Read Hatam NIPINGOK NINGONTI 20 Bible Online

NIPINGOK NINGONTI 20 - Hatam bible

NIPINGOK NINGONTI 20

¹No di dut pes di pu no ningkek ndok lewo nidut pesti bindei ba, tungwatu nya iliriem yam ba, ibui yam drek dip.

²Nibou ndig di ningon sibui dem kep nok mindhe singa di nggiling. No di bindei ba, nibou ndig ningon mbuk tut noni noyam kin no di ya um nimaisi.

³Yo di iliriem yam yahagom ingkek ndok. Tungwatu nya minggei sut na gino aom angon ba, aba na kum yok bi.

⁴No di ninda jo kep nide midyai biyai miai dem igbit nituti bi miyai njita kwei leu beisi cem bi.

⁵Tungwatu nya ingon bei kanti nya noyam kin minyei bousi ei jui di jut bibor nijoua. No di nintin kimbo dem mem gima tau minyei dima kwei.

⁶Imang bibor ipai sut yonti bipia ingon gom tut isut bat nya. Noro nggruk bibor mem no di nggok tungwagom di ningon gom bihig nisut bit noni.

⁷Munggwom nya di ibon icig bat di igyai munti nya kei bibor kei di ingon gom ne ingon nggei-hi-nggei.

⁸Nibou ndig gwam nok nikei mem tungwatu nya bingat igbit ide mun di kinei nya hagom.

⁹Tou ridem mem gima pai sut nonti “Dingon kwes kei bidimbres danti leu sisar cem tu,” i?

¹⁰TUHAN ningon mpo tut nitri-nipek kep mun cig nya di ba ide nai kin kilo di igbit bi nya biris mun bak tungwatu nya.

¹¹Munggwom nya indo ide ningon kwes keisi kin ningon srenti tug hon igyai kepti nya.

¹²TUHAN pai tes tungwatu nya itingou mem gima ibimiap kep nihyet lene pai tes igyai njep mem gima ibingat.

¹³Gino abong mai kep anghuisi kikau lene jei bi ne ahui mbum ri. Gino anda jo kep midyai nya lene jei bi ne atug ndei njita nok gi dem.

¹⁴No di pek ndiyok lua sok nyen tut nibok di kak noro niabiati pek tu lene ningon llei sut mun di noni pek kin nibok dima tu.

¹⁵Nihyet mimun di tibim leu ningon kiti nibok kak bibor dor njiriek mas kin tig permata nibok.

¹⁶No di preu ei mem gima ya hon ningwam di nindigsi nya ibon ningon mbum bibor. Dem mem gima ipos mun di noni nyeng tut nya hagom bibet ei mem ibirop mun di noni preu ei dima.

¹⁷Mun di ayai tug hon ade niris mun bak tungwatu nyati tereu nok njita di ui-gwang kei ei nimbie him noro jei bi ne noyam kin tig njep ei ansi.

¹⁸Tirigi akos tut ndiyok ne ma asindui sut ba, hiter ipingok angonti tut. Gino akos dat angon kanti bidem kei mem gima anjei siceu bigyo ne ma akon pran au.

¹⁹Bit bon yo di ittei mumpui ei yamti iku mimun ei ingonti kan bi. Ma ambres nanti leu yo di ikibou bei mbrai nya.

²⁰Gino ahyet wer mpiahi tut acig bat-apmem bat nya ne ayaijo mingwig hon nohonti dem kep nok njeng mbrei di mu ba, piga digai nidinditi bu bi.

²¹Gino krop kei mem atug ndei mitiei ei nimbie him ne mitiei dima mibindei ba, angon nggei-hi-nggei bi ei nidipti bu.

²²Ma aba ambuk buhup mun di mbuk au. Noro ma aba angon com TUHAN lewo Noni midime kep munhyet dima nok gi igbit.

²³TUHAN ningon mpo tut nitri-nipek kep mun cig nya di ikrau kep ide nai kin kilo di igbit bi nya.

²⁴TUHAN Nongkom kos tut puig di dem mem tungwatu nya ikak mem nijam di igyaijo ei dihyeisi dini. Gima rino bit bon nyenti ingon dorti tut ide puig di ikak kan bi.

²⁵Ma akan-kan nyen nok gi dem nipou tirigi apigig sut mun nyeng hi ei mem gima abibon midut bak TUHAN bigyo. Mpaba anso nanti tut ei niabiati bu e?

²⁶Nibou ndig di ningon ki ngat igbit yo di isibut bibor nya leu api kes hukum ei yok dip. Noni kos ser ide nisibutti nya bi.

²⁷Ningon mien ne ninjeng di TUHAN pai tes ei mem gima piga digai ningon kanti nya hagom ri.

²⁸Gino nibou ndig ngondut limwa nya ba, ningon gom tut yok ba, ningon sren tut yok cem lene ninyeng mitak kep yok kikau ug bipek niyaijo ningwig honti.

²⁹Tungwatu nya inggap leu munggwom pilei nya tut ide nisindemti ba, inggei sut yo di iwer andig-ndau su nya tut ibou nta di tiei.

³⁰Mpe hi mun di buhun di cut igkep nye bindei ba, ittin ser ide sisar ba, ingon kwes kei hanyen bu.