Read Hatam NIPINGOK NINGONTI 23 Bible Online

NIPINGOK NINGONTI 23 - Hatam bible

NIPINGOK NINGONTI 23

¹Gino agwam bit no di ninyeng jei ba, ayem njita bit lene ma angon sok kep nanti tut njita di jo ei aho bei dima[3] mungkun kei.

²Gino angon kui kep niyem njita dima lene ma aom kep angon kuisi dima hak ug.

³Ma angon pri kep njita di mmau di noni ngei di jo ei aho bei au. Leu hi rima noni bingon mem gima ba njita dima bisrou na.

⁴Ma abou ngwak sibui sut gi anyeng tut ndigban kin mitiei au. Ma akes hon angon kanti dima hak ug.

⁵Lewo bon mun di anyeng tut dima hagom ngwig kros leu na dem kep nok mun di ninyehei ntun him ba, nok hacam krubri di mba ug ei mpia-bbed him bihigom cem.

⁶Ma ayem njita bit no di drui bou ngwak ba, angon pri kep njita ninyeng hagom di noni ngei au.

⁷Lewo tirigi ayem kep njita lene noni ba ningon can bipai bina “Ayem njita hak ug ba, ayai hi kin bu.” Noro kos dat ningon kanti tut njita nimangti di noni sindui sut ba, ayem.

⁸Jei bi lene anjim tut njita di apinde tu leu api ade ninggei sut no tut njita di ngeisi dima hagom mikui-kausi he.

⁹Ma abingon mem gima angginau no di ningkek ndok au. Lewo noni miba nihyet bicig na drek dip.

¹⁰Harin dima ason-son nyen hanjop niya kwas yamti di adigup bat-adigai bat nya ipek tu jit-jau a. Ma apos mpia ttou nsi di moibihi nya inyeng tut leu yok au.

¹¹Lewo TUHAN di sindem bibor mimbrap gau yok ba, tte tut na ei nikei noho bei.

¹²Ma angig atingou mem ade guru ningginausi leu binhyepo apikor tut mun nyeng mang bibor.

¹³Ma ahig angon ei ade nisok kep amunggwomti au. Mbro nok gino aba biap tindak bimbas noni lo, mimai sut bi,

¹⁴noro mibindei ba, ningwes ngun leu nimai urungti.

¹⁵Dimunggwom na e, gino ayai angon di ki ne dingon llei bibor drek dip.

¹⁶Mpe dino dimiap ahyet di tibim tut mun di igbit ne midinggei sut na.

¹⁷Ma angon kinei sut yo di ibon sisar nya au. Noro ata abou ei nikuk na bak Allahti,

¹⁸leu binhyepo nijam di abong kei agwam kei di ayok angon mem mipror hanyen leu na kan bi.

¹⁹Dimunggwom na e, ma antu kep dihyet! Abiyai hamem angon di kiti. Anyohou sok kep nanti tut ayai kepti nya.

²⁰Ma anggre kin yo di ikimam anggur ngei kin njita ninyeng hagomti au.

²¹Lewo yo dima mitug ndei nuhui mbumti. Gino ayem njita ba, abong kep anghuisi he bijo kikau lene jei bi ne ajuk sinsun di rik-ta ug ri.

²²Ma abit acig nihyet. Leu gino abon acig bi lene bit bon nani cem angat rin bi. Gino apmem wer sindig-ndau lene ma abon mun di bindo bipia angon ngakei noni.

²³Ma acom ahanggwap ba, abipek ningginausi di nijit-jau kin ningon kiti kin nintin kimboti kin ningon dor nititi hagom. Ma atri hanyen bu au. Lewo hagom bon ninyeng bibor.

²⁴No di bon nimunggwom di singat ne ningon llei bibor. Noni nggei sut nimunggwom di ningon ki.

²⁵Ma asindui sut ba, acig-apmem nya ingon llei drek dip na. Ma asindui sut ba, apmem ningon nggei-hi-nggei drek dip nisrek tut nati.

²⁶Dimunggwom na e, atou kep diyai munti nya leu binhyepo hagom nok bindo di kei bibor mem na!

²⁷Sop di ibou sibui kin sop di ikrar jut nya noyam kin ndep juigya.

²⁸Yoni icem kep puig ser akweisi nok ninggimang kep mun cig nya lene gima bindei ba, pinai nya imang bibor icut tut yok.

²⁹Tou ritug ndei mun di buhun i? Tou rininghuisi wei i? Tou ribui tungwatu nya i? Tou rino hara sok i? Tou riyai ningkek mos kei mikui-kausi i? Tou riniyai nggrom i?

³⁰No dima ne no di dut anggur ningei nindig bibor kin no di pinde pes ninyeng hi gom-hi gom di ibisrig yamti nya ri.

³¹Mbro nok gino angat anggur ningei di ngwoi kei ba, pimbai kei cem ei mokti lo, ma asindui sut ba, ningei dima brim angon au.

³²Lewo njap di hyep bu ne adem kep nok no di wou piet ham.

³³Mporo amung nang ayaiti ba, abou ngwak sibui cem ahui buwei cem.

³⁴Akan bipia agwam kibar minyei nidihim dip nig-nai ei muk ningwa dip leu api abou ngwak sibui ba, atti-tti nyen ba, angon him wei.

³⁵Lene akan “Tungwatu nya ibui sa ba, ittem sa noro sikan tut mun dima nicut igkep sati bi. Ayo! Siyai nggrop buhun! Suar sidut pes hi kin bu!”