Read Hatam DIUN MIMUN 1 Bible Online

DIUN MIMUN 1 - Hatam bible

DIUN MIMUN 1

¹ Diun di Salomo pas di brim ingon dor njiriek diun nindigsi nya.

²“Aba ahui ngkek bimei da. Angon ngakei dati nyop kei dor njiriek ba anggur ngei!

³Anghap ui-gwang kei. Anyeng dem kep mini di ui-gwang di kiber a. Gima rino sop gwam nitta pilei nya ingon ngakei na ug o!

⁴Ditde nibou ndig e, sibrim simig haninyai. Abuwak da ug ei ade ninsi di abong a. Abindei ba, nahagom ningon nggei-hi-nggei ba, nikon ade ningon ngakeisi ei nai dor njiriek ba anggur ngei. Dem mem gima sop gwam nitta pilei nya ingon ngakei na o!

⁵Je di sop minu ndig Yerusalem e, mbro nok gino dingkek rom lo, dani ne sop di ubbu ri. Diromti dem kep prak meng di yohok ei iggum ndigsi Kedar. Noro dingkek dia-diau bidem kep minghas mbrawin ngot di ipindur ei Salomo de ig nibou ndig!

⁶Ma jingwes pri gau da drek dip dingkek di rom au. Lewo mpia com pijuk dingkek. Dikijam bat nya ingon sibui sut da bicuk da ba, diyai midyai ei ba anggur nghousi. Gima rino bon nituti ndia hi mem gima dinyohou dingkekti bi.

⁷Disut di dingon kieti na e, ma apai igbit bida tut mpia di anyohou ade domba nya eisi ug e. Akes yok bibong nyahan ei sirigitou mem mpia huk pijumti i? Nggon rima diba minyahas ninggai biku diimaisi ei mpe di duhwou-hwou nyen ei kambir kin domba di asut bat nya ide nikieti he i?”

⁸“Na di ubbu ngat ei sop nya ikieti e, nggon rima akan tut mpia dima bi i? Abit nimpung domba nya yoho hak ba, anggok abris nghousi mem yok dideu gembala nya ide prak meng yati nya.

⁹Na di angwam kep da ba, angon ngakei da e, nani noyam kin kuda niwek hi di kri nibou ndig Mesir de kroba di bri bigwamti.

¹⁰Anyoi dia kei ei ade mimau nggreti. Akimam kei-kau sut tig permata komti di andei a.

¹¹Midiba mas bibon miep komti bidicim perak nitou nya eisi mem nani.”

¹²“Tirigi ditde nibou ndig bong nibongti leu lene ditde mini narwastu di ui-gwang kei nuui tun kei.

¹³Mpe dino no di ngwam kep da bidingon ngakei dima bong dingget dip ne nuui tun bidem mura.

¹⁴No di ngwam kep da bidingon ngakei dima dem kep mitou pacar nibou gom di hei ei ba anggur nghousi ei En-Gedi.”

¹⁵“Na di dingon ngakei e, aubbu ngat. Ningat ne nani ubbu ngat! Ba, ayai nggrop mbris bibor.”

¹⁶“Na di dingon ngakei bibor e, aubbu ngat. Aubbu ngat nijit a. Abris nghousi minok nghim nsi di siyem njita tut yam eisi ba,

¹⁷biei aras kin buom mijei gau sa binok ig jibei ei abris nghousi dima.