Read Hatam NIBA NINGON SRIP HUKTI 7 Bible Online

NIBA NINGON SRIP HUKTI 7 - Hatam bible

NIBA NINGON SRIP HUKTI 7

¹ Gino ayai kepti bindei ba, tungwatu nya ijoi sut na lene gima bon ninyeng dor njiriek mini di ui-gwang kei di nibok kak. Njap di amai kei dor njiriek njap di asrek.

²Gino aug cem kep yo di ingon ngguk bram nimai ne kei bibor dor njiriek gima aug ei pestati. Suar yo di igyaijo nya ingon hukti tut nimai di mem kep ser yok.

³Ningon nggukti kei dor njiriek ningon llei biborti lewo ningon nggukti bipingok ingonti tut mun di bon ninyeng.

⁴No di ningon mbum huk bram mun di ngat ningwes eisi kikau. No di ningon ki kan-kan nyen tut niyaijo ningwig honti.

⁵Gino no di ningon ki hwen kep angonti lene gima kei dor njiriek no di ningon mbum di ba doia bikiek anyenga.

⁶No di ningon mbum nipati bon ninyeng bi. Nipati dima dem kep nok hum di yem ndia nggwen nipru-prasti.

⁷Gino no di ningon ki ris mun lene niyai munti dima biyai ningon di mbum bak. Nibingot kepti kipon nikos tutti di sren kei.

⁸Midyai di igyai biput tu kei dor njiriek nikinyon ei nimbie himti. Noom kep ningonti kei dor njiriek ningon jeisi.

⁹Ma aom kep ade ningon kuisi. No di ningon mbum ku ningon di sibui bijo nding ei ningonti.

¹⁰Ahig ser “Nggon rino nijam gi nipou nya kei dor njiriek nijam dini i?” No di ningon mbum rino hig ser nok gima.

¹¹Suar tungwatu nya yahagom igyai ningon kiti. Ningon kiti kei bibor mem nye ba, noyam kin mun di iba nyekep.

¹²Lewo ningon kiti mingkiem ser ayaisi noyam kin mitiei. Noro ningon kiti ninyeng dor tunggwei mitiei di anyeng tut lewo ningon kiti ningkom cuon ayaisi.

¹³Ma abisrip huk Allah de midyai nya. Tou rima pu mun di Allah bindei ba, koi su bisren hanyen i?

¹⁴Gino mun di kei hi pek kep mem nani lene ma angon nggei-hi-nggei sut. Gino mun di buhun cut igkep nani lene ma ayok ngon kep bipia Allah kes mun di kei kin mun di kinei hacem bina. Bit bon igikan tut mun di mipek kep mem nye ei nidipti bu kan bi.

¹⁵Dingat mun di pek kep mem nye mang bibor mem nijam di diyaijo ei dihyeisi di mpung tut munhyet mang bibor dini noro dingon dorti tut bi. Dingat yo di ibit Allah nicuk yokti nya lo, ide njap jei bi. Dingat bu ba, mbro nok gino yo di isibut nya ibit Allah nicukti nya bi lo, ide njap jei bibor.

¹⁶Gima rino ma asingat bibor ba, angon ki bibor cem au. Nggon rima ayai nimai binanti drek dip i?

¹⁷Ma asibut bibor ba, angon mbum bibor cem au. Nggon rima amai urung drek dip i?

¹⁸Ma aom na leu mun nyeng cin pima hacem lewo yo di iba ingon gom bikuk yok bak Allah migyai bipek kep ningon kanti mem yok.

¹⁹Ningon kiti bindei ba, mimbri kui no di ningon ki ningkek nindig dor njiriek nibou nya ibou simnai di inyeng tak kep minu ndig gom.

²⁰Hi di kei-kau-kei ei dihyeisi dini bi. Hi di bon mun di kei kikau di bon sisar bi ningat rin bi sren.

²¹Ma angig atingou mem hiter ide mun di ibohom ndat nya au. Leu hi rima ade awak gom ba nihyet biyai na o.

²²Nanti cem angon huk niti bipia aba ahyet biyai yo di hiter mbirimang bibor tu.

²³Diba ditde ningon kiti bibingon mun pima yok hagom. Mbro nok gino dita dibou ei ninggok ningon kiti lo, jo ting bibor leu da.

²⁴Tou rino ningon dorti tut tungwatu nya ide niyaijoti i? Munhyet dima jut bibor ba, dem mem gima ingon huk niti kan bi.

²⁵Noro dita dibou eisi lene dipikor tut ba, dibinggok nintin kimboti cem leu binhyepo diyai ningon kiti kin nibuhupti mem mun di dingon kiowi eisi nya hagom. Dibingon mem gima dingon dorti tut bipia nibon sisarti ne ningon mbumti rin ba, ningon mbumti ne ningon tindurti ri.

²⁶Dingon hukti bipia sop[11] nimpo biborti dor njiriek nimai. Ningon ngwam kep sopti dem kep nok jala kin kau mbrei di itin ei mem gima ibikat mun di igyem. Tirigi sop nggriou na lene gima dem kep nok noni ba lante biteu na bingkiem kei. Yo di ibit Allah ningon kanti ingwes ngun leu nide bona. Noro bon dima miteu yo di ibon sisar.

²⁷Nikan-kan Nyen Tut Mun Cig pai “Jingat i! Tirigi dinggok tut nibuhupti gom-gom sindam lene duum mun dima yok hagom.

²⁸No dinggok kep nibuhupti hiter nya bu yo lo, digitau kep hi bi. Leu bikwop tungwatu nimpung ibou sribu gom di duum yok lene dingat pinai gom he rino dibou cut bak a. Noro dingat sop di dibou cut bak hi bi.”

²⁹Gi ndi duum hak rino “Tirigi Allah bibon nye lene joi sut nye noro nyenti rino iluei itta ba, inok mun di ngot-nga.”