Read Hatam NIBA NINGON SRIP HUKTI 12 Bible Online

NIBA NINGON SRIP HUKTI 12 - Hatam bible

NIBA NINGON SRIP HUKTI 12

¹Ma je di pilei nya jiyok ngon kep jide Nipai Tes Mun Cig nipou tirigi nijam ningon buhunti tau kep je bigyo. Leu mpe dima lene mijikan “Singon llei mem nijam di siyaijo dini bu bi.”

²Mpe dima lene ayai mmui bibindei ba, mpia njap kin bed mmun kin ham mpia bbed-him nya pimber bou ayai him leu api bumbuhui di biang biget tap kwei hanyen bijo kikau nok mun di bihwen bit na.

³Mpe dima lene anda di cuon ayaisi ninno tu midigit. Amig di sindem bibor mimbriong bidigit. Akwai mbo bibindei ba, ayem njita di nghai bu bi. Ayai dindi bibindei ba, angat mun di sieng-siau bu bi.

⁴Mpe dima lene atingou nam bibindei ba, amiap tungwatu nya di ighyet ngwig kep yam ei nisai ma kwei kin doia di ipai ei yuhui him cem tig huk mbrei nimbi cem bu bi. Noro ha di dwas bindei ba, abong mai mem ha yausi kan bi.

⁵Mpe dima lene gino akui ug ei mpia di jo anai bibor ne ayai minang ba, anyohou mbut cem. Mpe dima lene abou tiei ba, amig buhun cem. Mpe dima lene angut kanti nya mipren bingwig leu api angon pri kep ndiyok bu bi. Tungwatu nya yuug ei ibong kepti gi ningwigsi ba, tungwatu di ingon ngguk tut yok nya sindi ipim-pim nyen kak puigya.

⁶Mpe dima lene lante di iba perak bibon mibitun. Njeng mbrei di iba mas bibon micut biki bingwig. Kuk di yuhuk tut dibijig di ibitau minyei leu minyei bousi mibitun apino dibijig kimbo binnir-wap.

⁷Nye di tungwatu ingut ngkwei hanyen binok dihyei ndung ei dihyei jou bit nimbie him leu api innei ngkwei hanyen ndam Allah di hi ninnei ei insi a.

⁸Gima rino dimbrap gi ningwig honti “Mun dima yok hagom mikui-kausi he. Hagom bon nisinati ba, ingon dorti tut cem bi.”

⁹Nikan-kan Nyen Tut Mun Cig dima nintin kimbo ba, ningon ki. Gima rino ngginau limwa nya tut mun di kan tut nya hagom. Noni yok niyai kep nihyet nibiti ninda mang bibor ba, bingon bikan tut mun di igbit a.

¹⁰Noni brim ningkek mem gima ttau kep nihyet di bigwam ser tungwatu nya ingona. Ba, nihyet di pas kep nya ne nihyet di nijit ri.

¹¹No di ningon ki nihyet dem kep gembala de tom di nggwen di noni binyohou domba nya. Nihyet nibiti ninda kin nisok kepti nya dem kep paku di ibipek mpia bingkiem. Allah ne ide gembala ningat-ngat rin ba, ngginau nye tut mun dima yok hagom.

¹²Dimunggwom na e, ma ahek tut nanti leu mun nyeng gom. Nipas kep sratti bon ningwig honti bi. Lene nicoi pikor kikausi cem bindei ba, inghuisi wei-wau.

¹³Tirigi dibinai sut hagom bidem leu lene nirop ninda ndigsi cuk nye “Ma jittin tut Allah Nongkom bijibit nicukti nya hagom. Lewo gima ne Allah ningon kanti mem nye di tungwatu nya tirigi Noni pai tes nye ri.”

¹⁴Allah mimbus ingonti tut igyai munti nya hagom bitut igyai munti di kei nya kin gi kinei nya di igyai brei kin gi hi di igyai niku cem hagom.