Read Hatam NIPINGOK NINGONTI 3 Bible Online

NIPINGOK NINGONTI 3 - Hatam bible

NIPINGOK NINGONTI 3

¹Dimunggwom na e, ma angon prion ser ditde ningginau nati nya au. Ayok ngon kep ditde nipingok nati nya hagom bijo ninno bijo kikau.

²Lewo ditde ningginau nati nya mibindei ba, abong kei agwam kei ba, ayaijo jei bibor cem.

³Suar ningon jo kep Allahti kin ningon gom tut Noni kin tungwatu nyati jo binghig ei angonti ba, ayok ngon kep kikau,

⁴ leu binhyepo Allah kin tungwatu nya ingon ngakei na ba, ibibon na nok no di singat kei.

⁵Ma aba angon titut yam bicom com TUHAN lo, aba angkiem bisu ade ningon dorti au.

⁶Ma apwoi TUHAN ningon biken tirigi bon nikwesti hagom apino Noni mindo puig di bie ndam ayaijoti di kei bibor bina.

⁷ Ma aba angon bisrip huk bipia angon ki dor njiriek mun di igbit mem na au. Abit TUHAN nihyet ba, ambres nanti leu mun di kinei hagom.

⁸Lene ayai munti dima midem kep nok mun di biyai anghuisi kwes ba, abitug ndei nisindemti hanyen.

⁹Ma aba mun di anyeng tut nya kin ade njita ngat di kei bibor kei nya bibon midut nibinggei sut TUHAN.

¹⁰Gino ayai nok gima ne ade ig gudan mimpung tut gandum ba, ade anggur ngei mikum eisi nindig bibor bu leu api dibijig ade nya midem mem gima yuhug anggur ngei hi kin bu eisi bi.

¹¹ Dimunggwom na e, gino TUHAN ttem na lene ma aom angon tut lewo Noni biwin kep angonti. Ma angon pus tut Noni drek dip nipingok nati nya au.

¹² TUHAN ttem nimunggwom bat di ningon ngakei yok nya noyam kin andigpoi di ttem nimunggwom di ningon ngakei.

¹³No di kum ei nide ningon kiti kin ningon di dor nititi miyai ningon di nggei-hi-nggei.

¹⁴Ningat di ntun ningon kiti him nindig bibor dor njiriek ningat di ntun perak him ba, nibok kak bibor dor njiriek mas.

¹⁵Ningon kiti nibok kak bibor dor njiriek tig permata nibok. Bit bon abinai sut ningon kiti kin mun di angon pri kep nindigsi nya kan bi.

¹⁶Ningon kiti bindei ba, nijam di ayaijo wer jei bibor lene anyeng tut ndigban nindig bibor ba, ayai anyeng jei bibor cem.

¹⁷Ningon kiti mibindei ba, abong kei agwam kei bicuon ayaisi cem.

¹⁸Yo di ikrau kep ningon kiti nya igyaijo mpung tut ningat di kei di ntun yok him ba, ingon llei bibor cem.

¹⁹TUHAN ba ningon kiti bipai tes dihyeisi lene ba Nide nintin kimboti bikes mpia-bbed him ei nijoti.

²⁰Noni ba ningon kiti bibon minyei bousi nya ba, ningei biam kwei leu dihyei jou. Noni bindei ba, biget but biprok dihyeisi.

²¹Gima rino dimunggwom na e, ma akrau kep ningon kiti kin nikan-kan nyenti di mahan! Ma akes gima jit ei au.

²²Tug hon nisinati dima ne anyohou ayaijoti di kei bibor di biyai angon kei cem ba,

²³angwes ngun leu mun di buhun mem nijam di ayai ade midyai nya ba, andrat mpia ba, acut bi.

²⁴Aba ningon ttinti bibong abongti bi noro abong mai hak mem mmun jei ba,

²⁵attin tut mun di buhun di kwei kros binok hou sigau di kwei hwen yo di isibut nya cem bi.

²⁶TUHAN minyohou nanti njem-nnei leu ba, misindui sut na ba, asrei ei jui bonti bi.

²⁷Gino ade nisindemti dem mem gima abibon nindigsi nya nok gi kei drek dip ide mun di isuar nya lene ma arok nituti dima ei au.

²⁸Gino bon nituti mem ampu yo dima mem njap di ammani lene ma acuk yok bigwam bibou njap di hyep bu ug e au.

²⁹Ma akos tut angon kanti di bindei ba, mun di buhun cut igkep ade yo di anttig-tta nya di iba ingon com nani au.

³⁰Ma akon ahyet kep no di bon mun di kinei tut na bi ugwai-gwai au.

³¹Ma abou dut tut yo di iba ide nisibut biborti bipos mun ba, ayai bram igyaisi cem au.

³²Lewo TUHAN ningon mpo tut yo di ibon kep mun di kinei noro Noni jem nisut bit yo di ingon kwes kei nya.

³³TUHAN sigion yo di isibut ide ig bei nsi nya noro Noni njei ningat di kei bak yo di ingon sren nya ide ig bei nsi nya.

³⁴ TUHAN ningon mpo tut yo di illei-lau sut yonti noro Noni njei ningat di kei bak yo di iba ibou coi mem yam.

³⁵Tungwatu nya minggei sut no di ningon ki ninyeng noro ibindei ba, yo di ingkek ndok nya inyeng kinei.