Read Hatam YESAYA 1 Bible Online

YESAYA 1 - Hatam bible

YESAYA 1

¹ Srat dini pai sut Allah ningon kanti mem timiei Yehuda kin timiei minu ndig Yerusalem nya di Noni mbot kep tut bak Yesaya di nicig ninyeng Amos tirigi nibou ndig Uzia kin Yotam kin Ahas kin Hizkia nya inyeng tak kep timiei Yehuda nya.

²Mpia-bbed him e, ma amiap mun di tibim ei duhui him. Dihyeisi dini e, ma angig atingou mem dihyet. TUHAN pai Dimunggwom bat di dinyohou yok yaham imbuk kep Da.

³Sapi kan tut niceu ba, keledai kan tut mpia ttou nsi di niceu hyen kep eisi. Noro Ditde limwa di mben Israel ikan tut ba, ingon dorti tut bi.

⁴Je di jirom ndok ba, jimbuk e, mun di binggek micut igkep je drek dip jide sisar! Lewo jide sisar buhun tak je bibindei ba, jimig buhun. Jirok TUHAN ei jitta ba, jiba jinghim bak No Di Kwes-Kwau di suar jikuk je bak cem.

⁵Nggon rino jaham jimbuk kep Noni ninno tu i? Jijoi sut gima TUHAN ba hukum di buhun bibor hi kin bu bihwen je e? Jibou bok-ba lene jingon kinei ba, jibou buwei cem tu.

⁶Jiyai jibok ei jibou nggram him kikau bipek jimig jou ba, jimos kei tu. Jingkek dip dwoi mai kei lene buhwei jus yamti ba, jibok-ba cem tu. Hi kes bunggum kep bingot kep ba, hi yok obat kep cem bi.

⁷Ngkiai nya igya kep jide minu dima hagom bitimek lene indig jide minu ndig nya bingwig. Yoni igyem njita leu jide beisi nya bingwig bou jiyai him ba, ibindei hagom timek bingwig.

⁸Minu ndig Yerusalem nongkom he rino jo a. Noro jo nok minu di tentara igyon ttai di sindem bi noyam kin ig jibei di tungwatu nya yohok ei ba anggur nghousi kin ig jibei di yohok ei miai bimen nghousi cem.

⁹ Gino TUHAN Di Sindem Bibor sindui sut nye ba, ibou poi ingwes ngun bi ne nyeni yahagom isar bingwig dem kep nok Sodom kin Gomora.

¹⁰Je di mben Yerusalem e, jide nibou nya kin jide limwa nya jahagom jinok mben Sodom kin Gomora. Ma jimiap mun di tibim ei nyeni ide Allah nuhui him. Ma jingig jitingou mem nipingok jeti.

¹¹ Lewo Noni pai “Jikan bipia dijoi sut midut di jibon biDani ei nimbar hum dokti ninno tu nya e? Noro domba di jindig kep hum ei nimbar hum dokti nya kin ninggwo di jidigo leu sapi mien nya hagom nos Da. Jide sapi nikre kin domba kin kambir nya inggrom cem nos Da.

¹²Tou ricuk je bipia suar jittei mun dima yok hagom kwei tirigi jibikuk je biDa i? Tou ricuk je bipia suar jingwig kep midut nya nok gima ei Ditde Ig Di Kwes-Kwau i?

¹³Jittei mun di jibikuk je biDa dima mikui-kausi. Ninghap bindei ba, dingon him wei bibor. Diyai ngkek ttin ser jide njap ndig Bed Jep kin Njap Nigwam Kep Ninghuisi bitut jide njap ndig di jibon midut nindigsi nya cem. Jide sisar bindei ba, map kui njap dima hagomti tu.

¹⁴Dingon mpo tut jide njap ndig Bed Jep kin njap ndig di jipigig sut ei mem Da ba, hagom buhun tak Da. Bit bon dibiang jiyai munti nibuhunti kan bi.

¹⁵Mpe dino jingat nadi bijisu jinda lene midikiek Doho ter leu je. Mbro nok gino juhuk nadi bijo ninno bijo kikau lo, midingig ditingou mem jihyet bi. Lewo jiba jinda hwen mun mang tu.

¹⁶Ma jibon midut di bindei ba, jingon tiei kei. Ma jikes hon ba, jibon sisar bu au. Igbit ri! Ma jibon sisar bu au!

¹⁷Ma jita jibou ei gi jibon mun di igbitti. Ma jibrim jingkek mem ningon sren-srausi leu api jiciu ser gi tungwatu nya imbuk tut yam. Ma jibindei ba, tungwatu nya ibibon moibihi nya nok igbit. Ma jimbrap gau kibom nya ei nikei noho bei.”

¹⁸TUHAN pai “Jikwei ba, ikwam minggwen bit yam ser munhyet dini. Mbro nok gino jide sisar bindei ba, jingwoi kei noyam kin ban ngwoi lo, mididip tut jingonti bidibindei ba, tiei kei noyam kin bungguma. Mbro nok gino jide sisar mang bibor buhun tak je lo, midikos ser hagom bingwig leu je.

¹⁹Gino jibit dihyet ne mijiyem kep ningat di kei hagom di hei ei jide minu dima.

²⁰Gino jisrep tut dihyet ne mporo mijiyai nimai ei pranti. Da di TUHAN disimbot dat tu.”

²¹Nipou ne minu ndig Yerusalem mpung tut yo di ingon gom nya. Noro tini bu ne minu ndig dima niyai munti nya dem kep nok sop di nibou buwei! Nipou ne timiei nya yahagom ingon sren kei noro tini bu ne minu ndig dima mpung tut nihwen kep mun cig nya.

²²Minu ndig Yerusalem e, nipou ne nani noyam kin perak di nibok kak bibor noro tini bu ne anok mun di bon nibok di kak bibor hi bu bi. Nipou ne nani noyam kin anggur ningei di ui-gwang kei noro tini bu ne anok minyei he yo.

²³Ade nibou nya yaham imbuk kep Da. Ihig isut bit ninggimang kep mun cig nya ba, ingon ya mem gima hi ngot kep yok. Ikou sut nimbrap gau moibihi nyati ei nikei noho bei ba, itingou nam ser kibom nya di yahara yok tut ide mun di buhun tak yok ighyet.

²⁴Gima rino TUHAN di nok mben Israel ide Allah Di Sindem Bibor pai biyok “Je di jinok siceu ndam Da e, midibirop hanyen bije leu binhyepo bit bon jibindin-ndin nyen Da bu kan bi.

²⁵Midiyai dibou tut je nok gini. Dibindei ba, jingon pimbai kei noyam kin ngkimom nitu di tukan nya ikwen di pimbai kei. Dimbres map hagom bingwig leu je.

²⁶Midita nikei nya kin yo di ingon ki nya leu binhyepo inyeng tak kep je dem kep nok gi nipou po inyeng tak je habiei pima. Lene tungwatu nya mipai sut minu ndig Yerusalem bipia minu di ningon sren-srau ba, ningon gom cem ri.”

²⁷TUHAN ningon sren-srau. Gima rino Noni miteu minu ndig Yerusalem bitut timiei nya di ittin ser ide sisar hagom ba, ingwes ngun leu hukum.

²⁸Noro Noni micok tut yo di ibon sisar kin yo di ikiek imig jou tut Noni biyai nimai bak yo di ikes Noni bihigom ei yahagom.

²⁹Yoni mimmai sut yonti tut gi ikuk yok bak biei ndig nya bipigig sut ide miai nittou nsi nya hi ei mem kwar nya cem.[1]

³⁰Yoni minok biei ndig di nimeng mbris kin njita kioi di mui bingwig mem mpia ngei ndung.

³¹Yo di inyeng jei nya igyai munti di kinei bibor nya mibindei ba, itug ndei nimai noyam kin minta di mui su di hum mbom gom cut eisi biyem. Bit bon hi bigen ser mun di buhun di micut igkep yok dima kan bi.