Read Hatam NIPINGOK NINGONTI 26 Bible Online

NIPINGOK NINGONTI 26 - Hatam bible

NIPINGOK NINGONTI 26

¹Ninggei sut no di ningon tindur kei mem bi ba, noyam kin biget es di but mem bed di biang mpia ngei kin mpia di but mem nijam nike gandum kwei leu beisi.

²Nisigion nya mipo leu no di bon mun di tunggwei hi bi dem kep nok ha cincau di ko-ko nyen lo, teu ei biei nda dip bi sren.

³Suar tungwatu nya iba ngkimom nitu kin bang bikri kep keledai nuhwap jou lene iba na mbrei ngkek bimbas kuda. Nok gima cem suar imbas no di ningkek ndok.

⁴Yo di ibuhup no di ningon mbum ningon kiowi eisi nya ingon mbum noyam kin noni.

⁵Suar aba abuhupti di mbum bibuhup no di ningon mbum nihyet leu binhyepo mbro nok gino noni kan bipia ningon ki lo, mikan tut bipia ningon ki haigtu bi.

⁶Gino asok ahyet ei no di ningon mbum dip lene gima noyam kin gino arop amig leu ba, acom. Tug hon nisinati dima ne aya um mun di buhun di micut igkep na cem.

⁷No di ningon mbum di simbot dat nihyet nibiti nindati rinoyam kin no di ba nimig di hom biya-ya nyen.

⁸Ninggei sut no di ningkek ndokti noyam kin no di ngot tig njep bingkiem ei bikumsikikti.

⁹No di ningon mbum di simbot dat nihyet nibiti nindati noyam kin no di bingon mem gima tiba mun mup leu ninda tirigi pes pu noni.

¹⁰No di ndo midyai bak no di ningon mbum kin no di ya ser cem bindei ba, mun di buhun micut igkep tungwatu nindigsi nya drek dip.

¹¹ No di ningon mbum di yai-yai nyen niyai kepti di bon ariwace rinoyam kin nsien di ngkwei bipiei ninjim hanyen.

¹²No di ningon mbum bibor kei njiriek no di pai sut nonti nok no di ningon ki noro ningon ki bi.

¹³No di nghen bibor dem kep nok nimai ngak kep igya. Noni kan “Mindhe singa lus-lus nyen ei nisai ma kwei ba, mittem sa ug.”

¹⁴No di nghen bibor sibui no nyen ei nibongti noyam kin dimbou di sibui-sibui nyen ei nidihim dip.

¹⁵Tungwatu nya ibou poi inghen bikou sut niket njita ug ei insi.

¹⁶No di nghen kan bipia ningon ki nindig dor njiriek ibou muhwindacan di ibuhup igbit.

¹⁷No di ba no kum yo di iliriem yam drek dip munhyet di srou noni bi rinoyam kin no di krau nsien di niten-pos nitingou meng.

¹⁸No di bbwe-bwau di ba minggwen di nggwen-gwau bikek noyam kin niris kep mun cig di pai bitak kep nihyet “Dwai! Dicat eisi he.”

²⁰Gino biei hum jep tu ne hum mu. Gino no di ttei mumpui nyen mbut leu lene nindigsi nya ikes hon ba, ighyet srou kui yam bu bi.

²¹Biei hum kin hum mbom bindei ba, hum njeng kikau. Nok gima cem tut no di liriem hiter tug hon nihyet di ket hum ei tungwatu ingonti.

²²Nittei mumpui ei yamti noyam kin mikwau di ngge kei ba, tungwatu nya illei sut gi ipinde.

²³No di nihyet mmau lo, ningon mbuk rinoyam kin dibijig igtuyap di iba perak binggai kep bei nisai.

²⁴No di ningon mang ba ninsi di mmau biris tungwatu nya noro ku ningon di koi kep yok bijo nding.

²⁵Mbro nok gino no dima hig nisut bit na lo, ma aba angon com noni au. Lewo nigga biborti mpung ei ningonti tu.

²⁶Mbro nok gino no dima ku nide nigga biborti bijo nding lo, nindigsi nya yahagom mingat niyai munti di kinei nya.

²⁷No di tig ndep jui bitindei ser hiter bicut eisi lene nonti mibiam ndep jui dima yo. No di bisinggre ba, bei tig ndig di nahanok mitot hiter lene tig ndig dima mitot nonti.

²⁸Niris mun ei hiterti rinoyam kin gi ningon mpo tut noni. Ma atindei ser no di nihyet mmau lewo noni tin ei mem gima hwen na cem ri.