Read Hatam DIUN MIMUN 7 Bible Online

DIUN MIMUN 7 - Hatam bible

DIUN MIMUN 7

¹“Sop gwam nitta pilei ningat di brim dingon ug o, acom amig tut sandalti kei bibor kei. Andimuhum kruisi dem kep mimau di nikilis kep mun cig bon bou ninda him.

²Akimba bousi dem kep mok ttou di ba anggur ngei pingge leu bi sren. Anghop dem kep gandum di iroi keyam ei di bakung tou jo ttai a.

³Ado hacem dem kep andai pmot can ba, dem kep rusa pmot can cem.

⁴Anggibi jei bidem kep ig di iba gaja nikwai bingot bijo-jo yam dip. Ayai dem kep minyei bousi ngot ei Hesybon di jo dideu dimbou pmem Batrabim. Ahwap cem dem kep ig di ingot bijo-jo yam dip ei Nungug Libanon ba, birok kik minu ndig Damsyik.

⁵Abou nggram him dem kep mbigdip Karmel. Aha abou nta bidem kep mitou di dwim bibor bibrim ingon. Nok gino nibou ndig hi rin lo, brim ningon a.

⁶Nani ne sop ubbu ngat dor njiriek sop di dingon ngakei yok nindigsi nya ri.

⁷Antig bou jei ba, kei bibor kei bidem dui sraba ninjem a. Ado dem kep ningat nimbeu di ndun a.

⁸Midikui dui sraba ninjem dima bidipuk ningat. Ado dima hacem dem kep ba anggur ngat nimbeu di ndun ba, annei di tibim leu ansi ui-gwang kei bidem apel ngat.

⁹Ahui dem kep ba anggur ngei di nyop kei di dikum ei dihui a.” “Nna ba ba anggur ngei dima biam ninyen bak no di dingon ngakei biwin ningut kanti hak ug. Ba, biam nok gima ug ei no di bong mai ninsi a.

¹⁰Dingon ngakei no di dingwam kep ba, ningon pri kep da.

¹¹Na di dingon ngakei na e, akwei ba, suug ei ngoi dumti nya ba, sibong nyahan ei sirima ei mitou pacar nghousi.

¹²Akwei ba, siba njap tekti bisuug ei miai ba anggur nghousi leu binhyepo siyok siyai kep ba anggur nitou di bimbuk ba, nitou kieng tu e? Apo delima nitou gwam niti tu e? Leu api siyem njita tut yam ei sirima.

¹³Mpam ndum di ntun dui arak ninjem him[6] nuui tun kei bikieng kep mpia. Ningat di nyop kei jo kui dimbou hui a. No di dingon ngakei e, dikes ningat di dipuk kwei nipou su kin gi sindi dipuk kwei yo cem keyam mem na.