Read Hatam NIPINGOK NINGONTI 16 Bible Online

NIPINGOK NINGONTI 16 - Hatam bible

NIPINGOK NINGONTI 16

¹Tungwatu dihyeisi dini ikos dat ingon kanti nya noro Allah kos tut mun nyeng hagom bit leu Nonti ningon kanti.

²Tungwatu nya ikan bipia igyai munti nya hagom kei noro TUHAN binai sut mun di jo ingonti nya.

³Ambrap bit TUHAN tut angon kanti nya leu api Noni mibindei ba, hagom mingat ningat.

⁴TUHAN niyai kepti nya hagom muug bipek nipekti. Yo di isibut nya yuug dor nipekti dino nisar ningwigsi.

⁵TUHAN ningon sibui sut yo di illei-lau nya. Noni misindui sut ba, ingwes ngun leu hukum bi sren.

⁶Allah mikos ser ade sisar gino angon gom tut Noni. Noni micuon igyaisi leu binhyepo mun di kinei bibor cut igkep yok bi.

⁷Mpe dino ayai kepti nya bindei ba, TUHAN joi sut na lene Noni bindei ba, ade siceu nya ihig isut bit na.

⁸Nitug ndei nimuhup poi mienti tug hon ningon di gom bon ninyeng dor njiriek nitug ndei nimuhup nindig tug hon ningon mangti.

⁹Nyeni itin ei ingon kanti nya noro Allah kos tut puig di kei mem nye.

¹⁰Allah pingok nibou ndig ningonti tut nikos tutti nya. Gima rino noni tunggwei sut nikos tutti nya bi.

¹¹TUHAN joi sut nitri-nipek kep mun cig nya igyai munti nya di iba ningon srenti biyai mun bitut mun di ibinai cem ibakilo cem.

¹²Nibou ndig nya iba igyai ngat yo di isibut nya bi lewo ide ninyeng tak kepti jo ninghig tug hon ide limwa nya ide ningon srenti.

¹³Nibou ndig joi sut nide limwa di pai mingat bak. Ningon ngakei no di ba ningon di sren bitri tut nihyet.

¹⁴Nibou ndig nigga biborti noyam kin nikes hukum nimai ei tungwatu nya dip. Gima rino yo di ingon ki nya ibon mun di bindei ba, nibou ndig ningon jo nyahan.

¹⁵Nibou ndig ningon kwesti bindei ba, nide limwa nya ingon jo nyahan ba, noyam kin biget di but mem bed di biang mpia ngei.

¹⁶Ningon kiti kin nintin kimboti kei bibor kei dor njiriek niyai mas kin perak.

¹⁷No di ningon kwes kei mbres nonti leu mun di kinei nya. Noni cuon niyaisi tug hon gino sok kep nonti tut niyai munti nya.

¹⁸Ninggei-nggwangti bindei ba, nisarti ntun him. Nillei-lausi micut ninyeng jeisi.

¹⁹Gino yo di inyeng tut mun hi bi nya iba ibou coi mem yam ne gima kei bibor dor njiriek gi icoi bit yo di illei-lau bikwas mun di ipos leu tungwatu nya tut yam.

²⁰Ma ayok ngon kep mun di guru nya ingginau na tut leu api abitug ndei ningat di kei. Ma aba angon com TUHAN apino angon nggei-hi-nggei.

²¹Tungwatu nya ingat igbit no di ningon ki tug hon ningon di dor niti. Nihyet mmau di tibim ei nuhui him mitot tungwatu nya ingonti.

²²Ningon di ki rinok niyai munti di kei nibousi mem yo di ingon ki noro ide ningon mbumti mihwen bit yo di ingon mbum nya.

²³Yo di ingon ki nya ikan-kan nyen nipou tirigi yahap iji bigyo leu api mun di tibim ei yuhug him tot tungwatu nya ingonti.

²⁴Nihyet di nem-nnai dem kep ahwei lon ngei di nyop kei di bindei ba, ikei hanyen.

²⁵ Tungwatu dihyeisi dini ikak puig di ikan bipia sren kei noro puig dima mbut ug ei minu nimai nya ide.

²⁶Ninggum di nos tungwatu nya bindei ba, ita ibou ei ide midyaiti. Yoni iba ninggum di bindei yok ba, ibibrim ingkek bigyai miai.

²⁷Yo di isibut nya itindei ser nituti tirigi ibon mun di kinei bak nindigsi nya. Ighyet di tigut yok cig yok nok hum di cig-cai.

²⁸Yo di isibut nya ittei mumpui ei yamti lene gima bindei ba, yo di ihig isut bit yam iba nitok biyam bu.

²⁹Yo di imbuk iris mun bak isut bat nya bibie tut yok ug ei mun di buhun biborti.

³⁰Ma atindei ser no di humpo bikek niyai lewo noni kos dat mun di kinei ei ningonti tu.

³¹No di ningon sren nide njap ug ei ari bingwam mang bibor. Nibou nta di tiei ne topi mas di sieng-siau kei ri.

³²Noom ningonti kei bibor dor njiriek ninyeng jeisi. Gino aom kep angut kanti nya ne gima kei dor njiriek ninyeng tak kep minu ndigsi nya.

³³Tungwatu nya iko bibinggok tut leu binhyepo ibikan tut mun di mipek kep mem yok noro TUHAN mibuhup bit leu Nonti ningon kanti.