Read Hatam YESAYA 14 Bible Online

YESAYA 14 - Hatam bible

YESAYA 14

¹TUHAN mingondut Nide limwa di mben Israel bidimig yok ei ba, inok Nide nya bu leu api mikes yok ei itimieisi hanyen ba, ngkiai nya mikwei bibicom yam bit yoni hanyen.

²Mben ngkiai imang bibor mimpu mben Israel mem gima ingkwei hanyen kwei ei itimieisi di TUHAN yai biyok. Ngkiai nya minok awak mem mben Israel ei sirima. Mben Israel mikat yo di nipou ikat yok pima lene inyeng mitak kep yo di nipou ico kep yok.

³TUHAN mikwek mben Israel leu ide ninggwenti nya kin niweisi di itug ndei kin midyai di buhun di siceu nya ibidip huk yok di igyai cem.

⁴Tirigi TUHAN bindei mbut gima lene yoni miba ighyet bicig mben Babel bipai, “Nibou ndig di sibut cut tu! Bit bon noni co kep hiter bu kan bi.

⁵TUHAN bindei ba, nibou ndig di isibut nya ide nisindemti kin inyeng njeisi kes hon tu.

⁶Nibou ndig di isibut dima yok iba ide niggati bico kep yo di icut biyok nya ba, ihwen bit yok bijo kikau.

⁷Leu api tungwatu dihyeisi dini hagom ingon kwes kin yam ba, ingon jo nyahan. Bikwop tungwagom-gom ba ningon di nggei-hi-nggei bipai doia.

⁸Biei eru kin buom Libanon ingon nggei-hi-nggei lewo nibou ndig di sibut pima cut tu. Noni ug leu su lene hi di kes nihyet mem gima iwim biei dima yok bu bi!

⁹Minu nimai nya ide ba ningon di nggei-hi-nggei bicigit nibou ndig Babel. Apino yo di inyeng jei ei dihyeisi dini nipou su ingwes nya sindi ikiju leu ibong eisi. Nibou ndig di nipou su nya ingwes sindi ikiju leu ide banggo mbrei.

¹⁰Yahagom ijem noni bipai ‘Mei, nogindini anok nye dino ninghuisi jet ba, nisindem bi cem!

¹¹Nipou yo ne limwa nya iba nggong mbrei bikon anyeng noro tini bu ne angat rin ei minu nimai nya ide di nok mpia nintiti. Njingwoi nya ne ade mpia di abong niti rin ba, adihyeisi nya ne ade ban di abinggai na ri.’

¹² Nibou ndig Babel e, nipou yo ne anok singmur di ninjeng piga kei. Noro tini bu ne acut leu mpia-bbed him! Nipou yo ne abindei timek ngkiai nya ba, icut bina. Noro tini bu ne TUHAN com na ug ei dihyei jou.

¹³ Abungwam ndam gima akui ug ei mpia-bbed him ba, atas ade banggo mbrei ei ham di gwam anai bibor dip! Akan bipia agwam nok nibou ndig ei nungug dip ei nite bei mpia nijjai di nok mpia di kwar nya idem yam eisi.

¹⁴Apai bipia akui nig-nai ug ei bumbuhui nya dip dem kep nok No Di Ninyeng Jei Bibor.

¹⁵Noro TUHAN com na kikau ug ei minu nimai nya ide di jut biborti tu.

¹⁶Yo di ingat rin ei sirima mitou kep na bimian huk na leu api ihig yam ‘No po bindei di dihyei bingmai ba, biyai ningon di digit bak minu ninyeng tak kepti nya pima rigini e?

¹⁷No dini ripo ya kep minu ndig nya di timek ba, bindei dihyeisi dini binok iggum ndigsi e? No dini ripo kes tungwatu di kat yok leu ingkiaisi bi sren ug ba, sindui sut yok bingkwei hanyen ug ei itimieisi bi e?’

¹⁸Tungwatu dihyeisi dini hagom itig ide nibou ndig di inyeng jei di imai nya ei jui dip bidem yahagom ug.

¹⁹Noro mem nani ne ajui hi bi. Icom angut hak noyam kin njita kioi di irok ei a. Ibinjei nikon pran cig di imai ei pranti kep angut ba, ibinjei angut bit yoni ingut ug ei tig mihyeti gom bidem kep nimbiam di ico-co nyen kep.

²⁰Abindei sar ade minu ba, abiyai nimai bak ade limwa nya tu. Gima rino igitig nani noyam kin gi itig nibou ndig hiter nya bi a. Ade bat nya di ibon mun di kinei bibor dima hi ningwes ngun bi.

²¹Niyai nimai bak tungwatuti noyam kin gi ibui mindhe-ndhe mikinyon eisi haninyai ri! Apmot bat nya mimai drek dip idigup bat-idigai bat nya ide sisar. Hi dima ninyeng mitak kep ei dihyeisi dini biwin minu ndig nya bi sren.”

²²TUHAN Di Ninyeng Jei Bibor pai “Midinjei siceu bidihwen minu Babel bitimek ba, dibicok tut hak. Diteu tungwagom ngat he biningwes ngun ba, disindui sut munggwom nya bigyaijo bi. Da di TUHAN disimbot dat tu.

²³Midibindei minu Babel binok dumti di hapug bong ser. Midicok tut mben Babel nipwoi a. Da di TUHAN Di Dinyeng Jei Bibor disimbot dat tu.”

²⁴ TUHAN Di Ninyeng Jei Bibor ba neheng bipai “Mun di dikos tut tu mimbut bipek kep.

²⁵Midibindei sar mben Asyur di ingat rin ei Ditde minu Israel. Lene midico kep yo di ingat rin ei Ditde nungug nya nyen-nyen. Midikwek Ditde limwa nya leu yo di ico kep yok nya inda nsi kin mun di buhun di mben Asyur ibidip huk yok di ibiang cem.

²⁶Gini ne dingon kanti di dibitin ei mem dihyeisi dini ri. Disu dinda mem gima dikes hukum ei tungwatu nya dip.”

²⁷TUHAN Di Ninyeng Jei Bibor kos tut mem gima bon mun dima yok tu. Noni su ninda mem gima kes hukum ei tungwatu nya dip ba, hi dima ggai ser Noni tut bi.

²⁸ Gini lene Allah Nihyet di sok kwei di itri tut ei ari bingwam di Nibou Ndig Ahas nimaisi ri.

²⁹ Mben Filistin e, tom di dikrau mem gima dibibui na dahat tu. Noro ma angon nggan-triot au. Leu gino wou gom mai lene wou di ten bibor dor njiriek gima mikwei ya luei nohoti bu. Wou gom nidunggwei miki leu mindhe naga di yai ninyehei bu.

³⁰Ninggum di buhun bibor mihwen je bijimai. Yo di ingwes ngun di igyaijo nya yahagom mitug ndei nimai. Noro TUHAN de limwa nya di yuhui mbum bibor mitug ndei njita. Yo di isindem bi nya mibong kei migwam kei.

³¹Minu ndig Filistin nya e, ma jipim kui jei bijahara mem tungwatu nya ikwei mpu je! Ma jahagom jihyet kui yam tut ba, jidigit ei yamti! Bumbuhui ttou gom di nok dihyei ntui kui dat mpia-bbed him leu nite bei mpia nijjai ba, bindo tut nimpung siceu di injei kwei ri. Ba, nibindei ttin cig hi srig ikieti bi.

³²Notou nibuhup bak yo di mben Filistin icuk yok kwei bigya hacan mem yo i? Nnaba nipai biyok bipia TUHAN win Sion hanyen tu. Ba, Nide limwa nya di igyai ninghuisi wei migwam coi mpia dima bingwes ngun.