Read Hatam NIPINGOK NINGONTI 28 Bible Online

NIPINGOK NINGONTI 28 - Hatam bible

NIPINGOK NINGONTI 28

¹Mbro nok gino hi huk bram no di sibut bi lo, noni nang ug. Noro mimbri kui no di ningon gom ningkek dem kep nok mindhe singa.

²Gino mben hi ibon kep mun di mbuk bibor ne ide nibou ndig nya igya luei yam hoti kikau. Noro gino nibou ndig gom ningon ki ne ninyeng tak kep limwa nyati sindem bibor ba, jo ninno cem.

³No di ninyeng jei di hwen bit nuhui mbum nya noyam kin biget di mbras bibindei ba, njita beisi hagom kinei bibor.

⁴No di ningkek ndok tut nikei de nikos tutti nya noyam kin no di tti kin yo di isibut nya. No di bit nikei de nikos tutti nya tte tut yo di isibut nya.

⁵Yo di isibut nya ingon dorti tut nikei de nikos tutti di sren kei nya bi noro yo di ikuk yok bak TUHAN ingon dor niti tut.

⁶No di nuhui mbum di ningon gom kei bibor kei dor njiriek no di nyeng di ris mun ei tungwatu nyati.

⁷Pinjoi pilei nya di ibit nikei de nikos tutti nya ingon ki noro pinjoi pilei nya di ihig isut bit nikinei-kinau nya ibindei ba, icig-ipmem nya immai sut yok.

⁸No di nyeng tut mitiei nindig bibor tug hon gino kak tut tungwatu nya ba, suar ikum ei mitiei nibitug nindig biborti lene no di ngondut nuhui mbum nya miba nokep no dima nide mitiei hagom.

⁹Gino abit Allah nicukti bi ne ningon him wei sut nadi di tibim ei ahui him.

¹⁰Gino abisinggre ba, ahwen no di ningon gom ningon bibon mun di mbuk ne ma abiam bon di andin mem noni. Yo di ingon kwes kei nya mibong kei migwam kei.

¹¹No di nyeng kan bikwop njap ngwa hagom bipia ningon ki noro no di nuhui mbum di ningon dorti kan tut mun di nijit di jo ei no dima ningon bei a.

¹²Gino no di singat kei ya luei nibou ndig nohoti ne limwa nya imbos-hi-mbos noro gino no di sibut ya luei nibou ndig nohoti ne limwa nya iku yonti nyahan.

¹³Tungwa tou rino ku nide sisar ei ningonti mibong kei migwam kei bi sren. Tungwa tou rino pai jit nide sisar bittin ser nide sisar mibindei ba, TUHAN ningon nggriu sut noni.

¹⁴Ma akuk na bak TUHAN ba, abit nihyet kikau api angon minggei-hi-nggei. Gino angkek ndok tut TUHAN ne atug ndei mun di buhun bibor.

¹⁵No di sibut di ninyeng tak kep limwa di indwau sut imati nya dima noyam kin mindhe singa di yau-yau nyen kin mindhe beruang di lus-lus nyen.

¹⁶Nibou ndig di hwen bit nide limwa nya nintin kiek. Nibou ndig di ningon mpo tut sisar ninyeng mitak kep bijo ninno.

¹⁷No di ningon mui di ningon huk niti tut nihwen munti mporo nang kikau ba, ug bipek niyaijo ningwig honti bicoi jui kep. Ba, hi di bigen ser ninangti dima kan bi.

¹⁸No di ningon kwes ningwes ngun leu mun di cut igkep noni. Niris kep mun cig micut kros.

¹⁹Ayoi bou miyem njita nyeng hagom. No di bimangkrei nituti nuhui mbum.

²⁰TUHAN mibindei ba, no di ningon gom ningon nggei-hi-nggei noro no di bipbur ba, nibou ngwak sibui sut gi nyeng tut ndigban kin mitiei ningwes ngun leu hukum bi.

²¹Gino hi mbus nggok tungwatu ne gima kei mem bi. Noro nikei nya ibou poi isindui sut hi ba mitiei bingot kep yok bibindei ba, ikos tutti nya sren kei bi.

²²No di drui bou ngwak bipbur ba, nibou ngwak sibui sut gi nyeng tut ndigban kin mitiei. Noni kan tut nuhui mbumti di jei bi micut igkep noni kros bi.

²³No di pingok hiter ningonti bon ninyeng dor njiriek no di ba nihyet mmau biris noni.

²⁴No di ninda ngwa-ngwa wai kep mun di nicig-nipmem nya inyeng tut nya bikan bipia sisar ntun him bi noyam kin ninggimang kep mun cig.

²⁵No di drui bou ngwak hek tut nonti niyaisi he mibindei ba, niwaisi yamti ntun him. Gino aba angon com TUHAN ne abong kei agwam kei.

²⁶No di ba ningon com nonti ningon kanti nya nintin kiek. No di bit yo di ingon ki nya ide nipingokti nya miningwes ngun leu mun di buhun.

²⁷No di ngondut nuhui mbum nya nuhui mbum bi sren. Noro tungwatu nya mirom ighyet kui na gino angkek ndok tut nuhui mbum nya.

²⁸Gino no di sibut ya luei nibou ndig nohoti ne limwa nya miku yonti nyahan. Noro tirigi no di sibut dima mai su ne nibou ndig di ningon sren miya luei nohoti bu.