Read Hatam NIPINGOK NINGONTI 31 Bible Online

NIPINGOK NINGONTI 31 - Hatam bible

NIPINGOK NINGONTI 31

¹Gini ne Lemuel di nibou ndig mben Masa nipmem ningginausi mem nimunggwom ri.

²Dimunggwom na e, nani ne dingon kieti rin ba, ditde nisrek tut nati ne nibuhup ditde naditi ri. Midipai mindei bina i?

³Ma aba sop nya bikek ade nisindemti ba, agimahap ade mun di amati biyok au. Lewo nibou ndig imang bibor isar drek dip sop nya tu.

⁴Lemuel e, ma ayok ngon kep! Ma nibou ndig nya idut ba anggur ngei di pu yok ba, ingon pri kep pes ngei di idut bipu yok cem au.

⁵Leu gino nibou ndig nya idut pes ngei di pu yok ne ibbwe ser nikos tutti nya apino igiyok igyai kep yo di isindem bi bitut ide mun di isuar nya bi.

⁶Pes ngei mem yo di inggwen di ison dideu igyaijo ningwig honti tu kin yo di ingon dahat leu drek dip ide ningon ngguk biborti.

⁷Idut pes leu binhyepo ibibbwe ser ide nuhui mbumti kin ide mun di buhun di biyai ide ningon ngguk biborti.

⁸Ma ambrap gau yo di iji buhun di imbrap gau yonti bi nya. Ma aya srak ko hagau yo di isindem bi nya yahagom.

⁹Ma ambrap gau yok lene anok nikei di ba ningon di gom bimbus ingonti. Ma anyohou mun di bitut nuhui mbum nya kin tungwatu di yo di hiter ico kep yok nya.

¹⁰Nggruk bibor mem tungwagom um sop di joi bibor ba, wak noni nok nitnem. No di um sop dima ba, wak nok nitnem noyam kin no di tau kep tig permata di bon ninggap leusi.

¹¹Nijjep ndwau sut mun nyeng hi bi lewo ba ningon com nitnem nindig bibor.

¹²Nitnem ba nimbuk bikak noni bi sren noro singat tut noni kikau ug bipek niyaijo ningwig honti.

¹³Nitnem ta nibou ei ninggok mong rami kin domba nintati leu api ninda jo kep minyahas ba, bien kikau.

¹⁴Noni ba ninyeng bitit njita kwei leu minu ting bibor noyam kin nitri-nipek mun cig ide kibar minyei nya.

¹⁵Noni kiju mem ha yausi bingei njita mem nide ig bei nsi nya leu api ndo midyai nya bak nide awak nya.

¹⁶Noni yok niyai kep mpia ttou nsi gom bipek hanjop nsi gom lene ba mitiei di noni tug ndei bita ba anggur nikioi eisi.

¹⁷Noni joi bibor ba, sindem cem ba, ta nibou ei midyai nyati.

¹⁸Noni kan tut bipia mun di bon bou ninda him hagom bon ninyenga. Ninda jo kep midyai nide nya kikau ug bipek mmun mau.

¹⁹Noni dip mong ba, bibien nide minyahas kan.

²⁰Noni drui bou ngwak tut mun di nyeng tut bi noro ngondut nuhui mbum nya bimpu yok tut indwausi nya.

²¹Noni krau ningon tut bed di biang hou nitausi bi lewo nap sinsun dut bak nide ig bei nsi nya yahagom tu.

²²Noni bien ban di ndok bingig kep nibongti bijuk sinsun nghei nta di ba minyahas linen di dia-diau kei binap mem nonti.

²³Nijjep ninyeng jei ba, noni srig nibou nya di inyeng tak kep minu ndig dima ikieti.

²⁴Nitnem nap sinsun kin bang di ibikri kep intig bou bitri bak nitri-nipek mun cig nya.

²⁵Nihyet buhun ba, tungwatu nya ikon ninyeng cem lene gikrau ningon tut mun di mipek kep mem noni ei nidipti bi.

²⁶Noni ba nihyet di nem-nnai kin ningon kiti cem bipingok tungwatu nya ingonti.

²⁷Noni brim ningkek bikwop njap ngwa hagom binyohou nide ig bei nsi nya.

²⁸Nimunggwom bat nya inggap leu noni ba, nijjep cem nggei sut noni.

²⁹Nijjep pai “Sop nya imang bibor igyai munti nya kei noro ayai munti nya kei bibor kei dor njiriek nindigsi nya yahagom.”

³⁰Niimaisi di kei ne iba ingon com bi lene nuubbuti mipror yon noro sop di bit TUHAN nihyet ne suar ma tungwatu nya ikon ninyenga.

³¹Ma jibirop bak noni drek dip niyai munti di kei bibor nya lewo dem mem gima tungwatu nya bidem minu ikon ninyenga!