Read Hatam NIBA NINGON SRIP HUKTI 6 Bible Online

NIBA NINGON SRIP HUKTI 6 - Hatam bible

NIBA NINGON SRIP HUKTI 6

¹Dingat mun di pek kep mem tungwatu dihyeisi dini di om kep yok bibor bu.

²Mpe hi ne Allah bindei ba, nyeni inyeng leu ba, isuar mun nyeng hi bu bi. Noro Noni sindui sut ba, igingon kei sut mun di inyeng tut dima yok bi. Noro no di nimbier kim nye bi miba no kep ndigban dima bingat ningwes eisi bu. Gima ne mun di buhun bibor rin lene bit bon dingon dorti tut kan bi.

³Mbro nok gino ibon imunggwom bat nya ibou sratus gom ba, ide nijam di igyaijo jei bibor biyuug wer andig-ndau lo, gino igyai ningon nggei-hi-nggeisi bi ba, ide bat nya ingon ngguk bram yok bitig yok ei nimai jui di dem bi ne dikan bipia mun di pek kep mem ningwoi-ngwoi hi di nipmem srek tut kinei biniyaijo bi kei dor njiriek yo dima.

⁴Munggwom ngwoi di nipmem srek tut e, he srek tut bi e, lene gima wer munhyet bi. Noni ug coi nidinditi leu api jei bi lene tungwatu nya ibibbwe ser noni.

⁵Ningwoi-ngwoi di kinei dima gingat mpia di com nimig ba, ningon gidorti tut nide niyaijoti bi. Apino ug ei minu nimai nya ide bibong kei bigwam kei,

⁶dor njiriek no di nyeng di nide njap ug ei ari bingwam sribu can lo, ningon nggei-hi-nggei bi sren. Apo cin dima yuug ei mpia di noyam bi e?

⁷Nyeni igyai midyai leu binhyepo itug ndei igyemti he. Noro ingon gicut hon mun di igyem dima bi sren.

⁸Ba, gino ibinai sut no di ningon ki kin no di ningon mbum lene tou rima yai ningon cut honti di pror yon hanyen bi i? Lene gino no di nuhui mbum niyai munti nya kei bibor bou limwa nya igyai him ne gima ribindei ba, noni miyai ningon cut honti di pror yon hanyen bi e?

⁹Noro bit bon singon dorti tut ningon nggei-hi-nggeisi pima kan bi ba, dem kep nok niyon igkep hou nimig he.[9] Gino ingon cut hon mun di jo binye lene gima kei dor njiriek gi ingon pri kep mun di inyeng tut bi nya.

¹⁰Tungwatu nya ijem bibikwop mun di Allah pai tes nya hagom ninyeng tu. Nye di tungwatu ikan tut mun di bitut tungwatu. Lene ikan tut bipia bit bon isrep huk Allah[10] di sindem njiriek nye kan bi.

¹¹Nide nisrep hukti kin nihyet di wer bijo ninno ne gi bon ninyeng nut bu bi. Noni mitug ndei mun nyeng hi tug hon nisrep hukti dima cem bi.

¹²Notou tungwatu nya ikan tut mun di kei bibor mem yok mem nijam di igyaijo jei bi ba, bon ninyeng bi dini i? Lewo igyaijoti dima dem kep nok ningwes di njiriek yok. Tou ripai binoni tut mun di mipek kep mem noni niabiati noni kes dihyeisi dini ei bimai i?