Read Hatam NIPINGOK NINGONTI 25 Bible Online

NIPINGOK NINGONTI 25 - Hatam bible

NIPINGOK NINGONTI 25

¹Gi bram bu dini ne Salomo de nipingokti poi di sekertaris di igyai midyai ei Hizkia di nibou ndig ei Yehuda ninyeng tak kepti de kintrorti ipas kep ri.

²Tungwatu nya ikon Allah ninyeng drek dip Nide niyai munti di yai niku nya ba, ibou cut bak nibou ndig drek dip mun di noni pai brei binye.

³Dem tut gima ingon huk niti tut mun di jo ei nibou ndig ningonti bi. Lewo ningonti noyam kin muk ndigsi di jut bibor kin mpia-bbed him di jo anai.

⁴Gino ibindei pwoi perak ei komfor di ibindei perak jep oi eisi nipou ug e leu api bon tukan perak bibon mun di dia-diau kei bou ninda him.

⁵Adidei nipingok kep ningonti cig di ikinei-kinau nya leu nibou ndig leu api ninyeng tak kep limwa nyati nddong kei tug hon nikos tutti di sren kei nya.

⁶ Gino aya ei nibou ndig noho bei lene ma aba abou coi mem noni. Ma abon nanti nok no di ninyeng jei ei noho bei au.

⁷Gino hi cigit na ba, akui ug ei mpia di noni bet ei mem no di ninyeng jei lene gima kei bibor dor njiriek gima hi cuk na ba, akes mpia di agwamti bak no di ninyeng jei njiriek na.

⁸Ma angon sror tut munhyet ba, attei ug ei nikei noho bei au. Leu gino niabiati jo nibreisi bipia nani rino atunggwei sut lene mindei rima abon bu i?

⁹Gino akiowi ei asutti lene ma aco kep mun dima nyahan bit no dima he. Ma ambot kep hiter de mimun ei nibreisi au.

¹⁰Gi bi lene yahagom mikan tut bipia nani ne no di ninsi bet ri. Lene anyeng di kinei mijo ninghig niker mem ade njap nijeisi.

¹¹Nihyet di tot tungwatu ingonti di ipai sut di cut igbit nituti noyam kin mimau mas di tukan cim ei den njita nindig di iba perak bibon nikiou.

¹²Nisok kepti di no di ningon ki bipingok hiter di nitingou dile ningonti nibok kak bibor dor njiriek srak kin miep di iba mas di pimbai kei bibon.

¹³Awak di ningon gom di niceu sok nihyet ei no dip bindei ba, niceu ningon nggan-triot tereu nok minyei hou di no di ayoi bou dut kep ninggobiausi.

¹⁴No di ningon ngkwei leu nide nipreu ei mem hiterti dem kep nok bumbuhui kin hou di biang biget kwei bi.

¹⁵Noom ningon bimbrap nyahanti mitot nibou ndig ningonti bibindei ba, yo di itte tut nya ighyet micut hanyen ei ingonti.

¹⁶Ma ayem ahwei lon ngei nindig bibor au. Leu gima bindei ba, angon him wei.

¹⁷Ma amig buwei kep no di anttig-tta kwop au. Leu noni minghen tut na leu api jei bi lene ningon mpo tut na.

¹⁸Niris mun ei hiterti noyam kin simeda kin apak kin singau tibor di abiyai nimai bak hiter.

¹⁹Gino aba angon com no di ningon can ei mpe dino mun di buhun cut igkep na lene gima noyam kin no di ba nikwai di llor biyem njita kin no di ba nimig di lit bimbut.

²⁰No di pai doia bak no di ningon ngguk ne dem kep nok no di cug sinsun leu noni mem bed di biang hou kin no di ba mun di hyenha bidip cem.

²¹ Gino ade siceu nggum lene ma akwas njita hi tut noni. Gino noni nggobiau lene ma atin kau tut minyei bak bidut.

²²Tug hon nisinati dima lene abindei ba, noni mmai sut nonti leu api Allah miba munkwas di kei bibirop hanyen bina cem.

²³Yo di ittei mumpui ei yamti ibindei ba, tungwatu nya ingon sibui sut yam. Lene gima noyam kin hou di cut kwei leu mpia nijjai di biang biget kwei.

²⁴No di bong binongkom ei ig ninjek dip hu kwei ningon jo nyahan bibor dor njiriek no di bong ei ig bei gom bit nitnem di nihyet jo kikau kwop.

²⁵Nimiap kep nihyet di kei di isok kwei leu minu ting biborti noyam kin nidut minyei hou kep ninggobiausi.

²⁶No di singat kei di cut bak no di sibut bice tut ningon kanti rinoyam kin minyei bousi di nghet kin bak di mumpiang joti.

²⁷Niyem ahwei lon ngei di nindig bibor mipijuk ansi ba, anggwen. Niyok ningon mem gima tungwatu nya inggei sut nati cem kei mem bi.

²⁸Gino bit bon aom kep ade nigga-gga waisi kan bi lene gima noyam kin ngug tig di bikrop ttai minu ndig gom di lus tu.