Read Hatam NIPINGOK NINGONTI 22 Bible Online

NIPINGOK NINGONTI 22 - Hatam bible

NIPINGOK NINGONTI 22

¹Ninyeng di kei nibok kak bibor dor njiriek ndigban nindig bibor. Gino tungwatu nya ijoi sut na lene gima kei njiriek gi injei perak kin mas bak nani.

²No di nyeng kin no di nuhui mbum yahacem ima mun nyeng gom di bindei ba, inoyam. Gima ne TUHAN di pai tes yahacem ri.

³Gino yo di ipmem bat nya imiep ingon tu nya itau kep mun di nahanok micut igkep yok ne imbres yonti leu noro bon yo di ingon mbum nya yoom yonti leu kan bi apino itug midut.

⁴Tungwatu nya inggei sut yo di iba ibou coi mem yam bikuk yo bak TUHAN. Yo dima inyeng tut ndigban leu api ide njap ug ei ari bingwam mang bibor.

⁵Gino ajoi sut acuon ayaisi lene ma ambres nanti leu ndep jui kin bon di jo sir yo di iris mun igkei nya imbutti.

⁶Ma jipingok jimunggwom bat nya ingonti tut igyai munti di singat kei nya leu api yoni migyok ngon kep nipingokti dima ei mpe di yuug krau indig-ndausi.

⁷No di nyeng tut ndigban ninyeng tak kep no di nuhui mbum. Gino hiter dahat ningwam leu nani ne anyeng tak kep noni.

⁸No di ndim ningan di bindei ba, niris kep tungwatu nyati hei ei hiter ningonti mitug ndei mun di buhun di cut igkep noni lene gima bindei ba, nisindemti mem gima ndim ningan pima pror hak leu noni drek dip.

⁹TUHAN njei ningat di kei bak no di ngondut hiter drek dip gi po kwas nide ningat di kei tut no di nimati dem bi pima.

¹⁰Ma jijji no di ba nihyet bicig hiter leu jikieti apino nisrep huk yamti kin niba nitok biyamti kin nipai yam kineisi ntus.

¹¹Nibou ndig mijem nisut bit no di biyai hamem ningon gomti kin nihyet mmau keisi.

¹²TUHAN nyohou yo di ipmem bat nya imiep ingon tu yahagom noro nggek tut niris kep mun cig nya ide ningon mangti.

¹³No di mbris nok nimai ngak kep ig lewo kan “Mindhe singa no lus-lus nyen ei nisai ma kwei ba, mittem sa ug ri.”

¹⁴Sop di nikrar jut nihyet di bihwen pinai ingonti dem kep bon. No di TUHAN gga no bibor misrei ei bon dimati bisrou noni.

¹⁵Munggwom nya ibon kep mun ningon mbum de ngan-ngan bijo. Noro iba biap tindak bingginau yok bibijji igyai kepti leu yok.

¹⁶No di ba noho rok ninyeng tut ndigban tug hon gi co kep nuhui mbum nya ba, njei munkwas bak yo di inyeng ne wer nikinei-kinau drek dip.

¹⁷Amiap e, midingginau na tut yo di ingon ki nya ingginausi! Ma angig atingou mem ditde ningginausi nya.

¹⁸Gino apwoi ditde ningginausi nya ei angonti ba, andat kep igbit lene angon kei.

¹⁹Dijoi sut gino aba angon com TUHAN. Gima rino nogindini midingginau na tut nipingok nati nya.

²⁰Dipas kep yo di ingon ki nya ide nipingokti ningot ningai mem na. Bon nipingokti dini biyai angon ba, angon ki ba, antin kimbo cem,

²¹lene bingginau na tut mun di nijit-jau hak. Gino yo di hiter ihig ser na tut lene bon abuhup ighyet igbit.

²²Ma ayem nuhui mbum nya imuhup tut gi iwer yok nikinei-kinau ba, asrep huk nuhwap mbum di imbrap gau yonti nya ighyet nghwak him tirigi igya ei nikei noho bei au.

²³Lewo TUHAN mimbrap gau yok tut ide munhyet bikus yo di isrep huk yok innei leu.

²⁴Ma jinggre kin no di gga igkei di ningon kui haninyai au.

²⁵Leu ma ayai bram niyaisi ba, bit bon akes hon nibon kepti dima hanyen kan bi.

²⁶Ma apreu ei mem tungwa hi tut gima aya hon nide ningwam di dahat ei su au.

²⁷Leu hi rima andei nigo ningwam dima bi lene niceu mipos ade mun di anyeng tut nya hagom bitut bilen di abongti cem leu na.

²⁸Harin dima ason-son nyen hanjop kwas yamti di adigup bat-adigai bat nya ipek tu jit-jau a.

²⁹Angat no di ba nijoi bibor biyai midyai ei ayai him tu e? Nibou ndig miba no dima biyai midyai ei nide ig. Noni minok awak mem no di bon ninyeng bi he bi sren.