Read Hatam YESAYA 15 Bible Online

YESAYA 15 - Hatam bible

YESAYA 15

¹ Gini ne TUHAN nisokti tut mben Moab ri. Siceu nya ibindei sar minu ndig Ar kin Kir mem mmun gom ngat leu api mpia mbum-brati minggai kep minu Moab bram.

²Timiei minu ndig Dibon nya ikui ug ei mbigdip mem gima ipim ei mpia di ikuk yok bak kwar nya eisi a. Timiei minu Moab iba ingon di ngguk bipim nggruet tut minu ndig Nebo kin Medeba. Ikak ibou nta kin yuhui nta leu nok bindo tut gi yuum ningon nggukti.

³Tungwatu di igya-ya nyen kak simpak nya ijuk sinsun kron di bindo tut gi yuum ningon nggukti. Ipim nggruet ei biyati kin ig ninjek hu kwei cem.

⁴Timiei minu ndig Hesybon kin minu mien Eleale ipim kui jei ba, ighyet ug ninno bipek kin minu ndig Yahas. Tentara di ide nya cem igyai nidigit ei yamti ba, mimbri di kui ingkek cut hak leu yok tu.

⁵Dingon ngguk tut minu Moab! Timiei nya icat ndigban binang tut ug ei minu ndig Zoar kin Eglat-Selisia. Bihi inang bikui puig di ug ei minu ndig Luhit ba, ibipim kak imbutti. Bihi inang ug ei minu mien Horonaim ba, ibahara inghuisi di wei lewo mun di buhun cut igkep yok.

⁶Minyei Nimrim ningei pingge hak leu ba, minta di hei ei nintig dip mui bingak-cai tu. Minta di nimeng ngun hi jo bu bi.

⁷Tungwatu nya isigon minyei pmot Haarabim ba, ibipian ndigban di ide nya hagom ug ei dihyei nddongti.

⁸Naharati jo bidem minu Moab de minu niya kwas yamti tirima-tirima. Gi ipim kui jei dima tibim ba, imiap ei minu ndig Eglaim kin Beer-Elim.

⁹Minyei ningei ngwoi lewo nimbiam nggrom srigsi ei minu ndig Dibon. Allah mikes mun di buhun bibor di dor njiriek gima bu ei yo di ibong ei sirima dip. Nidigo kep mikwau kukiau cig nya migyai nimai bak mben Moab nindigsi di ingat rin ei minu dima yahagom.