Read Hatam NIPINGOK NINGONTI 5 Bible Online

NIPINGOK NINGONTI 5 - Hatam bible

NIPINGOK NINGONTI 5

¹Dimunggwom na e, ma angig atingou mem dihyet! Ayok ngon kep ditde ningon kiti kin ningon di huk nititi di dingginau na tut nya,

²leu binhyepo ayai munti nya kei ba, ambrapti mindo brei bipia nani ne no di ningon dorti tut mun nyeng hagom ri.

³Sop di nikrar jut[1] nuhui ngkek mmau kei bidem kep ahwei lon ngei ba, nihyet brim pinai nya ingon cem,

⁴noro tirigi niyem njita tut yamti njiriek leu su lene gima ug nok mun di mpo kin mun di buhun di ug jo mem na ei a.

⁵Sop dima mibrim anda bijico kak puig di bie ndam minu nimai nya ide.

⁶Noni kes no kak puig di bie ug ei niyaijo kikauti bi noro kriek leu puig dima tu lo, gikan tut bi.

⁷Gima rino dimunggwom bat jen e, jingig jitingou mem dihyet lene ma jingkek ndok tut au.

⁸Aom nanti ei minu ting leu sop dima ba, ma adideu nide ig cem au.

⁹Gino adideu sop dima lene abindei ba, atug ndei anyeng di kinei ei limwa nya ikieti leu api no di ngondut tungwatu nya bi miyai nimai bina drek dip ba, amai hanyen ei apilei yo ug ri.

¹⁰Nindigsi nya migyem ade mun di anyeng tut nya hagom bingwig leu na ba, yo di akan tut yok bi nya migyai ndigban di acom ahanggwap tut nya ba, ima bou yok nok ide bu.

¹¹Lo bi lene mporo anso-nso nyen tut mpe dino ninggwenti yem angut bingwig.

¹²Leu api anso nanti tut ba, apai “Nggon rino singon mpo tut ide nisok kep sati ba, sikou sut ide nipingok singonti pima i?

¹³Sidat kep ser sitingou leu ba, simiap side guru nya ighyet bi lene sikiek soho ter leu yok cem.

¹⁴Sinyeng cut[2] kros bou limwa nya igyai him.”

¹⁵Gima rino ma angon gom tut nanti atnem ba, ayem njita tut nongkom ngat he.

¹⁶Gino angat angwes ei sop hiterti lene gima kei bi sren.

¹⁷Ningat ningwes ei yamti dima jo pijum mem nani kin atnem jeni he lene mem nani kin sop hiter bi.

¹⁸Gima rino ma ayai ningon nggei-hi-nggei bit atnem nongkom ngat he. Ba, anggok tut ningat ningwes ei sop gwam nitta pilei di awak tu dima.

¹⁹Noni ne sop gwam nitta pilei di ubbu ngat di dem kep rusa di ba nippai biyai mun rin. Asindui sut ba, ningut di ubbu dima bindei ba, ampig bou kep noni hak ba, ningon pri kep nati hwen-hwen nyen angona.

²⁰Dimunggwom na e, nggon rima angon pri kep sop wak cam hiter i? Adideu sop di nikrar jut mem mindei i?

²¹TUHAN ngat bidem tungwatu nya igyai munti nya hagom. Noni ngig niyai kep imbutti nya hagom.

²²Yo di isibut ide sisar di ibon nya dem kep bon di srou yonti hanyen.

²³Imai drek dip gi yoom ingon kan bi ba, ide ningon mbum biborti bindei yonti bisar tut.