Read Hatam NIPINGOK NINGONTI 13 Bible Online

NIPINGOK NINGONTI 13 - Hatam bible

NIPINGOK NINGONTI 13

¹Munggwom di ningon ki yok ngon kep nicig-nipmem nya ide nipingok kep noti noro no di llei-lau om ser nitunggweisi nya.

²Yo di ingon kwes kei nya ighyet bindei ba, itug ndei ningat di kei noro yo di ingon sren bi nya ijoi sut mun di mbuk.

³No di ningon sok kep nonti tut mun di tibim ei nuhui him cuon niyaisi noro mun di buhun micut igkep no di mbrap ariwace.

⁴Mbro nok gino no di bong biei nda dip ningon pri kep mun nyeng hi lo, bit bon noni yai kan bi. No di nijoi bibor miyai mun di noni suar nya hagom.

⁵Yo di ingon gom nya ingon mpo tut niris ei tungwatu nyati noro nihyet di tibim ei yo di isibut nya yuhui him mpiei lene bindei ba, nindigsi nya immai sut.

⁶Yo di ingon kwes kei nya igwam coi ningon di sren keiti. Yo di ibon kep sisar iba ide mun di mbuk nya bindei sar yonti.

⁷Bihi ibon yonti tereu nok yo di inyeng noro ningat ne yuhui mbum. Bihi ibon yonti tereu nok yo di yuhui mbum noro ningat ne inyeng bibor.

⁸No di nyeng ningwes ngun leu yo di isibut nya indati tug hon nide mitiei noro yo di yuhui mbum nya ingwes ngun leu yo di isibut nya indati.

⁹Yo di ingon sren nya inok njeng mbrei di sieng kei. Yo di isibut nya inok njeng mbrei di mu leu su.

¹⁰Yo di illei-lau sut yonti ibindei ba, tungwatu nya isrep huk yam noro yo di ingon ki nya isindui sut ba, hiter ipingok ingonti.

¹¹Gino krop kei mem gima atug ndei mitiei ne jei bi mitiei dima mingwig leu na. Gino nggruk bibor mem gima atug ndei mitiei lene mitiei dima mikum eisi bu.

¹²Gino mun di ayok angon mem pek kep bi ne angon kiek tut. Gino mun dima pek kep tu ne angon nggei-hi-nggei.

¹³Gino akou sut TUHAN ningginau nati ne abindei ba, mun di buhun micut igkep na. Gino abit Allah nikos tutti nya ne amuhup mitau bina.

¹⁴Yo di ingon ki nya ide ningginausi noyam kin minyei bousi di biyam tut ningon nggei-hi-nggeisi. Tirigi hi srep huk na lene ningginausi dima mibindei ba, angwes ngun leu indati.

¹⁵Tungwatu nya inggei sut no di ningon ki noro no di bit bon tungwatu nya iba ingon com no kan bi ne niyaijoti kinei.

¹⁶Gino apmem miep angon tu ne akan-kan nyen tut midyai di ayai nipou tirigi akinyon eisi bigyo noro yo di ingon tindur nya itri tut ide midyai di igyai ugwai-gwai.

¹⁷Mun di buhun micut igkep no di sok nihyet ei no di ningon nddong bi dip noro no di sok nihyet ei no di ningon gom dip ningon mijo nyahan.

¹⁸No di ningon mpo tut ningginausi ne no di ningon mbum rin ba, tungwatu nya ingwes pri gau noni cem. Tungwatu nya minggei sut no di miap kep nisok kep noti.

¹⁹Angon nggei-hi-nggei gino mun di abungwam ndam mipek kep mem na! Yo di ingkek ndok nya ikou sut gi ikiek yok leu sisar.

²⁰Gino ahig asut bit yo di ingon ki nya lene jei bi nani cem angon ki. Gino ahig asut bit yo di ingkek ndok nya ne abindei ba, mun di buhun micut igkep na.

²¹Mun di buhun bibor jop bram yo di ibon kep sisar bidem imbutti nya noro yo di ingon sren nya ima mun di bindei ba, ingon nggei-hi-nggei.

²²No di ningon kwes kei mibindei ba, nignyon bat nya iba yokep nide ndigban noro yo di ingon sren nya iba yokep ndigban di yo di ibon sisar inju ei mem yonti.

²³Sus ngwakti di mahan ngat bon ningat mang bibor mem nuhui mbum nya noro niceu di ningon rom cuon ser ba, igijip sus dima bi.

²⁴Gino attem amunggwom drek dip nitunggweisi bi lene gima tereu nok angon ngakei noni bi. No di ningon ngakei nimunggwom mittem noni drek dip nitunggweisi nya.

²⁵Yo di ingon kwes kei nya igyem njita bindei yok noro yo di isibut nya ide njita dem mem yok bi.