Read Hatam NIPINGOK NINGONTI 15 Bible Online

NIPINGOK NINGONTI 15 - Hatam bible

NIPINGOK NINGONTI 15

¹Nibuhupti di nem-nnai bindei ba, no di gga bibor ningon cut hanyen. Noro nibuhupti di singga miep hum kin no di gga nide nigga biborti.

²No di ningon ki nihyet bindei ba, yo di hiter ijoi sut nintin kimboti noro yo di ingon mbum nya ighyet nok bu tan.

³Mun di pek kep bidem mpia ttou nsi hagom jo nibreisi bou TUHAN niyai him. Noni yok ngon kep niyai munti di kei kin gi kinei nya hagom.

⁴Nihyet di nem-nnai biwin kep tungwatu nya ingonti noro nihyet di singga bindei ba, ingon nghen.

⁵No di ningkek ndok ba ningha bak nicig nipingok noti noro no di ningon ki ningon llei sut nicig nisok kepti.

⁶Ndigban mijo binghig ei no di ningon kwes kei nide ig noro yo di ingon tindur nya ide ndigban mipror bingwig ei mpe dino mun di buhun cut igkep yok.

⁷Yo di ingon ki nya imbrap bibit leu ide nintin kimboti noro yo di ingkek ndok nya igimbrap nok gima kan bi.

⁸TUHAN joi sut yo di ingon kwes kei nya ide nadi noro ningon mpo tut midut di yo di isibut nya ibon ei nimbar hum dokti nya.

⁹TUHAN ningon mpo tut yo di yaham imbuk kep Noni igyai munti nya noro ningon ngakei yo di ibrim ingkek mem gima igyai igbit ningon kanti.

¹⁰No di bon mun di mbuk mitug ndei hukum. No di kou sut nisok kep noti mitug ndei nimai.

¹¹TUHAN kan bidem tut mun di jo ei minu nimai nya ide bitut mun di pek kep ei sirima. Gi nok ne notou tungwagom miku ningon kanti nding leu TUHAN niyai him i?

¹²Yo di illei-lau nya ikou sut nisok kep yoti. Yahara yo di ingon ki nya tut ide nipingokti bi.

¹³Yo di ingon llei bibor yuhumpo noro ningon buhun biborti bindei ba, iimaisi hai.

¹⁴Yo di ingon ki nya ibrim ingkek bibitug ndei nintin kimboti noro yo di ingon tindur nya ingon cut hon ide nintin kimbo bisi.

¹⁵Yo di indwau nya yahanggwap mbilen tut mun di isuar nya noro yo di ingon kei nya ingon ku yonti tut mun nyeng hi bi.

¹⁶Mbro nok gino ade ndigban gom-gom he lo, gino attin tut TUHAN lene gini kei bibor leu gima ade ndigban nindig bibor lo, angon bos-bos nyen tut.

¹⁷Gi kei rino ayem simeng he bit yo di ingon kwes kin yam leu gima ayem mikwau bit yo di iba nitok biyam a.

¹⁸Nigga haninyaisi bindei ba, niwaisi yamti ntun him noro noom ningonti bindei ba, ningon kwes kin yamti ntun him.

¹⁹Mun di buhun micut igkep no di mbris bikwop njap ngwa hagom noro micut igkep no di ningon gom bi.

²⁰Munggwom di ningon ki bindei ba, nicig-nipmem nya ingon llei bibor noro munggwom di ningon mbum ningwes pri gau nicig nipmem nya.

²¹Yo di ingkek ndok nya ingon llei sut ide ningon mbumti noro no di ningon ki ninda jo kep nide midyai di kwes kei nya.

²²Gino aba angon srip huk angon kanti nya bi ne angon kanti mipek kep bi. Gino nipingok kep ningonti cig nya imang bibor yo rinaha ne angon kanti mingat ningat di kei.

²³Nihyet di tibim ei nuhui him cut igbit nicunti mibindei ba, ingon llei bibor.

²⁴Yo di ingon ki nya ico kak puig di kui ndam niyaijo ba, imbres yo leu puig di juk ndam minu nimai nya ide.

²⁵TUHAN mibindei sar yo di illei-lau nya ide ig noro Noni miya srak ko hagau kibom nya ide dihyei ninda rom.

²⁶TUHAN ningon sibui sut yo di isibut ingon kanti di kinei nya noro joi yo di isingat ingon kanti di kei nya.

²⁷Gino aris mun ei tungwatu nyati leu binhyepo abipek mitiei ne gima mibindei ba, mun di buhun micut igkep ade ig bei nsi nya yahagom. Ma asindui sut ba, hi ngot kep na au. Leu api ade njap jei ei dihyeisi dini.

²⁸Yo di ingon kwes kei nya ikan-kan nyen nipou tirigi ibuhup ighyet bigyo noro yo di isibut nya iba ighyet di bindei ba, mun di buhun bibor srou yonti drek dip ibuhup haninyai.

²⁹TUHAN miap kep yo di ingon kwes kei nya ide nadi noro ba ningha bak yo di isibut nya ighyet.

³⁰Yo di yuhumpo ibindei ba, angon nggan. Nihyet di kei di itri tut bindei ba, tungwatu nya ingon nggan-triot.

³¹Gino angig atingou mem nisok kep nati ne angon ki.

³²No di kou sut nipingok ningonti bimangkrei nonti niyaisi. No di joi sut nisok kep noti ne bikum ei ningon kiti.

³³Nikuk nye bak TUHANti ne nitriti mem mun di ipikor eisi hagom ri. Suar aba abou coi mem tungwatu nya bibie ug e leu api yoni minggei sut na.