Read Hatam NIBA NINGON SRIP HUKTI 5 Bible Online

NIBA NINGON SRIP HUKTI 5 - Hatam bible

NIBA NINGON SRIP HUKTI 5

¹Ma akan-kan nyen tut ambrapti nipou ug e leu api ambrap. Ma aba angon priti bipreu ei mem Allah au. Allah Ningat rima ei gwamti lo, nani angat rin ei dihyeisi dini. Gima rino ma akan-kan nyen tut ade nipreu ei mem Noti nipou ug e.

²Ningon bos-bos nyenti bindei ba, nimumpriem kineisi cem kum eisi bibor. Niji ngganti bindei ba, nihyet di tibim kwei leu ade ningon mbumti cem kum eisi bibor.

³Gino apreu ei mem Allah lene ma ayai igbit ade nipreu kepti dima bipek kep haninyai. Lewo Noni kou sut no di ningon mbum di yai bipek kep nide nipreu eisi bi. Gima rino ma ayai mun bipek kep ade nipreu eisi dima.

⁴ Gino apreu ei mem bi ne gima kei dor njiriek gino apreu ei mem leu api ayai mun bipek kep apreu eisi dima bi a.

⁵Ma asindui sut ba, nihyet di tibim ei ahui him bindei ba, sisar srou na au. Lene gima mibidip huk na ba, suar apai bak TUHAN de imam bipia akiowi tut ade nipreu eisi dima. Apino Allah gga na bibindei timek ade midyai di ayai nya drek dip ade nipreu eisi pima tut mindei i?

⁶Mbro nok gino mumpriem nya kin mimun nya kin nimbrapti nya kum eisi bibor bibon nisinati bi lo, ma aba ningon ki bittin tut Allah.

⁷Gino angat no di ninyeng jei co kep nuhui mbum nya bipos mun di inyeng tut nya leu yok lene ba ningon gom bimpu yok bi lene ma anggap leu au. Bikwop no di ninyeng jei bon nibou di ninyeng tak kep noni bu. Lene nibou di ninyeng jei bu ninyeng tak kep yahacem sindam.

⁸Limwa nya ikwas ningat di ikos kui ig gudan tut yam bibon nibou ndig di ya srak ko hagau ide miai nya.

⁹Mitiei midem mem no di niyai ndot tut mitiei bi sren. No di mbus ndigban kui sur mpia ningon gicut hon nibikum eisi bi. Gima ne mun di bit bon dingon dorti tut kan bi ri.

¹⁰No di nyeng di kum ei ndigbanti bindei ba, yo di inggiuk huk noni imangti kum eisi sindam. No dima tug ndei mun di kei drek dip ndigban dima bi. Noro gi kan tut he rino noni nyeng.

¹¹Mpe hi ne limwa di yai midyai yem njita bindei no lene mpe hi bu ne nide njita di yem dem bi. Noro gi bong lene bong mai. Noro no di nyeng de ndigban bindei ba, bong mai kan bi lewo ningon bos-bos nyen tut.

¹²Dingat mun di pek kep mem tungwatu dihyeisi dini di buhun bibor. Tungwatu nya inju mitiei keyam mem nijam di imati dem bi.

¹³Noro mun di kinei hi cut igkep noni bibindei ba, mitiei dima hagom sar hak. Tirigi noni yai nimunggwom nya lene munggwom dima srek kin ninda ngwak.

¹⁴Nyeni yahagom isrek kin inda ngwak. Tirigi imai bikes dihyeisi dini ei lene igittei mun di icom yahanggwap tut nya biyuug sut cem bi.

¹⁵ Mun dima cem biyai ningon di ngguk. Ikes dihyeisi dini ei noyam kin gi po isrek kwei pima cem. Mbro nok gino icom yahangwap tut niyon igkep hou nimig lo, itug ndei mindei ngan drek dip i?

¹⁶Nijam di igyaisi jo yo lene itibap-tibap nyen ei nidinditi ba, ingon buhun cem ingon bos-bos nyen cem ingwak njui cem ingon sibui cem.

¹⁷Leu api dingon huk niti bipia gihi di kei mem tungwatu nya dor njiriek mun nindigsi nya rino njita di igyem kin ndia ngei di idut kin gi ingat ingwes ei ningat di itug ndei tug hon ide midyai di igyai nya mem nijam di igyaijoti di jei bi di Allah yai binye dini. Gima ne mun di Allah bindei ba, pek kep mem nye ri.

¹⁸Gino Allah yai mitiei kin ndigban binye bisindui sut ba, ingat ingwes ei mun di inyeng tut dima lene suar ipai sigyo biNoni ba, ingon kei sut ningat di igyai leu ide midyai di igyai nya hagom. Gima cem mun di Allah njei bak nye ri.

¹⁹Allah yai ningon nggei-hi-nggeisi binye. Nna ba ingon bos-bos nyen tut ide niyaijoti nijeisi bi.