Read Hatam NIBA NINGON SRIP HUKTI 4 Bible Online

NIBA NINGON SRIP HUKTI 4 - Hatam bible

NIBA NINGON SRIP HUKTI 4

¹Leu api diba dingon bisrip huk yo di isindem ei dihyeisi dini nya ide nimbuk tut yo di isindem bi nyati. Yo di isindem nya ico kep yok bibindei ba, ipim lo, hi di mpu yok bi. Tungwahi cem gimpu yok bi. Lewo yo di isindem nya ide nisindemti di nindig om kep yok.

²Tirigi diyok ngon kep yo di imai su nya lene dingon kei sut bi lewo yoni ingon nggei-hi-nggei dor njiriek yo di igyaijo yo nya.

³Noro yo di ingon nggei-hi-nggei dor njiriek yo pima bu rino yo di isrek bigyo lewo igingat mun di kinei di kieng kep dihyeisi dini bou igyai him bigyo.

⁴Lene dikan tut bipia tungwatu nya igyai midyai sindem drek dip gi ingat yo di inttig-tta nya ide ndigban di itug ndei leu midyai di ibrim ingkek tut nya. Gima yok hagom ne mun di bit bon dingon dorti tut kan bi rin ba, dem kep nok niyon igkep hou nimig.[6]

⁵No di ningon mbum nitu gwam biba ninda bingot yam lene sindui sut ba, mai ninggum.

⁶Mbro nok ipai nok gima lo, no di ma ndigban poi mien biningon jo nyahan drek dip dima niyaijoti kei dor njiriek no di nibou ngwak sibui sut midyai di com nahanggwap tut sindem. Lewo gini dem kep nok niyon igkep hou nimig.[7]

⁷Lene dikan tut mun nyeng gom kin bu ei dihyeisi dini di bit bon dingon dorti tut kan bi.

⁸No di bong binongkom di bon nimunggwom kin nide bat nya bi cem no rinaha. Mbro nok gima lo, noni ta nibou ei midyaiti biyai kikau ba, ningon gicut hon ndigban di jo binoni bi. Noro com nahanggwap bikiek ningha bak mun di brim ningon hagom cem mem tou i? Bit bon dingon dorti tut gima yok cem kan bi. Lewo gima bindei ba, noni tug ndei nonti ninghuisi wei drek dip.

⁹Ibou can di igyai midyai mitug ndei ningat di kei dor njiriek gi tungwagom ngat di yai midyai binongkom.

¹⁰Gino hi cut lene nisut mpu no. Noro gino tungwagom ngat leu api cut ne gima buhun mem noni. Lewo hi dima mpu noni bi.

¹¹Ibou can di ibong simin yam mem mmun di hou cut ne idut pijuk yam bibong mai. Noro gino tungwagom ngat he lene notou ningkek dut bibong mai i?

¹²Ibou can di ittei yam bimbut ipai ingkiem ei yamti bigya mem ide siceu bihwen. Noro gino hi mbut binongkom lene krop kei mem gima siceu hi bindei timek noni. Gi mbun ibindei tun kuk ningai di ngot yam bingkiem kan bi.

¹³Pinai pilei gom di nuhui mbum lo, ningon ki bon ninyeng dor njiriek nibou ndig gom di wer andig-ndau lo, ningon mbum bikou sut gima hi pingok ningonti a. Mpaba no di nuhui mbum dem mem gima kui bigwam nok nibou ndig. Mpaba no di sima cem dem mem gima pri bigwam ei nibou ndig de banggo mbreiti cem.

¹⁵Dikan-kan nyen tut tungwatu dihyeisi dini hagom leu api dingon ngat lo, pinai pilei gom di srig ikieti mikui bigwam nok nibou ndig biya luei nibou ndig nohoti bu.

¹⁶Mbro nok gino pinai pilei pima ninyeng tak kep limwa di imang bibor lo, tirigi noni pror leu yok lene hi di pai sigyo bak biyok ngon kep niyai munti di kei di pror leu su nya bi. Ningat ne mun dima yok hagom nok mun di bit bon dingon dorti tut kan bi rin ba, dem kep nok niyon igkep hou nimig.[8]

¹⁷Tirigi acoi ug ei TUHAN De Ig lene ma angon sok kep nanti. Gino aug ei sirima mem gima apikor tut nihyet ne gima kei dor njiriek midut nindig mindhe ei humti di abon bak TUHAN bit leu nok yo di ingon mbum nya igyai kepti a. Bit bon yo dima ibinai sut mun di kei kin mun di kinei niter leu yamti kan bi.