. Bikwop tungwagom-gom tug ndei nimuhup di dem igbit niyai munti nya.

¹⁵No di ningon mbum kan bipia noni bon nitunggweisi hi bi sren. Noro no di ningon ki ngig nitingou mem yo di ipingok ningonti ighyet.

¹⁶Gino awaisi no di ningon mbum ne noni buhup kros bitri tut ningon sibuisi. Gino hi nihyet tigut no di ningon ki ne nihyet dima po leu noni.

¹⁷No di ningon kwes kei ba ningon gom pai sut mun di ngat bou niyai him noro niris kep mun cig ris ei tungwatu nyati.

¹⁸No di ba ningon di ko-ko wai bimbrap ne nihyet sibui hiter ningonti dem kep nok iba singau simeda bidat. Noro no di ba ningon di ki bimbrap ne nihyet di tibim ei nuhui him biyai ninghuisi di sindem bak hiter.

¹⁹Niris munti minggek urung noro nihyet di nijit jo ninno bijo kikau.

²⁰No di kos tut ningon kanti mem gima bon mun di kinei joi sut ningon di can. No di ta nibou ei niyai munti di kei nya ningon nggei-hi-nggei.

²¹Mun di buhun bibor cut igkep no di ningon kwes bi. Mun di cut igkep no di sibut ne mun di buhun bibor di jo kikau ri.

²²TUHAN ningon mpo tut niris kep mun cig nya noro ningon ngakei no di yai bipek kep nihyet nghwak him.

²³No di ningon ki tri tut nide nintin kimboti bi. Noro no di ningon mbum mbot kep ningon mbumti brei bingwig.

²⁴No di joi bibor miyai ninyeng jei. Nibong biei nda dipti mibindei ba, nok awak he.

²⁵Ningon ku no tut mun di micut igkep tungwagom mibindei ba, ningon dahat leu. Noro nihyet di nggriu kei bindei ba, ningon nggan-triot kei.

²⁶No di ningon kwes ningon nggei-hi-nggei dor njiriek yo di ninttig-tta nya. No di sibut srawir drek dip nibon mun di kineisi.

²⁷Niba nimbris biyai midyaisi bindei ba, yai bipek kep ningon kanti bi. Niyai midyai sindemti bindei ba, gino ba nahanggwap di mbilen biyai midyai ne nyeng tut mun nyeng nindig bibor.

²⁸Ningon srenti ne puig di bie ndam njap di jei bibor ri. No di kak puig di kinei ningat rima ndam nimai.