Read Hatam YESAYA 17 Bible Online

YESAYA 17 - Hatam bible

YESAYA 17

¹ TUHAN pai “Minu ndig Damsyik miwer no minu ndig bu bi. Noro miwer mun ig kum kroisi di kui sur mpia he.

²Tungwatu nya mikes minu ndig ngot di jo ei minu Siria ei ba, mibong ser bi bijo ninno-bijo kikau.[9] Minu dima minok mpia di mem nimpung mindhe-ndhe nimuhup tu nya igya niti. Lene hi di mijji yok leu mpia dima bi.

³Mben Israel ide tentara nibousi di igya coi nya mipror hak ug ba, minu ndig Damsyik de niya binontiti mipror leu noni. Mben Siria di ingwes ngun nya igyaijo ei niwer nikinei-kinauti noyam kin mben Israel. Da di TUHAN Di Dinyeng Jei Bibor disimbot dat tu.”

⁴TUHAN pai “Njap ngon bou mitau lene minu Israel ninyeng jeisi mingwig hon nohonti. Lene mun nyeng hagom di nyeng tut nya mipror hak.

⁵Minu Israel midem kep miai ei minu ndig Refaim di ikos gandum bingwig leu di niken di jo poi mien he.

⁶Mben Israel ibou poi he mingwes ngun ba, gima noyam kin biei zaitun di ipuk ningat nya bingwig leu. Noro ningat poi he di jo igbit ninggrupti nya. Da di TUHAN Allah Israel disimbot dat tu.”

⁷Njap dima dem lene tungwatu mingkwei biyahara bak No Di Pai Tes yoni di Allah Israel di kwes-kwau bimpu yok.

⁸Yoni miba ingon com mun di ibon bou inda him di nok nimbar hum dok di indig mun di ui-gwang kei eisi nya kin Kwar Sop Asyera nya cem bu bi.

⁹Njap dima dem lene minu ndig ngot di jo ei minu Israel di ibon ide tentara nibousi di igya coi nya miwer mun ig kum kroi ba, mpia di hi bong ser bu bi. Ba, gima noyam kin minu ndig ngot di mben Hewi kin Amori nya[10] ikiju binang leu ei mpe dipo inang leu tentara Israel pima.

¹⁰Na di minu Israel e, abbwe ser Allah di teu na di angwes ngun kin Allah di noyam kin nungug tig di ngkiem kei di nyohou na tu. Ata njita ei miaisi di apigig ser[11] mem gima akuk na bak kwar ngkiai nya ide cem tu.

¹¹Mbro nok gino njita kioi di ata dima hei hak ba, nitou ngwam niti hak mem njap di ata dima lo, ningat migwam niti bi. Gi jo mem na rino mun di buhun kin ninggwen di cut leu na kan bi he.

¹²Ngkiai di isindem bibor nya no ighyet kui yam kep a. Ighyet nugwei bong bidem kep muk di roi nindig di nugwei bong bibor a.

¹³Ikiju binjei siceu bidem kep minyei di su di kui mpia bibor. Noro Allah sok kep yok leu api inang biyuug ninno noyam kin pas nicap di bit hou nimig kin dihyei ntui di hou sigau miep di bit nimig.

¹⁴Ibindei ba, nittinti di nindig bibor cut igkep tungwatu nya mem mpia nicutti lo, dideu njap tekti lene ipror hak. Mun di buhun dima micut igkep bikwop yo di ipos ndigban leu nye yahagom.