Read Hatam DIUN MIMUN 5 Bible Online

DIUN MIMUN 5 - Hatam bible

DIUN MIMUN 5

¹“Dikinjoi ninyan e, dikwei ei ditde miaisi tu. Dimbus ditde mur kin biei ngat di nyop kei nya keyam bidiyem ditde ahwei lon ngei. Didut ditde sapi do ngei kin ba anggur ngei.” “Nisut bat jen e, jiyem njita lene jibidut ndia ngei. Jidut kikau ba, jibou bibuwei kep jingon ngakei yamti.”

²“Dibong noro dingon yat nai. Dimumpriem ba, no di dingon ngakei no puk dimbou bipai.” “Na di dikinjoi di dingon ngakei e, na di hakimoi e, na di dinggei sut e, ma akau dimbou leu da. Nggou mmun bindei bidibou ndot. Dibou nta mpung tut ham nggou di cut mem mmun.”

³“Sijuk sinsun side ei su. Sijuk sinsun side dima hanyen bu e? Sipiap simig cem tu. Sibindei birom hanyen bu e?

⁴No di dingon ngakei dima su ninda ei dimbou mihyeti kwei. Lene gima biyai dingon di pri bida.

⁵Leu api dikiju mem gima dikau dimbou leu no di dingon ngakei. Mur ngei tinim leu dinda kin dinda pijum nya bibindei ba, dimbou krausi di dikrau ndot.

⁶Dikau dimbou leu no di dingon ngakei lo, noni tti kep ninghim dip bingkwei hanyen tu. Dingon ya mem nihyet bibor. Dinggok-nggok nyen noni noro digingat bi lewo mbut leu su. Dijem ninyeng lo, buhup dihyet bi.

⁷Leu api niya ser minu ndig mem mmun cig nya itau kep da bibui da bidibok cem. Ibrim sre ndan de di dibisrou dinghat sin dati.

⁸Je di sop gwam nitta pilei minu ndig Yerusalem e, ma jipreu ei mem da bipia gino jitau kep no di dingon ngakei lene ma jipai dihyetti bak bipia dingon ngakei bibor ba, biyon ninggwen ei dinda.”

⁹“Na di sop ubbu ngat e? Apo ade di angon ngakei ubbu dor njiriek pinai nindigsi nya e? Apo ade di angon ngakei di acuk nye di nipreu ei mem na tut dini kei-kau dor njiriek pinai nindigsi nya gima rin e?”

¹⁰“No di dingon ngakei ne mot ubbu di mimbri kui ningkek ba, dor njiriek pinai nindigsi di ibou sribu simnai ri.

¹¹Nibou dem kep mas di pimbai kei ba, dia-diau kei cem. Nibou nta dem kep muk ngwa dip di kui-juk nyen ba, mmun ntem bidem miniwou ninta di mmun ntem a.

¹²Niyai dem kep hakimoi di bon ninta di tiei kei ba, gwam ei minyei bousi ninghas him.

¹³Ningyoi dem kep miai biei ngat di nyop kei. Nuhui ngkek dem kep bakung tou di mur ningat-ngat ningei tinim leu ri.

¹⁴Ninda ne ninda ubbu di noni ba srak mas tut tig permata bijuk ri. Ningut dem kep gajah nikwai di iba tig nilam bimau pimo.

¹⁵Nimig dem kep cou di iba tig marmer di tiei kei bibon ba, ibicom nikiou di iba mas di pimbai kei bibon. Danti njem dinghuisi kin dinnei sindem bibor bidem kep nok biei buom njem di jei bibor ei nungug him ei minu Libanon.

¹⁶Nimei-mei nyen dati nyop kei ba, mun nyeng di bitut noni hagom brim dingon. Je di sop gwam nitta pilei minu ndig Yerusalem e, gi dipai pima yok hagom ndo tut no di dingon ngakei di dijem nok dingon kieti.”