Read Hatam DIUN MIMUN 8 Bible Online

DIUN MIMUN 8 - Hatam bible

DIUN MIMUN 8

¹Dijoi sut pia gino nani ne dikijam ningat di dut dipmem nido ngei rin lene mmo yo gi simei yam ngyoi tirigi suum yam ei simpak leu api hi dima mipai sa kinei drek dip bi.

²Midibuwak na ug ei dipmem nide ig bei nsi leu binhyepo angginau da. Midiyai ba anggur ngei di nuui tun kei kin delima ngat ningei cem bina ba, adut.

³Aba anda prak bahati dibou lene aba anda com binggriou da.

⁴Je di sop gwam nitta pilei minu ndig Yerusalem e, ma jipreu ei bipia jiwaisi nye bi bibou niyem njita tut yam bingwig ug e.”

⁵“Tou rikwei leu iggum ndigsi dima di nide ningon kieti ingou yam dima i?” “Diwin na leu abongti ei biei apel ngat behei mpia di apmem tta buhun tut na di srek tut na eisi ri.

⁶Abindei bidinok angon kieti. Ma anggriou hiter au noro ma anggriou dangkom ngat he. Lewo ningon ngakeisi dima nisindemti noyam kin nimai nisindemti ba, ningut kanti cem ninyeng tak kep limwa nya noyam kin nimai. Ningon ngakeisi ninjeng di sror dem kep hum njeng di ninjeng cig-cai bibor.

⁷Bit bon minyei nindig bibor bimu kep ningon ngakeisi dima kan bi. Lene minyei di su dem mem gima tibim tut bi. Mbro nok gino tungwagom njei nide ndigban hagom mem gima bipek ningon ngakeisi lo, ningat ne noni mitug ndei ninyeng di kinei drek dip.”

⁸“Nibon nikwohop mien gom di nido mbuk he yo. Gino hi kwei yok wa kep lene nibon mindei mem noni i?

⁹Gino noni noyam kin ngug tig ne miniba sar perak bindei nok miep dimai ei nidip a. Gino noni noyam kin dimbou pmem hi lene miniba buom bum ba, nibahau yam ser.”

¹⁰“Dinoyam kin ngug tig lene dido ndun him binok ig nut yam bijo-jo yam dip. Ditde ningon kieti kan bipia tirigi digwam bit noni lene dingon nggei-hi-nggei.”

¹¹“Salomo de miai ba anggur nghousi jo ei minu mien Baal-Hamon. Noni kes miai dima bak ninyohou kep miai cig nya ba, bikwop tungwagom-gom tri ningat bipek mitiei perak sribu gom,

¹²lene tug ndei mitiei sratus can nok nimuhuba. Salomo e, handei kon ba, atug ndei mitiei sribu gom mem nanti lene ninyohou kep miai cig nya itug ndei mitiei sratus can. Noro ditde miai ba anggur nghousi jo bidangkom he!

¹³Na di abong ser miaisi e, ma akon ahyet bidimiap ug e. Ba, disut bat nya cem ijoi sut imiap ahyet!”

¹⁴“Dingon kieti e, ma ador kwei ba, aum da lewo dinoyam kin andai kin rusa nikre nitu di idor ug ei biei ngat di nyop kei ninghousi ei nungug him Beter.”