Read Hatam NIPINGOK NINGONTI 29 Bible Online

NIPINGOK NINGONTI 29 - Hatam bible

NIPINGOK NINGONTI 29

¹No di ba ningkek ndok bibuhup bak nindigsi nya di ipingok kep noni ninyen ne mpe di gom noni mitug midut nipou tirigi luei ningonti tut bigyo.

²Mpe dino nibou ndig di ningon sren ninyeng tak kep limwa nya ne yoni ingon llei. Noro mpe dino nibou ndig di sibut ninyeng tak kep yok ne ingon buhun bibor.

³No di ta nibou ei niyai ningon kiti bindei ba, nicig-nipmem nya inggei sut noni. No di cem kep sundal nya bindei ba, mitiei ngwig leu noni.

⁴Gino nibou ndig ba ningon di sren kei biyok niyai kep nide limwa nya lene ingon llei bibor. Noro gino nibou sibui sut gima kum ei mitiei nindig biborti he ne noni bindei ba, nide ninyeng tak kep limwa nyati minggek bingwig.

⁵No di ba nihyet mmau biris nisut bat nya noyam kin no di ndin bon mem nonti bisrei ei niti.

⁶Sisar srou yo di isibut nya noro yo di ingon gom nya ingon nggei-hi-nggei ba, igyati kwes.

⁷No di ningon kwes kei nyohou nikei nikos tutti di sren kei nya mem nuhui mbum nya noro yo di isibut nya ingon dorti tut niyaisi dima bi.

⁸Yo di injei kep yam ibindei ba, timiei minu ndig gom yahagom iba nitok biyam noro yo di ingon ki nya ibindei ba, mpia mbum-bra hanyen.

⁹Gino no di ningon ki pai kep no di ningon mbum drek dip munhyet lene no di ningon mbum ba nihyet bicig noni lene ba ningon ko-ko wai drek dip bijo kikau.

¹⁰Nimbiam cig nya ingon mpo tut no di ningon gom noro yo di ingon sren nya minyohou no dima.

¹¹Yo di ingkek ndok nya igga-gga wai brei bou tungwatu igyai him noro yo di ingon ki nya ibet ingon ba, yoom ingon cem.

¹²Nibou ndig di ngig nitingou mem munhyet di nijit bi nya bindei ba, nibou nya di igya kui noni ingon dwei.

¹³No di nuhui mbum kin no di hwen bit noni yahacem ima mun nyeng gom di bindei ba, inoyam. Mun nyeng gom dima rino igyai njep di TUHAN pai tes mem gima ibingat ningat di ntun him ide niyaijoti.

¹⁴Gino nibou ndig nyohou nikei nikos tutti di sren kei nya mem yo di yuhui mbum nya lene nide ninyeng tak kep limwa nyati mijo ninno.

¹⁵Nisok kepti kin nipingok kep ningonti hacem kei bibor mem munggwom nya. Munggwom tou rino ba noho rok nonti ningon kanti nya he mibindei ba, nipmem mmai sut noni.

¹⁶Tirigi nibou ndig di sibut ninyeng tak kep limwa nya ne sisar kieng kep mpia. Noro yo di ingon sren nya mingat no dima nimaisi bou igyai him nipou tirigi imai bigyo.

¹⁷Ma attem amunggwom leu api noni mibindei ba, angon nggan-triot kei ba, biwin kep angonti cem.

¹⁸Gino timiei minu hi ikou sut TUHAN nibie tut yokti lene yahagom igyok nisinsiou ei yamti. Noro yo di ibit TUHAN nikos tutti nya ingon nggei-hi-nggei.

¹⁹Bit bon aba ahyet he bingginau ade awak kan bi. Mbro nok gino noni miap kep ahyet noro miyok ngon kep bi.

²⁰Krop kei mem no di ningon mbum yai ningon kiti leu gima no di mbrap nipou tirigi noni kan-kan nyen tut nimbrapti dima bigyo.

²¹Gino asok kep awak bi noro asindui sut ba, noni yai mun nyeng hagom bibit leu nonti ningon kanti tirigi mien kikau ug bipek nimahanti apino ningkek ndok bibor.

²²Yo di ingon cun ibindei ba, tungwatu nya isrep huk yam ba, niwaisi yamti ntun him.

²³Yo di illei-lau micut noro tungwatu nya mikon no di ba nibou coi mem yok ninyeng.

²⁴No di ya kui ninggimang kep mun cig ba nitok bak nonti. Gino noni pai jit munhyet ei nikei noho bei lene mitug ndei hukum. Gino bi ne Allah sigion noni drek dip.

²⁵Ma akrau angon tut mpe dino hi kkin kep anghapti niku au. Leu gima nahanok mibuhun tak na. Gino aba angon com TUHAN lene angwes ngun leu.

²⁶Tungwatu nya yahagom ibrim ingkek kep no di ninyeng jei ba, ingon ya mem gima ngondut yok noro TUHAN Nonti ne nikos tutti di sren kei nibousi ri.

²⁷Yo di ingon gom nya kin yo di isibut nya iba nitok biyam.