Read Hatam NIPINGOK NINGONTI 6 Bible Online

NIPINGOK NINGONTI 6 - Hatam bible

NIPINGOK NINGONTI 6

¹Dimunggwom na e, apreu ei mem tungwa hi tut gima aya hon nide ningwam di dahat ei tu e?

²He ahyet srou nanti ba, ade nipreu eisi nya kri kep nanti cem e?

³Dimunggwom na e, gi nok lene acut ei no dima ninda nsi ba, ninyeng tak kep na tu. Handei kon ba, dindo puig mem gima angwes ngun leu ninda nsi. Abipbur ba, aug ngat no dima lene abidip huk noni leu binhyepo kwek na leu ade nipreu eisi.

⁴Ma abong ba, agwam kep anghuisi mbigom cem au e bibou,

⁵akwek nanti leu bansi dima dem kep nok ha kin rusa di kwek nonti biningwes ngun leu no di huk no mem gima prindei no ug e.

⁶Suar yo di ibong biei nda dip nya ingig igyai kep ako nya igyai munti nya bipwoi nisinati ei ingonti.

⁷Lewo ako nya ibon ide minir kin ide nibou ndig kin no di nyohou yok bi.

⁸Noro inju njita ei ide dihyei jou mem nijam di njita ngat ningat nindig bibor bitin ei mem nijam di ninggum mihwen yok.

⁹No di bong biei nda dip mibong mem nijam pig bu i? Ug ei mpe di tou leu api noni mikiju hanyen i?

¹⁰ No dima gwam juug biba ninda ngot yam bigwam kep ninghuisi mbigom he lene kan “Nna ba sibong mbigom ug e lewo siyai nggrop buhun.”

¹¹Noro tirigi noni bong mai kep ninghuisi lene jei bi mun di bindei ba, nuhui mbum micut igkep noni dem kep nok nipos kep mun cig ba minggwen bihwen noni.

¹²Yo di isibut kin yo di ingkek ndok iris mun ei tirima-tirima ba,

¹³ikek igyai cem iba inda ngon mun biyam mem gima ibiris mun cem,

¹⁴ibou ngwakti di mpiei mpung tut nitin ei ningon kanti di kinei di bindei ba, niba nitok biyamti jo bidem ug.

¹⁵Gima yok hagom mibindei ba, mun di buhun cut igkep yok kros bitug midut.

¹⁶Mun nyeng muhwindacan dini bindei ba, TUHAN ningon sibui gima rino Noni miba niyai ngat gima kan bi.

¹⁷Ningon jei kin nuhui di buwei sut nihyet di igbit bi kin ninda di kimukep yo di ingon ngun nya,

¹⁸kin ningon di kos dat mun di mbuk bibor kin nimig di dia tut gima bipbur ndam mun di kinei,

¹⁹kin no di ris-ris nyen nihyet tut mun di noni ngat bou niyai him kin no di bindei ba, niba nitok biyamti kieng kep yo di ingon kwes kin yam.

²⁰Dimunggwom na e, ma apwoi acig ningon lene ma abbwe ser apmem nipingok nati nya au.

²¹Ma ayok ngon kep ighyet ba, apwoi ninghig-niker ei angonti.

²²Ide ningginausi nya mibie tut na kak ambutti nya binyohou na tirigi abong mai bindo puig di kei bina mpe dino ayai ngkiem.

²³Acig-apmem nya ide ningginausi nya dem kep ninjeng di piga digai puig di kei mem nani ba, ide nisok kepti nya mindo puig niyaijoti di kei bibor bina.

²⁴Ningginausi dima mibindei om na ei minu ting leu sop di ikrar jut nya kin hiter nitnem nihyet di bihwen-hwen nyen angona.

²⁵Ma asindui sut ide nuubbuti ba, biyai angon di pri kep yok au. Ma asindui sut ide nikek niyaisi ba, brim angon au.

²⁶Bon tungwagom yai mitiei di nibok dem njita den gom bak sop di krar igkei leu api yem njita tut noni lene dem. Noro nicut tut hiter nitnem ne mibindei ba, suar ba nonti niyaisi bigo.

²⁷Bon tungwa hi nggriou hum kin ningget lo, hum tigut no bi e?

²⁸Bon tungwa hi co-co nyen kep hum mbom lo, hum tigut nimig bi e?

²⁹Nok gima cem bit bon no di yem njita tut hiter nitnem ningwes ngun leu hukum kan bi.

³⁰Gino no di nggum nggimang njita drek dip ninggumti lene tungwatu nya ighyet kinei sut noni bi e?

³¹Lene gino ikat noni ne suar noni birop hanyen tut njita di nggimang dima mbimuhwindacan bram yam. Apino niyai munti dima mipinde ndigban di nyeng tut nya hagom leu noni.

³²Noro notou mem no di yem njita tut hiter nitnem i? No dima bibon nonti ninyeng kinei! Ningon mbum bibor!

³³Tungwatu nya mihwen bit noni ba, ighyet miwer mpiahi tut cem leu api ninyeng kinei bijo ninno bijo kikau.

³⁴Lewo tug hon niyai munti di kinei dima ne sop dima nijjep ningon sibui ba, ningon kui kep gima hwen noni cem. Tirigi noni ba nigga biborti bibuhup hanyen lene gikan tut ningondutti bi sren.

³⁵Bit bon hi ba mitiei bihwen ningon bicut kan bi. Mun di kei mang bibor di njei bak midem mem gima bicut nide nigga biborti dima kan bi.