Read Hatam DIUN MIMUN 6 Bible Online

DIUN MIMUN 6 - Hatam bible

DIUN MIMUN 6

¹“Na di sop ubbu ngat e, no di angon ngakei ug ei tiritou i? Ninyan ubbu e, no di angon ngakei ug ei tiritou i? Apai binye leu binhyepo nimpu na bininggok ser.”

²“No di dingon ngakei ug ei nide miaisi. Ug ei nide miai di nok biei ngat di nyop kei ninghousi mem gima nyohou kep nide domba nya ei miaisi bindung bakung tou nya.

³Ditde di dingon kieti ngwam kep da ba, dani cem dingwam kep noni. Noni jem nide domba nya ug ei bakung tou nghousi.”

⁴“Ditde di ninjei hwen e, nani sop ubbu ngat ri. Ade nuubbuti dem kep minu ndig Yerusalem kin Tirzah yuubbuti. Abrim dingon bibor dem kep nimpung tentara di injei sut ide kendera nya di bindei ninggap leusi.[4]

⁵Akiek aho tai leu da lewo atou kep da nggilunti biyai ningon di pri kep na biborti bida. Abou nta dem kep kambir nimpung di ijuk kwei leu nungug tou ei Gilead nya.

⁶Akwai tiei kei bidem kep domba tiei nimpung gom di sindi niceu ba minyei bipiap di tiei kei. Akwai nggre-nggre bidem kep domba pmot niwek di nggre ba, gom pror leu bi cem.

⁷Angyoi dem kep biei delima ningat nisra pimo di jo nding ei minyahas di abinggai ser aimaisi nibehei.

⁸Mbro nok gino da di nibou ndig dibon ditnem ndig nya ibou ningot muhwindagom ba, ditnem mien nya ibou ningot muhwindaningai ba, sop gwam nitta pilei nya imang bibor lo,

⁹ditde hakimoi gom ngat. Dingon pri kep noni bibor lene nimig gom ba, nipmem ningon ngakei. Sop gwam nitta pilei nya ingat noni bou igyai him lene inggap leu. Nibou ndig nitnem ndig nya kin nitnem mien nya cem ingat lene inggap leu.

¹⁰No di nikweisi dem kep hambong di pri ba, bed mmun di kei-kau cem bipiga kei bidem mpia yaisi ninyeng tou i? Nuubbuti brim dingon bibor bidem kep nimpung tentara di injei sut ide kendera nya di bindei ninggap leusi.[5]

¹¹Dikwei ei miai kenari nghousi di jo mbang briep ba, dingat mitou di bimbuk nya. Ba anggur nitou kin biei delima nitou gwam niti tu.

¹²Dingon llei ndam ade ningon ngakei dati bibor. Dingon di llei dima dem kep ningon di bisau sut nibri kroba pranti bit nimpung ninyeng jei nya.”

¹³“Na di sop gwam nitta pilei di akwei leu Sunem e, akwei bien-bien nyen ug e. Asibui na nyen-nyen bininggap leu ade nuubbuti.” “Nggon rima jitou kep da nggilun tirigi dibien-bien nyen ei tentara di itou kep nya igyai him i?”