Read Hatam NIPINGOK NINGONTI 21 Bible Online

NIPINGOK NINGONTI 21 - Hatam bible

NIPINGOK NINGONTI 21

¹Krop kei mem TUHAN pingok kep nibou ndig tut ningon kanti nya noyam kin gi pingok minyei ba, bong kak nimbang dem igbit ningon kanti.

²Tungwatu nya ikan bipia mpaba igyai munti nya kei ei yonti igyai him noro TUHAN rino binai sut ingon kanti nya.

³Ayai munti nya di igbit ba, sren kei cem kei bibor ei TUHAN niyai him dor njiriek midut di abon ei nimbar hum dokti bak Noni.

⁴Yo di isibut nya ide ninggei-nggwangti kin nillei-lausi pijuk ingonti bibindei ba, sisar ntun him.

⁵No di joi bibor nikos tut ningon kanti bindei ba, ngat ningat di kei ntun him noro yo di iba nibinang yai mun ne ingat ningat hi bi apino yuhui mbum drek dip.

⁶Ndigban di tungwatu nya itug ndei tug hon nisinati di igbit bi mipror yon bibuwak yok ug ei jui nimai nimbou huigya.

⁷Yo di isibut nya ikou sut gima igyai mun di igbit. Igyai munti di sibut nya micut igkep yonti bihwen bit yok.

⁸Yo di ingon mui nya ikak puig di dwei-dwei nyen noro yo di ingon ngun nya igyaijoti sren kei.

⁹No di bong binongkom ei ig ninten hu kwei ningon jo nyahan bibor dor njiriek no di bong ei ig gom bit nitnem di nihyet jo kwop kikau.

¹⁰Yo di isibut nya ita ibou ei igyai munti di sibut nya bikwop mmun-njap bingondut tungwatu nya bi.

¹¹Mpe dino nihyet wer mpiahi tut tungwatu cig tug ndei hukum ne yo di ingon mbum nya ingat gima bipingok ingonti tut bikan kep. Gino hi sok kep no di ningon ki lene ningon kiti kum eisi bu.

¹²Allah Di Ningon Sren Kei kan bidem tut yo di isibut igyai kepti nya ei ide ig nya. Noni mibindei ba, itug ndei hukum di buhun bibor.

¹³Gino angkek ndok tut nuhui mbum nya ne mpe dino nani ahara tungwatu nya lene hi mingondut nani bi.

¹⁴Munkwas di anjei bak no di ningon sibui sut na mibindei ba, ningon mikwes kin na hanyen.

¹⁵Tirigi nikei nikos tutti di igbit nya pek kep mem tungwatu nya lene yo di ingon kwes kei nya ingon llei bibor noro yo di isibut nya ingon buhun.

¹⁶No di te-te nyen leu puig di bie ndam ningon kiti muug krau minu nimai nya ide.

¹⁷No di ba noho rok ningut kanti nya kin anggur ngei kin njita ninyeng hagom minyeng tut ndigban kin mitiei bi sren.

¹⁸Tirigi TUHAN kes hukum ei tungwatu nya dip ne yo di ingon kwes kei nya ingwes ngun leu api nibuhunti cut igkep yo di isibut nya.

¹⁹No di bong binongkom ei iggum ndigsi ningon kei dor njiriek no di bong bit nitnem di nihyet jo kikau kwop.

²⁰Yo di ingon ki nya inyeng tut ndigban ba, ibong kei igwam kei noro yo di ingon tindur nya itri ide mitiei bingwig leu yok hammi tirigi itug ndei imuhup.

²¹Gino angon nggriu sut tungwatu nya ba, angon gom tut yok ne ade njap ug ei ari bingwam mang bibor ba, tungwatu nya minggei sut na bingon gom tut na.

²²Nibou tentara di ningon ki tut gi nggok puig mem gima kon pran bit nide siceu nya di mimbri kui ingkek ne dem mem gima bindei ba, ngug tig di iba ingon com dima nggek bingwig.

²³Gino abrim angkek ba, ambres nanti leu mun di srou tungwatu nya lene ma akibou bei mbrai au.

²⁴No di llei-lau ba, nggei-nggwang cem llei sut ba nihyet yai hiter cem ningkek ndok.

²⁵No di nghen di kou sut gi yai kep midyai nya ba ningut kanti nya biyai nimai binonti,

²⁶bikan-kan nyen tut ningut kanti nya bikwop njap ngwa hagom. Noro bon no di ningon sren kei kwas ndiyok tut tungwatu nya bingondut yok nindig bibor.

²⁷TUHAN ningon mpo tut midut di yo di isibut nya ibon bak Noni lo, ningon mpo bibor tut yok gino iba ingon kanti di kinei bibon midut dima.

²⁸Tungwatu nya ingon jo kep niris kep mun cig nihyet bi. Noro ingon jo kep no di nintin kimbo di kan bidem tut munhyet di noni ngat bou niyai him nihyet.

²⁹Yo di ingon sren nya ingon ngkiem noro yo di isibut nya ibitot hagau.

³⁰Tungwatu nya ide ningon tekti kin ide nintin kimboti kin ide ningon kiti jo binghig ei TUHAN Noho bei bi sren.

³¹Mbro nok gino kuda pran nya hagom dem mem gima tentara di ibri nya ibikon pran lo, TUHAN Nongkom bindei ba, ibindei timek ide siceu nya.