Read Hatam NIPINGOK NINGONTI 27 Bible Online

NIPINGOK NINGONTI 27 - Hatam bible

NIPINGOK NINGONTI 27

¹ Ma arai pri tut mun di mipek kep mem na mem njap di hyep au. Lewo akan tut mun di micut igkep na hak mem njap di hyep bi.

²Ma anggei sut nanti au. Noro ma asindui sut ba, asut bat nya kin yo di nindigsi nya rima inggei sut na.

³Tig kin iggum wer buhun haigtu bi gino ibinai kin ningon di buhun di cut igkep tungwatu nya tug hon no di ningon mbum nihyet.

⁴Ningon di nggrom kep hiter ne sisar rin binggek tut noro tou rahau mem hiter di ningon kinei sut noni i?

⁵Gino apingok asut ningonti hak ei noho bei ne gima kei bibor dor njiriek gino angon ngakei noni niku ba, noni kan tut bi.

⁶Asut di angon kieti ba ningon gom tut na mibui na noro ade siceu ninggriou nati noyam kin wou piet nahamti.

⁷No di yem njita bindei no tu kou sut ahwei lon ngei. Noro no di ninggum hwen noni joi sut yem njita di mpo-mpam binok mun di nyop kei ei ninsi.

⁸No di mbut minu ting leu nitimieisi rinoyam kin ha di dimba minu ting leu nibasa.

⁹Mini mbris kin mini di ui-gwang kei di bindei ba, tungwagom yai nillei lene gima noyam kin asut di ningon gom di biwin kep angonti.

¹⁰Ma angon hou ser asut bat nya kin acig nisut bat nya au. Gino mun di buhun cut igkep na lene ma ahara ade bat hi kwei mpu na au. Yo di anttig-tta di ibong dideu na idem mem gima impu na nindig bibor dor njiriek ade bat di ibong minu ting bibor leu na.

¹¹Dimunggwom na e, gino ayai ningon kiti lene dingon llei bibor ba, dibuhup yo di iba ighyet yai da kan.

¹²Gino yo di ipmem bat nya imiep ingon tu nya itau kep mun di nahanok micut igkep yok lene imbres yonti leu noro bon yo di ingon mbum nya yoom yonti leu kan bi apino itug midut.

¹³No di preu ei mem gima ya hon ningwam di yo di hiter ibon ningon mbum bibor. Dem mem gima ipos mun di noni nyeng tut nya hagom bibet ei mem ibirop mun di noni preu ei dima.

¹⁴No di ba nihyet nindig biwin nisut di bong mai mem ha yausi rinoyam kin no di sigion noni.

¹⁵Sop di nihyet jo kikau kep nijjep ninyen noyam kin yop di diem-diem nyen.

¹⁶Bit bon nijjep kimut ninda kep noni kan bi. Tou ridem mem gima pai ser hou ba, cut bi i? Tou riket mini ninggop gom leu yengti kan i?

¹⁷Tukan nya iba ngkimom nitu bitug ngkimom nitu. Nok gima cem tungwatu nya ipikor tut igyai kepti nya leu yam.

¹⁸Tungwa tou rino nyohou biei ninjem mipuk ningat biyem. Awak tou rino nyohou niceu lene ningon nggei-hi-nggei mpe dino niceu nggei sut noni i.

¹⁹Dem kep nok angat angwes ei minyei ngwa dip lene nok gima cem gino nanti ambrap tut angon kanti kin ayai munti nya ne akan tut mun di jo ei angon mienti.

²⁰Minu nimai nya ide bon ningwakti mem nimai hi kin bu bijo ninno. Nok gima cem tungwatu nya ingut kanti nya ug hon nohonti bi.

²¹Tukan nya iba hum bibingon mas kin perak nitu noro tungwatu nya mingat mun di jo ei tungwagom ningonti brei ei mpe dino nindigsi nya inggei sut noni.

²²Mbro nok gino jibui no di ningon mbum bimos kei lo, ningon mbum kikau bipren hanyen leu noni bi sren.

²³Ma anyohou hyen kep ade domba kin sapi nya nok gi kei.

²⁴Lewo ndigban di tungwatu nya inyeng tut nya jo binghig bi ba, noyam kin nibou ndig nide ninyeng tak kep limwati di jo ninno bijo kikau bi.

²⁵Akos kep gandum nintam kin mbrui ut kwei leu beisi ba, abinyohou ade mindhe nya lo, jei bi ne nikioi nya hei hanyen kep beisi bu.

²⁶Aba ade domba ninta bibien sinsun mem nanti. Lene aba ade kambir ningut poi di atri ba, abipek mitiei leu api aba mitiei dima bipek dihyei ninda rom hi kin bu.

²⁷Leu api nani kin ade ig bei nsi nya kin ade awak nya jahagom mijidut kambir di nindigsi ido ngei kep jinggumti.